ސަފާރީތައް އަޅަން ދިޔަނަރު ދޭއް ފަޅު ދެނީ
ސަފާރީތަކުން ކުނި ނައްތާލެވޭނެ ނިޒާމެއްގެ މަސައްކަތް ކުރައްވާ ކަމަށް ވިދާޅުވި
ދިޔަނަރު ދޭއް ފަޅު
ސަފާރިތައް ބަނދަރު ކުރުމަށް މާލެ ކައިރީ އޮންނަ، ދިޔަނަރު ފަޅާއި ޖެހިގެން އޮންނަ ފަޅު ''ދިޔަނަރު ދޭއް'' ދޫކުރުމަށް ޓޫރިޒަމް މިނިސްޓްރީން ނިންމައިފިއެވެ.
އެކަން އިޢުލާން ކުރެއްވީ ހޯމަ ދުވަހު ބޭއްްވި ބޯޓިން އެވޯޑްސް ހަފުލާގައި ޓޫރިޒަމް މިނިސްޓަރު އަލީ ވަހީދުއެވެ.
ބޯޓިން އިންޑަސްޓްރީގެ ބޭފުޅުންނާއި މުޚާތަބުކުރައްވާ ޓޫރިޒަމް މިނިސްޓަރު ވިދާޅުވީ، ސަފާރީތައް ރަށްރަށް ކައިރީގައި ''އޯވަރނައިޓް'' ކުރަން ޖެހޭތީވޭ ޝަކުވާތައް ލިބެމުންދާ ކަމަށެވެ. އަލީ ވަހީދު ވިދާޅުވީ، އެފަރާތްތަކުގެ ޝަކުވާތައް އަޑުއެހުމަށް ފަހު ސަފާރީތައް ބަނދަރު ކުރުމަށް ލުއި ފަސޭހަ ގޮތްތަކެއް ހޯދައި ދިނުމުގެ ގޮތުން އަންނަ އަހަރުން ފެށިގެން ސަފާރީތައް އަޅަން ދިޔަނަރު ދޭއް ފަޅު ހަމަޖައްސާފައިވާ ކަމަށެވެ.
ޓޫރިޒަމް މިނިސްޓަރު ވިދާޅުވީ، އެންމެ ފުރަތަމަ މަސައްކަތް ކުރެއްވީ ސަފާރީތައް އަޅަން ދިޔަނަރު ފަޅު ދިނުމަށް ކަމަށެވެ. އެކަމަކު ކުރީ ސަރުކާރުގައި އެތަން ވެސް ބަޔަކަށް ދީފައިވާތީ އެކަން ނުކުރެވުނު ކަމަށް ވިދާޅުވިއެވެ.
އަލީ ވަހީދު ވިދާޅުވީ، ބޯޓިން އިންޑަސްޓްރީ އަކީ މަދު ބައެއްގެ ބުރަ މަސައްކަތުން މިއަދާ ހަމަޔަށް ދިރިދެމި އޮތް އިންޑަސްޓްރީއެއް ކަމަށާއި، ކުރިޔަތް އޮތް ތަނުގައި އެ އިންޑަސްޓްރީ ކުރިއެރުވުމަށް މަސައްކަތް ކުރައްވާނެ ކަމަށެވެ.
އަންނަ އަހަރު ފަތުރުވެރިކަމާއި ގުޅުން ހުރި 20 ޤަވާއިދެއް ރިވައިޒް ކުރަން ހަމަޖެހިފައިވާއިރު އޭގެ ތެރޭގައި ބޯޓިންއާ ގުޅުން ހުރި ޤަވާއިދުތައް ވެސް ހިމެނެއެވެ. ސަފާރީތަކުން ކުނި ނައްތާލެވޭނެ އެންމެ ރަނގަޅު ގޮތެއް ހޯދައިދިނުމުގެ މަސައްކަތް ކުރައްވާނެ ކަމަށް އަލީ ވަހީދު ވަނީ ފާހަގަކުރައްވާފައެވެ.
