ފްރާންސްގެ ޕެރިސް ސެއިންޓް ޖާމަންއަށް ކުޅެމުން އަންނަ އުރުގުއޭއީގެ ފޯވާޑް އެޑިސެން ކަވާނީ އެތްލެޓިކޯއަށް ބަދަލުވާނެކަމަށް މީޑިއާ ރިޕޯޓްތައް ބުނެފިއެވެ.

މީޑިއާ ރިޕޯޓްތައް ބުނާގޮތުން ކަވާނީ ވަނީ އެތްލެޓިކޯއާއި އެކު ތިން އަހަރުދުވަހުގެ އެއްބަސްވުމެއްގައި ސޮއިކުރަން ތައްޔާރުވަމުންނެވެ. ބެލެވޭ ގޮތުގައި ކަވާނީ އެތްލެޓިކޯއަށް ބަދަލުވާނީ މި ފެށޭ ޖަނަވަރީ މަހުގެ ޓްރާންސްފަރ މާކެޓްގެ ތެރޭގައެވެ.

މިވަގުތު އަނިޔާގައިހުރި ކަވާނީ އަށް ކުޅެވޭނެ ދުވަހެއް އަދި ނޭނގޭއިރު ބެލެވޭ ގޮތުގައި ކަވާނީ އަށް އެނބުރި ކުޅުމަށް އާދެވޭނީ 2020 ވަނަ އަހަރުގެ މެދުތެރޭގައެވެ.

ޕީއެސްޖީއަށް މިހާތަނަށް އެންމެ ގިނަ ލަނޑު ކާމިޔާބުކޮށްދީފައިވާ ކަވާނީ އަށް މި ސީޒަނުގައި ކުޅެވުނީ އެންމެ މެޗެކެވެ. އަނިޔާގެ ގިނަ މައްސަލަތަކާއި ފަހަކަށް އައިސް ކުރިމަތިލާން ޖެހިފައިވާ ކަވާނީ 2024 ވަނަ އަހަރު ރިޓަޔާވާނެ ކަމަށް އޭނާ ވަނީ ބުނެފައެވެ.

އަނިޔާއާއި މެދު ވާހަކަދައްކަމުން ކަވާނީ ބުނީ އަނިޔާއަށްފަހު ކުޅުމާއި ބައިވެރިވާއިރު ކުޅެން ނިކުންނާނީ ވަރުގަދަކޮށް ކަމަށެވެ.

ކަވާނީ ވަނީ މިހާތަނަށް ޕީއެސްޖީއަށް ކުޅުނު 289 މެޗުން 196 ލަނޑު އެޓީމަށް ކާމިޔާބުކޮށްދީފައެވެ. އަދި އުރުގުއޭއީއަށް ކުޅެދިން 116 މެޗުގައި އޭނާ ވަނީ އެޓީމަށް 50 ލަނޑު ކާމިޔާބު ކޮށްދީފައެވެ.