ރައީސް ނަޝީދުގެ މައްސަލައެއް އޭސީސީން ބަލަނީ
މަޖިލީހުން އެކަން ދޮގުކުރޭ
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލީހުގެ ހަރަދުގައި އެކްޓިވިސްޓުންނާއި ބައްދަލުކުރުމަށް ކުރެއްވި ދަތުރުފުޅެއްގެ މައްސަލަ އެއް އެންޓި ކޮރަޕްޝަން ކޮމިޝަން (އޭސީސީ) އަށް ހުށައަޅައިފި އެވެ.
އެކަމާއި ގުޅޭ ގޮތުން އޭސީސީގެ ރައީސް މަރިޔަމް ޝިއުނާ އަށް ގުޅާލުމުން ވިދާޅުވީ، އެފަދަ މައްސަލެއް އެ ކޮމިޝަނަށް ހުށައެޅިފައިވާ ކަމަށާއި، އެކަން ބަލަމުންދާނެ ކަމަށެވެ. އަދި އެކަމުގެ ތަފްސީލު ފަހުން ހާމަކުރައްވާނެ ކަމަށް ވިދާޅުވއެވެ.
އެނގިފައިވާގޮތުން އޭސީސީއަށް ހުށައަޅާފައިވަނީ ދެކުނުގެ އަތޮޅު ތަކުގައި ކައުންސިލަރުންނަށް ހާއްސަކޮށްގެންގައި ބޭއްވި މަހާސިންތާގައި އެކްޓިވިސްޓުންނާއި ބައްދަލުކުރައްވަން ވަޑައިގެންނެވި މައްސަލަ އެވެ. ނަމަވެސް މަޖިލީހުން ވަނީ އެވާހަކަތައް ދޮގުކޮށްފައެވެ.
މަޖިލީހުގެ މީޑިއާ އެންޑް ކޮމިއުނިކޭޝަންސް ޑިރެކްޓަރ ހަސަން ޒިޔާއު ރާއްޖެ.އެމްވީ އަށް ވިދާޅުވީ، އެ ދަތުރަކީ ދެކުނު މަހާސިންތާގައި ބައިވެރިވެ ވަޑައިގަތުމަށް މަޖިލީހުގެ ރައީސްގެ ހައިސިއްޔަތުން ނަޝީދު ކުރެއްވި ދަަތުރުފުޅެއް ކަމަށެވެ. އަދި އެ މާހަސިންތާއަށްފަހު ނަޝީދު އައްޑޫއަށާއި ފުވައްމުލަކަށް ވަޑައިގެންނެވީ އެމަނިކުފާނުގެ އަމިއްލަ ހަރަދުގައި ކަމަށް ޒިޔާއު ވިދާޅުވިއެވެ.
ރައީސް ނަޝީދުގެ މައްސަލަ އެއް އޭސީސީ އަށް ހުށައެޅިފައިވާއިރު، ރައީސް އިބްރާހިމް މުހައްމަދު ސޯލިހުއާ ޑިފެންސް މިނިސްޓަރު މާރިޔާ އަހުމަދު ދީދީ ހިމެނޭ ގޮތަށް މީގެ ކުރިންވެސް އަމިއްލަ ފަރާތަކުންވެސް ވަނީ އޭސީސީ އަށް މައްސަލަތަކެއް ހުށައަޅާފައެވެ.
