މޯލްޑިވިއަންއިން އައްޑޫ އާއި ހުވަދޫއާ ދޭތެރޭ ސީދާ ދަތުރު ފަށަނީ
14 ޑިސެމްބަރު 2019 | ހޮނިހިރު 07:43ޗުއްޓީއަށް ދިމާކޮށް މޯލްޑިވިއަނުން ޝެޑިއުލް ފްލައިޓްތައް އިތުރުކޮށްފައިވޭ
މޯލްޑިވިއަންގެ ފްލައިޓެއް
ގައުމީ އެއަރލައިން މޯލްޑިވިއަންއިން އައްޑޫ އާއި ހުވަދޫއާ ދޭތެރޭ ސީދާ ދަތުރުތައް ފެށުމަށް ހަމަޖެހިފައިވާ ކަމަށް އެކުންފުނިން ބުނެފިއެވެ.
އެކަމާއި ގުޅޭގޮތުން މޯލްޑިވިއަން އިން ކުރި ޓްވީޓެއްގައި ބުނީ، 15 ޑިސެމްބަރު ވާ އާދިއްތަ ދުވަހުން ފެށިގެން އައްޑޫ އާއި ހުވަދޫއާއި ދެމެދު މޯލްޑިވިއަންގެ ޝެޑިއުލް ފްލައިޓްތައް ފެށިގެންދާނެ ކަމަށެވެ.
އޭގެ އިތުރުން، ބޮޑު ޗުއްޓީއާ ދިމާކޮށް މޯލްޑިވިއަނުން ޝެޑިއުލް ފްލައިޓްތައް އިތުރު ކޮށްފައިވާއިރު، ބައެއް ފްލައިޓްތަކުން އެންމެ އަގު ހެޔޮ ފެއަރ ވެސް ވަނީ ތަޢާރަފު ކޮށްފައެވެ. އެގޮތުން ޖުމްލަ ހަތް ސެކްޓަރއަށް މި ފެއަރތަކުގައި ފްލައިޓްތައް އިތުރު ކޮށްފައިވެއެވެ.
ބޮޑު ޗުއްޓީއަށް ރާއްޖެއިން ބޭރަށް ދާ ފަރާތްތައްވެސް އިތުރުވެފައިވާއިރު، މޯލްޑިވިއަނުން ދަނީ އިންޑިއާގެ ތްރިވަނަންތަޕޫރަމާއި، ޗެންނާއި އަދި ބަންގްލަދޭޝް ފަދަ ޤައުމުތަކަށް ދަތުރު ކުރަމުންނެވެ. ރާއްޖޭގެ ހުރިހާ ވައިގެބަނދަރަކަށް ދަތުރުކުރާ ހަމައެކަނި އެއަރލައިންއަކީވެސް މޯލްޑިވިއަންއެވެ.
