ބްރޯޑްކާސްޓިން ކޮމިޝަން (ބްރޯޑްކޮމް) ގެ ރައީސް މަރިޔަމް ވަހީދާ ސަރުކާރުގެ އިވެންޓެއް ހުށައަޅައި ދިނުމުން އިދިކޮޅުން ފާޑު ކިޔައިފިއެވެ.
ބްރޯޑްކޮމްގެ ރައީސް ހުށައަޅާދެއްވާފައިވަނީ, އަންގާރަ ދުވަހު ޓޫރިޒަމް މިނިސްޓްރީން އަލަށް ފަތުރުވެރިކަމަށް ރަށްތައް އިއުލާން ކުރުމަށް ދަރުބާރުގޭގައި ބޭއްވި "ބުރަބި" ޖަލްސާއެވެ.
ވަހީދާ ޝޯ ހުށައަޅާދެއްވާފައިވާތީ އެ ކޮމިޝަންގެ މިނިވަންކަމާއި މެދު ސުވާލު އުފައްދަވަމުން، އިދިކޮޅު ޕީއެންސްއަށް ނިސްބަތްވެ ވަޑައިގަންނަވާ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވީ، މިނިވަން މުއައްސަސާގެ ރައީސަކަށް ހުންނެވި ބޭފުޅަކު ސަރުކާރުގެ ޝޯއެއް ހުށަައަޅައިދިނުމުން އެ މުއައްސަސާގެ މިނިވަން ކަމާއި މެދު ރައްޔިތުންގެ މެދުގައި ސުވާލު އުފެދޭ ކަމަށެވެ.
ކުރީ ސަރުކާރުގައި، ބްރޯޑްކޮމް މެމްބަރުން އޭރުގެ ސަރުކާރުން ބާއްވާ ހަފްލާތުގައިއާއި ސަރުކާރަަށް ތާއިދު ހޯދުމުގެ ގޮތުން ބޭއްވި ކެމްޕޭނު ތަކުގައި ބައިވެރިވާތީވެ އޭރު އިދިކޮޅުގައި އޮތް އެމްޑީޕީން ފާޑުކިޔާތީވެ އެކަމަށް ރައްދު ދެއްވަމުން އާދަމް ޝަރީފް ވިދާޅުވީ، މިހާރު ސަރުކާރުންވެސް ކުރަމުންދަނީ ހަަމަ އެކަން ކަމަށެވެ.
މަރިޔަމް ވަހީދާއަކީ ދާދި ފަހުން ބްރޮޑްކާސްޓިންގ ކޮމިޝަނަށް އައްޔަނުކުރި ތިން މެމްބަރުންގެ ތެރެއިން އެއް ބޭފުޅެކެވެ. މަރިޔަމް ވަހީދާއަކީ ގިނަ ދުވަސްތަކެއް ވަންދެން މީޑިއާގައި މަސައްކަތްކުރައްވާފައިވާ، އަދި ގިނަ ޝޯތަކެއް ހޯސްޓް ކުރައްވާފައިވާ ތަޖުރިބާކާރެކެވެ.
