އިޓާލިއަން ސުޕާ ކަޕަށް މިފަހަރު ޔުވެންޓަސްގެ ހާއްސަ ޖާޒީއެއް

އިޓާލިއަން ސްޕަ ކަޕަށް އިޓާލިއަން ލީގުގެ ޗެމްޕިއަން ޔުވެންޓަސްއިން ހާއްސަ ޖާޒީ އެއްގައި ނިކުންނަން ނިންމައިފިއެވެ.

ޔުވެންޓަސްއިން ބުނީ ސައުދި އަރަބިއްޔާގެ ރިޔާދްގައި ކުޅޭ މި މެޗަށް ޔުވެންޓަސްއިން ނިކުންނާނީ އަރަބިން ނަން ޖަހައިފައިވާ ޖާޒީ އެއްގައި ކަމަށާއި މި ޖާޒީގެ ފަހަތުގައި ޖަހައިފައި ހުންނަ ނަންބަރުގެ ތެރެއިން ފާޅުވާނީ އަރަބި ކެލިގްރަފީ ޑިޒައިނަކުން އަޅާފައިވާ "ޔުވެންޓަސް" އެވެ.

ޔުވެންޓަސްގެ ޗީފް ރެވެނިއު އޮފިސަރު ޖޯޖިއޯ ރިކީ ވިދާޅުވީ މި ޖާޒީން ދައްކުވައިދެނީ ދުނިޔޭގެ އެކި ކަންކޮޅުތަކުގައި ތިބި އެ ކްލަބްގެ ފޭނުންނާއި އެ ކްލަބުން ބާއްވަމުން އަންނަ ގާތްކަން ކަމަށާއި ޔުވެންޓަސްއިން ބޭނުން ވަނީ ސަގާފީ ފަންނުތައް ކުރިއަރުވަން ކަމަށެވެ.

އިޓާލިއަން ލީގުގެ ޗެމްޕިއަނުންގެ ހައިސިއްޔަތުން ޔުވެންޓަސް މި މެޗަށް ކުރިމަތިލާއިރު ލާޒިއޯއިން މި މެޗަށް ނިކުންނަނީ އިޓާލިއަން ކަޕްގެ ޗެމްޕިއަނުންގެ ހައިސިއްޔަތުންނެވެ.

މި މެޗު ކުޅުމަށް ހަމަޖެހިފައިވަނީ މިރޭ ރާއްޖެ ގަޑިން 9:45 ގައި ރިޔާދްގެ ކިންގް ސައުދް ޔުނިވަރސިޓީ ސްޓޭޑިއަމްގައެވެ. ނިމިދިޔަ އަހަރުގެ ސުޕަ ކަޕް ޔުވެންޓަސް އިން ކާމިޔާބުކުރީ އޭސީ މިލާން 1-0 ގެ ނަތީޖާ އަކުން ބަލި ކުރުމަށް ފަހުގައެވެ.