ޔުވެންޓަސްއަށް ކުޅެމުން އަންނަ ކްރޮއޭޝިއާގެ ފޯވާޑް މާރިއޯ މަންޒުކިޗް މިސީޒަނަށްފަހު ގަތަރު ލީގަށް ބަދަލުވާނެ ކަމަށް މީޑިއާ ރިޕޯޓްތައް ބުނެފިއެވެ.

މި ސީޒަނުގައި ޔުވެންޓަސް އާއި ގުޅުނު ކޯޗު ސާރީގެ ޕްލޭންގައި މަންޒުކިޗް ނުހިމެނޭއިރު، މަންޒުކިޗްއަށް މިސީޒަނުގައި ކުޅުމަށް ފުރުސަތެއް ނުލިބެއެވެ. މީޑިއާ ރިޕޯޓްތައް ބުނާ ގޮތުން މަންޒުކިޗް ހޯދަން ޔޫރަޕްގެ ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އެގޮތުން އިނގިރޭސި ކްލަބް މެންޗެސްޓާ ޔުނައިޓެޑުންވެސް މަސައްކަތް ކުރިއެވެ. ޔުނައިޓެޑުން މަންޒުކިޗް އާއި ވާހަކަ ދެއްކި ކަމުގައިވިޔަސް މަންޒުކިޗް އެދުނުވަރުގެ މުސާރައެއް ޔުނައިޓެޑުން ވަނީ ދެކޮޅު ހަދައިފައެވެ.

މީޑިއާ ރިޕޯޓްތައް ބުނާ ގޮތުން މަންޒުކިޗް ބަދަލުވާނީ ގަތަރުގެ ދުހައިލާއަށެވެ. އެގޮތުން މަންޒުކިޗް ވަނީ ދުހައިލާއާއި އެކު ދެއަހަރު ދުވަހުގެ އެއްބަސްވުމެއްގައި ސޮއި ކޮށްފައެވެ. މި އެއްބަސްވުމުގެ ތަފްސީލެއް ލިބިފައިނުވާއިރު ގަތަރު ލީގުގެ ދުހައިލާގައި މަންޒުކިޗްއާއި އެކު ކުޅުނު ކުޅުންތެރިޔާ މަހުދީ ބެނާޝެއާ ކުޅެއެވެ.

މަންޒުކިޗް ވަނީ ޖަރުމަނުގެ ވޮލްސްބާރގް އަށާއި ބަޔާން މިޔުނިކްއަށް ވެސް ކުޅެފައެވެ. މީގެ އިތުރުން ސްޕެއިންގެ އެތްލެޓިކޯއަށް ވެސް ކުޅުނު މަންޒުކިޗް އިޓަލީގެ ޔުވެންޓަސް އާއި ގުޅުނީ 2015 ވަނަ އަހަރުގައެވެ. ޔުވެންޓަސްއަށް އޭނާ ކުޅެދިން 162 މެޗުގައި އޭނާ ވަނީ 44 ލަނޑު އެޓީމަށް ކާމިޔާބުކޮށްދީފައެވެ. އަދި ކްރޮއޭޝިއާގެ ގައުނޫ ޓީމަށް އޭނާ ކުޅުނު 89 މެޗުން 33 ލަނޑު އޭނާ ވަނީ ކާމިޔާބުކޮށްދީފައެވެ.