މާފަރު އެއަރޕޯޓްގައި ވަރަށް އަވަހަށް ސީޕްލޭންގެ ހިދުމަތްދޭން ފަށާނަން: ރިޒްވީ

ނ. މާފަރު އިންޓަރނޭޝަނަލް އެއަރޕޯޓުގައި ވަރަށް އަވަހަށް ސީޕްލޭންގެ ޚިދުމަތް ފެށިގެންދާނެ ކަމަށް އައިލެންޑް އޭވިއޭޝަންގެ މެނޭޖިންގ ޑިރެކްޓަރ މުހައްމަދު ރިޒްވީ ވިދާޅުވެއްޖެއެވެ.

ނ. މާފަރު އެއަރޕޯޓް ހުޅުވުމުގެ ރަސްމިއްޔާތު ނިންމަވާލެއްވުމަށްފަހު ޑިސެމްބަރު އެއްވަނަ ދުވަހު ނޫސްވެރިންނަށް ދިން އިންޓަވިއުގައި ރިޒްވީ ވިދާޅުވީ ސީޕްލޭންގެ ހިދުމަތް ފެށުމަށްޓަކައި މިހާރު ކުރަންޖެހޭ ހުރިހާ މަސައްކަތެއް ކުރަމުންދާ ކަމަށެވެ. އަދި މީގެ އިތުރުން އެއަރޕޯޓުގައި ޓްރެއިނިންގ ފެސިލިޓީތަކެއް ޤާއިމުކުރުމުގެ މަސައްކަތް ފެށިގެންދާނެ ކަމަށް ވެސް ރިޒްވީ ވިދާޅުވިއެވެ. އެގޮތުން ޕައިލެޓް ޓްރެއިނިންގ ސުކޫލަކާއި އިންޖިނިއަރިންގ އެމްއާރްއޯ ފެސިލިޓީއެއް ޤާއިމުކުރެވިގެންދާނެ ކަމަށް އޭނާ ވިދާޅުވިއެވެ.

ރިޒްވީ އިތުރަށް ވިދާޅުވީ އެއަރޕޯޓުގެ ދަތުރުތައް ފެށުމާއެކު ޕްރައިވެޓް ޖެޓުތައް ޖެއްސުމަށް ރިކުއެސްޓްތައް އައިސްފައިވާ ކަމަށާއި ޖެޓުތަކަށް ބޭނުންވާ ޚިދުމަތްތައް ޤާއިމު ކުރެވިފައިވާ ކަމަށެވެ.

ނ. މާފަރު އެއަރޕޯޓް ހުޅުވާ ޝެޑިއުލް ފްލައިޓުތައް ފަށާފައިވާއިރު މޯލްޑިވިއަން އިން މާލެއިން މާފަރަށް ދަތުރުތައް ކުރުމަށް ނިންމާފައިވަނީ ދުވާލަކު ތިން ފްލައިޓެވެ. އެހެންނަމަވެސް މިމަހުގެ މެދުތެރޭގައި މަދުވެގެން ދުވާލަކު 6 ފްލައިޓް އޮޕަރޭޓް ކުރާނެ ކަމަށް މޯލްޑިވިއަން އިން މައުލޫމާތުދެއެވެ.

މާފަރު އެއަރޕޯޓު ތަރައްޤީކުރުމުގެ މަޝްރޫއަށް ޖުމުލަ 60 މިލިއަން ޑޮލަރު ޚަރަދުވިއެވެ. މިއީ އަބޫދާބީ ހިލޭ އެހީގެ ދަށުން ހިންގި މަޝްޜޫޢެކެވެ. އެއަރޕޯޓު ތަރައްޤީކޮށްފައިވަނީ، އެންމެ ބޮޑެތި މަތިންދާ ބޯޓުތައް ކަމަށްވާ އެއަރ ބަސް އޭ 320 އާއި، ބޮއިން 737 މަރުކާގެ ބޯޓު ފަހަރު ޖެއްސޭ ފެންވަރަށެވެ.