"ބާސެލޯސް" އަށް ބޮޑު ތަރުހީބެއް ލިބޭ، ވަރަށް ބާރުބޮޑުކޮށް ދަނީ: ބާސެލޯސް ރެސްޓޯރެންޓް
•އެކި ގައުމުތަކުގައި 100 އަށްވުރެ ގިނަ ތަން ހުރޭ
"ބާސެލޯސް": ކުކުޅުން ތައްޔާރު ކުރާ ބާވަތްތަކަށް ހާއްސަ ރެސްޓޯރެންޓެއް
ދެކުނު އެފްރިކާގެ، އިންޓަނޭޝަނަލް ފްރެންޗައިޒް ބްރޭންޑް "ބާސެލޯސް" ގެ ރެސްޓޯރެންޓެއް މާލޭގައި ހުޅުވައިފި އެވެ.
ނޫރާނީމަގު، ހ. ތިނޫނު (މުލީއާގެ) ކައިރީގައި ހުޅުވި "ބާސެލޯސް" ރެސްޓޯރެންޓުގެ މެނޭޖަރު އަލީ ހުސެއިން ވިދާޅުވީ މި ރެސްޓޯރެންޓަކީ ކުކުޅުން ތައްޔާރުކޮށްފައިވާ އެކި ކެއުންތަކަށް ހާއްސަ ތަނެއް ކަމަށެވެ.
ކުކުޅު ބޭނުންކޮށްގެން ތައްޔާރުކޮށްފައިވާ ކެއުންތަކަށް ހާއްސަ މިތަނުގެ ކެއުންތަކުގެ ރަހަ މީރުކޮށްދޭން "ޕެރީޕެރީ" ގެ ނަމުގައި ހާއްސަ ސޯސްއެއް ހުރެ އެވެ.
"ރާއްޖޭގައި ފްރެންޗައިޒް އެބަހުރި. އެކަމަކު މިތަން ތަފާތު ވާނެ. މިތަނުގައި މި ހުންނަނީ ކުކުޅު ބޭނުންކޮށްގެން ތައްޔާރު ކުރި ބާވަތްތައް. އެހެންވެ ވަރަށް ބާރު ބޮޑު. އަނެއްކާ މި ތަން މި ހުންނަނީ އެންމެ ރަނގަޅު އެއް ލޮކޭޝަންގައި. އޮފީސްތައް ކައިރިވުމުން ވަރަށް ގިނަ ބަޔަކު އާދެ. ހެނދުނުން ފެށިގެން ގާތްގަނޑަކަށް ފުލްކޮށް މި އޮންނަނީ." އަލީ ވިދާޅުވި އެވެ.
މި ރެސްޓޯރެންޓުގައި 12 މުވައްޒަފުން މަސައްކަތް ކުރާއިރު، ގިނައީ ދިވެހިންނެވެ.
ބާސެލޯސް ރެސްޓޯރެންޓު ހުޅުވާފައިވާއިރު މުސްތަގުބަލުގައި މި ތަނުން ޑެލިވަރީގެ ހިދުމަތް ދިނުމަށް ވެސް ދަނީ ތައްޔާރު ވަމުންނެވެ. ނަމަވެސް މިހާރު ވެސް މިތަނުން ޓޭކްއަވޭ ހެދެ އެވެ. އަދި މި ރެސްޓޯރެންޓުގައި އެއް ފަހަރާ 68 މީހުންނަށް ޙިދުމަތް ދެވެއެވެ.
ބާސެލޯސްއަކީ 1993 ވަނަ އަހަރު ދެކުނު އެފްރިކާގައި ހުޅުވި ތަނެކެވެ. މިހާރު މި ރެސްޓޯރެންޓުތައް އެފްރިކާގެ ގިނަ ގައުމުތަކާއި މެދުއިރުމަތި އަދި އާސިއާންގެ ގައުމުތަކާއި ޔޫރަޕުގައި ވެސް ހިންގަ އެވެ. ރެސްޓޯރެންޓުގެ އަދަދު 100 އަށް ވުރެ ގިނަ އެވެ.
