ޕޯޓް ކްލިނިކެެއް ވަރަށް އަވަހަށް ހުޅުވާނަން: ޖުނައިދު

ނޯތު ހަބަރު ސަރަހައްދުގައި ވަރަށް އަވަހަށް ބޭސްފަރުވާދޭ ޕޯޓް ކްލިނިކެއް ހުޅުވުމަށްޓަކައި ކަމާ ބެހޭ ފަރާތްތަކާ މަޝްވަރާ ކުރަމުންދާ ކަމަށް އެމްޕީއެލްގެ ސީއީއޯ މުހައްމަދު ޖުނައިދު ވިދާޅުވެއްޖެ އެވެ.

ރާއްޖެއެމްވީއަށް ދެއްވި ޚާއްސަ އިންޓަވިއުގައި ޖުނައިދު ވިދާޅުވީ އެމްޕީއެލްއިން ސަރަހައްދުގައި ދުވާލަކަށް ތިންހާހާއި ހަތަރު ހާހާ ދެމެދުގެ އަދަދަކަށް މީހުން ޚިދުމަތް ހޯދަމުންދާއިރު ކްލިނިކްގެ ޚިދުމަތަކީ ވަރަށް ވެސް ބޭނުންތެރި މުހިއްމު ޚިދުމަތެއް ކަމަށެވެ.

އެގޮތުން އެސަރަހައްދުގައި މަސައްކަތްކުރާ މަޖޫރީން ފަދަ ގިނަ ވަގުތު މަސައްކަތްކުރާ ފަރާތްތަކަށް ލިބޭ ކުދި ކުދި އަނިޔާތަކަށް އަވަސް ފަރުވާ ލިބުމަކީ މުހިއްމު ކަމެއް ކަމަށް ޖުނައިދު ވިދާޅުވި އެވެ.

ޖުނައިދު ވިދާޅުވީ ކަމާބެހޭ ފަރާތްތަކުން ހުއްދަ ލިބުނުހާ އަވަހަކަށް އެސަރައްދުގައި ޕޯޓް ކްލިނިކެއް ހުޅުވާނެ ކަމަށާއި އެކަމާ ބެހޭ މަޝްވަރާތައް ކުރިއަށްދާ ކަމަށެވެ.

މީގެ އިތުރުން ޖުނައިދު ވިދާޅުވީ އެމްޕީއެލްގެ މުވައްޒަފުންގެ ތަމްރީނާއި ހުނަރު އިތުރު ކުރުމަށް ޓްރެއިނިން ސެންޓަރެއް ހަދައި ނިންމާފައިވާ ކަމަށާއި މި ޓްރެއިނިން ސެންޓަރުގައި ރާއްޖޭން ބޭރުގެ ލެކްޗަރަރއިން ވެސް ކިޔައިދެއްވާނެ ކަމަށެވެ.

ތަފާތުގެ ފިކުރުގެ މުވައްޒަފުން މަސައްކަތް ކުރި ކަމުގައިވީ ނަމަވެސް ހުރިހާ މުވައްޒަފުންނަކީ ހަމަހަމަ ބައެއް ކަމަށާއި އެއްވެސް މުވައްޒަފަކު ތަފާތު ނުކުރާނެ ކަމަށް ޖުނައިދު ވިދާޅުވި އެވެ.