މިއަހަރު ދިމާވި ކަންކަމަށް ބެލުމަށްފުހު ކުރިޔަށްއޮތް ސީޒަން ޝެޑިއުލްކުރާނެކަމަށް އުންމީދުކުރަން: ސުޒެއިން

މިއަހަރުގެ ސީޒަނުގައި ދިމާވި ކަންކަމަށް ބެލުމަށްފަހު ކުރިޔަށްއޮތް ސީޒަނުގެ ޝެޑުއަލް ހަދާނެ ކަމަށް އުންމީދު ކުރާ ކަމަށް ކްލަބް ގްރީން ސްޓްރީޓްސްގެ ކޯޗު އަލީ ސުޒެއިން ބުނެފިއެވެ.

ސުޒެއިން ބުނީ އޭއެފްސީ ކަޕްއަށް ޓީމްތައް ތައްޔާތުވަމުންދާއިރު ކޮންމެ ޓީމެއްގެ ހާލަތު ވެސް އޮތީ ވަރަށް ގޯސްކޮށްކަމަށާއި، ހާއްސަކޮށް ޓީސީ ސްޕޯޓްސް ކްލަބްގެ މިހާރު އޮތް ހާލަތަކީ މި ސީޒަން ފެށުނުއިރު އޮތް ހާލަތައްވުރެ ގޯސް ހާލަތެއްގައި ކަމަށެވެ. ސުޒެއިން އިތުރަށް ބުނީ މާޒިޔާއަށް ޕްލޭއޮފްގެ މެޗުތައް ވެގެންދާނީ އުނދަގޫ މެޗު ތަކަކަށް ކަމަށާއި އެގޮތުން ޕްލޭއޮފްގައި މާޒިޔާއިން އިންޑިއާގެ ބެންގަލޫރު އެފްސީ އާއި ވާދަކުރަން ޖެހޭ ކަމަށެވެ. އަނެއްކޮޅުން ދިވެހި ލީގު ދިޔައީ އެންމެ އެކަށޭނެ ގޮތަކަށް ނޫންކޮށް ކަމަށް ސުޒެއިން ބުންޏެވެ.

މިހާރު ކްލަބްތައް އޮތް ހާލަތުން އަރައިގަތުމަކީ އުނދަގޫ ކަމެއް ކަމަށާއި އެހެން ކްލަބްތަކެކޭ އެއްފަދައިން ގްރީންގެ ހާލަތީވެސް މިއީ ކަމަށް ސުޒެއިން ބުންޏެވެ. ނަމަވެސް ގްރީންގެ ކުޅުންތެރިން ޕްރެކްޓިސްތަކުގައި ބައިވެރިވާކަން އެއީ ކްލަބަށްލިބޭނެ ހިތްހަމަޖެހުމެއް ކަމަށާއި މެޗަށް ޓީމު ހަމަވާނެ ކަމަށް އުންމީދުކުރާ ކަމަށް ސުޒެއިން ބުންޏެވެ.

ޓީސީގެ ކޯޗު ކަމަށްދާދިފަހުން ހަވާލުވި މުހައްމަދު ޝާޒްލީ ބުނީ އޭނާ ޓީސީ އާއި ހަވާލުވިއިރު ޓީސީގެ ހާލަތު ވަރަށް ގޯސްކަމަށާއި ނަމަވެސް މިހާރު މަޑުމަޑުން އެހާލަތު ރަނގަޅުވަމުން އަންނަ ކަމަށާއި މާގިނަ ޕްރެކްޓިސްތަކަކާއި ނުލާ ޓީސީއިން އަންނަނީ ރަނގަޅު ނަތީޖާ އެއް ހޯދަމުން ކަމަށެވެ.

ނިލަންދޫގެ ކޯޗު ފްރެސްކޯ ބުނީ ނިލަންދޫގެ ހާލަތު ދުވަހެއް ދުވަހަށް ދަނީ ދަށަށް ކަމަށާއި، މުޅި ފުޓުބޯޅައަށް އޮތީ ބޭސްކުރަން ޖެހިފައި ކަމަށެވެ.

ދިރާގު ދިވެހި ލީގުގެ އެއްވަނައިގައި މާޒިޔާ އޮތީ ލިބުނު 35 ޕޮއިންޓާއި އެކުގައެވެ. ދެވަނައިގައި އޮތް ގްރީން ސްޓްރީޓްސްއަށް 23 ޕޮއިންޓް ލިބިފައިވާއިރު ތިންވަނައިގައި

ޓީސީ އޮތީ ލިބުނު 22 ޕޮއިންޓާއިއެކުގައެވެ. އަދި ހަތަރުވަނައިގައި އޮތް ކްލަބް އީގަލްސްއަށް ލިބިފައިވަނީ 21 ޕޮއިންޓެވެ.