ނޭޕާލުގައި މިހާރު ކުރިޔަށްދާ 13 ވަނަ ސައުތު އޭޝިއަން ގޭމްސްގެ ޓޭބަލް ޓެނިސް މިކްސް ޑަބަލްސް އިވެންޓުން އިންޑިއާގެ އަމްރާޖް އަދި އަހީކާގެ ޕެއަރ އާއި ވާދަކޮށް ރާއްޖޭގެ ޒީސްތު ނަސީމް އަދި އައިޝަތު ރަފާ ނާޒިމުގެ ޕެއާ ބަލިވެ މުބާރާތުން ކަޓައިފިއެވެ.

ނޭޕާލުގެ ކަތަމަންޑޫގެ ނެޝަނަލް ޓޭބަލް ޓެނިސް ހޯލުގައި ކުޅުނު ކުއާޓަރ ފައިނަލް މެޗުން ޒީސްތު އަދި ރަފާގެ ޕެއަރ ބަލިވީ ސީދާ 4 ސެޓުންނެވެ.

މެޗުގެ ފުރަތަމަ ދެ ސެޓު އިންޑިއާގެ އަމްރާޖް އަދި އަހީކާގެ ޕެއަރއިން ފަސޭހަ ކަމާއި އެކު ކާމިޔާބުކުރި އިރު، މި ދެ ސެޓުގައި ޒީސްތު އަދި ރަފާގެ ޕެއަރ ފަރާތުން ފެނިގެންދިޔައީ އާދައިގެ ކުޅުމެކެވެ. މި ދެ ސެޓު އިންޑިއާގެ ޕެއަރ އިން ގެންދިޔައީ 3-11 އަދި 5-11 އިންނެވެ.

މެޗުގެ ތިންވަނަ ސެޓުގައި ވާދަވެރި ކުޅުމެއް ފެނިގެންދިޔައިރު މި ސެޓު އިންޑިއާގެ ޕެއަރ އިން ކާމިޔާބުކުރީ 8-11 އިންނެވެ. އަދި މި މެޗުގެ ފަހު ސެޓު އިންޑިއާގެ ޕެއަރއިން ކާމިޔާބު ކުރީ 7-11 އިންނެވެ.

ޒީސްތު އަދި ރަފާގެ ޕެއަރ ކުއާޓާ އަށް ދަތުރުކުރީ މުބާރާތް ބާއްވާ ގައުމު ނޭޕާލުގެ ޝިވީޝަދަރު އަދި ޝިކާގެ ޕެއަރ ހަތަރު ސެޓު ދެ ސެޓުން ބަލިކޮށްގެންނެވެ.

މި މުބާރާތުގެ އަންހެން ޑަބަލްސް ކުއާޓަރ ފައިނަލުން ވެސް ރާއްޖޭގެ ދީމާ އަދި ރަފާގެ ޕެއަރ ވަނީ ބަލިވެފައެވެ. ޓީޓީގައި ދުނިޔޭގެ ފެންވަރުގައި ފާހަގަކޮށްލެވޭ ގައުމު އިންޑިއާގެ ސްރީޖާ އަދި މަދުރިކާގެ ޕެއަރ އިން ރަފާ އަދި ދީމާގެ ޕެއަރގެ މައްޗަށް ކުރި ހޯދީ ހަތަރު ސެޓު ދެ ސެޓުންނެވެ.