އެންމެ ފަހުގެ ޗެމްޕިއަން ޔުވެންޓަސް ބަލިކުރުމަށްފަހު ލާޒިއޯއިން ސުޕަ ކަޕް ކާމިޔާބުކޮށްފި

އިޓާލިއަން ސުޕަ ކަޕްގެ އެންމެ ފަހުގެ ޗެމްޕިއަން ޔުވެންޓަސް ބަލި ކުރުމަށްފަހު ލާޒިއޯއިން ސުޕަ ކަޕްގެ ތަށި އުފުލައިލައިފިއެވެ.

ސައުދި އަރަބިއްޔާގައި ކުޅުނު މި މެޗު ލާޒިއޯއިން ކާމިޔާބުކުރީ 3-1 ގެ ނަތީޖާ އަކުންނެވެ.

މެޗު ފަށައިގެން ލާޒިއޯއިން ވަނީ ޔުވެންޓަސްގެ ވަރުގަދަ ޑިފެންސްއަށް ބާރު ބޮޑުކޮށް ގިނަ ހަމަލާތަކެއް ޔުވެންޓަސްގެ ގޯލަށް ފޮނުވައިލައިފައެވެ. އެގޮތުން މެޗުގެ 16 ވަނަ މިނެޓުގައި ލާޒިއޯއިން ވަނީ ލަނޑު ޖަހާ މެޗުގެ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ލުއިސް އަލްބާރޓޯ އެވެ. މި ލަނޑާއި އެކު ޔުވެންޓަސްއިން އެޓީމުގެ ކުޅުން ރަނގަޅުކޮށްފައިވާއިރު ޔުވެންޓަސް އިންވަނީ ލާޒިއޯގެ ގޯލަށް ފުލުފުލުގައި ހަމަލާ އުފައްދައިފައެވެ. އެގޮތުން މެޗުގެ ފުރަތަމަ ހާފު ނިމުމުގެ ކުރިން ޔުވެންޓަސްއިން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ އިތުބާރު ފޯވާޑް ޑިބޭލާ އެވެ.

މި މެޗުގެ ފުރަތަމަ ހާފު ނިމިގެންދިޔައީ 1-1 ގެ ނަތީޖާ އަކުންނެވެ.

މެޗުގެ ދެވަނަ ހާފު ފަށައިގެން ޔުވެންޓަސްއިން ލާޒިއޯގެ ގޯލަށް ގިނަ ހަމަލާތަކެއް ފޮނުވާލިއިރު ލާޒިއޯއިން އައީ ކައުންޓަ އެޓޭކްގައި ޔުވެންޓަސްގެ ގޯލަށް ނުރައްކާ ކުރަމުންނެވެ. މެޗުގެ 73 ވަނަ މިނެޓުގައި ލާޒިއޯ އިންވަނީ ލަނޑު ޖަހާ މެޗުގެ ލީޑު ދެވަނަ ފަހަރަށް ހޯދައިފައެވެ. މި ލަނޑު އެޓީމަށް ކާމިޔާބުކޮށްދިނީ ލުލިކް އެވެ.

މި ލަނޑާއި އެކު ޔުވެންޓަސް އިން އެޓީމުގެ އެޓޭކް އިތުރަށް ވަރުގަދަކުރިއިރު ލާޒިއޯއިން ވަނީ ލިބުނު ކައުންޓަ އެޓޭކްއެއްގެ ބޭނުން ހިފައި މެޗުގެ އެންމެފަހު މިނެޓު އިތުރު ލަނޑެއް ޖަހާ ލީޑު ފުޅާކޮށްފައެވެ.

މި ބައްޔާއިއެކު ޔުވެންޓަސް އިން މި ސީޒަނުގައި ބަލިވެފައިވަނީ އެންމެ ދެ މެޗުންނެވެ. އަނެއްކޮޅުން ލާޒިއޯ އަކީ މި ސީޒަނުގައި ޔުވެންޓަސް ބަލިކުރި ހަމައެކަނި ޓީމެވެ.