ދުނިޔޭގެ ޓޭބަލް ޓެނިސް ދުވަސް މިއަހަރުވެސް ރާއްޖޭގައި ފާހަގަކޮށްފި
6 އެޕްރީލު 2017 | ބުރާސްފަތި 20:16ދުނިޔޭގެ ޓޭބަލް ޓެނިސް ދުވަހަކީ އޭޕްރިލް މަހުގެ 6 ވަނަ ދުވަސް
ދުނިޔޭގެ ޓޭބަލް ޓެނިސް ދުވަސް ފާހަގަކުރުމަށް ބޭއްވި އިވެންޓުގެ ތެރެއިން
ދުނިޔޭގެ ޓޭބަލް ޓެނިސް ދުވަސް ފާހަގަކުރުމުގެ ގޮތުން ރާއްޖޭގެ ޓޭބަލް ޓެނިސް އެސޯސިއޭޝަނުން ބުރާސްފަތި ދުވަހު ހާއްސަ ހަރަކާތްތަކެއް ކުރިއަށް ގެންގޮސްފި އެވެ.
ޒުވާނުންގެ މަރުކަރު ޓީޓީ އިންޑޯ ހޯލުގައި ކުރިއަށް ގެންދިޔަ މި ހަރަކާތްތަކުގައި ރާއްޖޭގެ ކުރީގެ ކުޅުންތެރިންނާއި މިހާރުގެ ބައެއް ކުޅުންތެރިން އަދި ކުޑަ ކުދިން ވަނީ ބައިވެރިވެފަ އެވެ.
މި އިވެންޓާއި ބެހޭ ގޮތުން ވާހަކަ ދައްކަމުން ރާއްޖޭގެ ގައުމީ ޓީޓީ ޓީމުގެ ތަޖުރިބާކާރު ކުޅުންތެރިޔާ މުއީނާ މުހައްމަދު ބުނީ މި އިވެންޓަކީ މިދިޔަ އަހަރެކޭ އެއްގޮތަށް މިއަހަރުގެ ވެސް ދުނިޔޭގެ ޓޭބަލް ޓެނިސް ދުވަސް ފާހަގަކުރުމަށް ބާއްވާ ހަރަކާތްތަކެއް ކަމަށާއި އެގޮތުން މި އަހަރުގެ އިވެންޓަށް ވެސް ގިނަ ފަރާތްތަކެއްގެ އެއްބާރުލުމެއް ލިބުނު ކަމަށެވެ.
މުއީނާ ބުނީ ކުރިން އަހަރެކޭ އެއްގޮތަށް މިއަހަރުވެސް ތަފާތު ހަރަކާތްތަކެއް މި އިވެންޓުގައި ކުރިއަށް ގެންދިއުމަށް ވަރަށް ކުރިއާލާ ރާވާފައިވާ ކަމަށާއި އެހެން ނަމަވެސް މޫސުން ތަން ނުދިއުމާއި މިވަގުތު ގައުމުގެ އާންމު ހާލަތު ތަން ނުދިނުމުގެ ސަބަބުން އެކަންތައްތައް ކުރިއަށް ނުގެންދެވުނު ކަމަށެވެ.
އަދި ހަމަ އެހެންމެ ގައުމީ ޓީމުގެ ބައެއް ކުޅުންތެރިން މިވަގުތު ބައިނަލްއަގްވާމީ މުބާރާތެއްގައި ވާދަކުރުމަށް ގައުމުން ބޭރުގައި ހަރަކާތްތެރިވަމުން ދިއުމަކީ ވެސް މި އިވެންޓް މިހާ ކުޑަކޮށް ގެންދިއުމުގެ ސަބަބެއް ކަމަށް މުއީނާ ބުންޏެވެ.
ކޮންމެ އަހަރެއްގައި ވެސް ފާހަގަކުރާ ދުނިޔޭގެ ޓޭބަލް ޓެނިސް ދުވަހަކީ އޭޕްރިލް މަހުގެ 6 ވަނަ ދުވަހެވެ.
