އީރާނުގެ ރައީސް: އެމެރިކާއިން އީރާނަށް ކުރިމަތިކުރަމުންދާ ފިއްތުންތައް ނުރައްކާތެރި އަދި ނާޒުކު މަރުހަލާއަކަށް ހިނގައްޖެ
11 ސެޕްޓެމްބަރު 2026 | ހުކުރު 14:33އެމެރިކާއާއި އިސްރާއީލުން އީރާނަށް ކުރިމަތިކުރާ އަސްކަރީ އަދި އިގްތިސާދީ ފިއްތުންތަކުގެ ސަބަބުން މުޅި ސަރަހައްދުގެ މަސްލަހަތު ގެއްލި، ހަކަތައިގެ ބާޒާރަށް ނޭދެވޭ އަސަރުކުރަމުންދާ ކަމަށް ރައީސް ޕެޒެޝްކިއާން ވިދާޅުވެއްޖެ. އިންޑިއާއަށް ކުރައްވާ ދަތުރުފުޅުގައި އެމަނިކުފާނު ވަނީ ބޮޑުވަޒީރު މޯދީއާ ބައްދަލުކުރައްވައި، ދުނިޔެއަށް ކުރިމަތިވެފައިވާ ނާޒުކު ހާލަތާ ގުޅޭގޮތުން މަޝްވަރާކުރެއްވުމަށް ނިންމަވާފައި
އީރާންގެ ރައީސް ޑރ. މަސްއޫދު ޕެޒެޝްކިއަން، ބްރިކްސްގެ އިސްވެރިންގެ ސަމިޓުގައި ބައިވެރިވެވަޑައިގަތުމަށްޓަކައި އިންޑިއާގެ ނިއުދިއްލީއަށް ވަޑައިގަންނަވަނީ | އީރާން އިން އިންޑިއާ
އެމެރިކާއިން އީރާނަށް ކުރިމަތިކުރަމުންދާ ފިއްތުންތައް ނުރައްކާތެރި އަދި ނާޒުކު މަރުހަލާއަކަށް ގޮސްފައިވާ ކަމަށް އެގައުމުގެ ރައީސް މަސްޢޫދު ޕެޒެޝްކިއާން ހުކުރު ދުވަހު ވިދާޅުވެއްޖެ އެވެ.
ބްރިކްސް (BRICS) ސަމިޓުގެ ކުރިން އިންޑިއާގައި ވާހަކަފުޅު ދައްކަވަމުން ޕެޒެޝްކިއާން ވިދާޅުވީ، މިއަދު ދުނިޔެ މިދަނީ މީގެ ކުރިން ދުވަހަކުވެސް ކުރިމަތިނުވާ ފަދަ އޮޅުންބޮޅުން ބޮޑު ދުވަސްވަރެއް ތަހައްމަލު ކުރަމުން ކަމަށެވެ. އަދި އިގްތިސާދީ ގޮތުން ދަތިކުރުމުގެ ފިޔަވަޅުތައް ބޭނުންކުރުމަކީ މި ހާލަތު އިތުރަށް ގޯސްވެގެންދާ ކަމެއްގެ ގޮތުގައި އެމަނިކުފާނު ސިފަކުރެއްވި އެވެ.
ޕެޒެޝްކިއާން ވިދާޅުވީ ފާއިތުވި އަހަރުތަކުގައި އީރާނާ ދެކޮޅަށް ވަރުގަދަ ދަތިކުރުމުގެ ފިޔަވަޅުތަކެއް އަޅާފައިވާ ކަމަށެވެ. އަދި އެމެރިކާއާއި އިސްރާއީލުން ދިން އަސްކަރީ ހަމަލާތަކާ ގުޅިގެން، ފާއިތުވި މަސްތަކުގައި މި ފިއްތުންތައް ނުރައްކާތެރި އަދި ނާޒުކު ދަރަޖައަކަށް އުފުލިފައިވާ ކަމަށްވެސް އެމަނިކުފާނު ވިދާޅުވި އެވެ.
މެދުއިރުމަތީގެ ހަނގުރާމަ ފެށިގެންދިޔައީ ފެބްރުއަރީ މަހުގެ ފަހުކޮޅު އެމެރިކާއާއި އިސްރާއީލުން އީރާނަށް ދިން ހަމަލާތަކާ ގުޅިގެންނެވެ. އޭރުވެސް އެތައް އަހަރަކަށް ދެމިގެންދިޔަ ބައިނަލްއަގުވާމީ ދަތިކުރުމުގެ ފިޔަވަޅުތަކުގެ ސަބަބުން އީރާނުގެ އިގްތިސާދު އޮތީ ވަރަށް ބޮޑަށް ބަލިކަށިވެފަ އެވެ.
އެ ހަމަލާތަކުގެ ބަދަލުހިފުމުގެ ގޮތުން އީރާނުން ވަނީ ހަކަތަ އުފުލާ މައި މަގު ކަމަށްވާ "ސްޓްރެއިޓް އޮފް ހުރްމުޒް" ބަންދުކޮށްފަ އެވެ. މީގެ ސަބަބުން ދުނިޔޭގެ ބާޒާރުގައި ހަކަތައިގެ އަގުތައް ވަނީ ވަރަށް ބޮޑަށް އުފުލިފަ އެވެ.
ޕެޒެޝްކިއާން ވިދާޅުވީ ގައުމެއްގެ ވިޔަފާރިއާއި، ހަކަތައާއި، އުމްރާނީ ވަސީލަތްތަކުގެ އިތުރުން މާލީ ނިޒާމަށް ސިޔާސީ އަދި އަސްކަރީ ގޮތުން ފިއްތުންތައް ކުރިމަތިކުރުމުން، އޭގެ ނޭދެވޭ އަސަރުތައް އެ ގައުމުގެ ބޯޑަރުން ބޭރަށް، މުޅި ސަރަހައްދަށް ފެތުރިގެންދާ ކަމަށެވެ.
އީރާންގެ ރައީސް އިންޑިއާގެ ބޮޑުވަޒީރުއާ ބައްދަލު ކުރައްވަނީ
އީރާނުގެ ރައީސް އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅުގައި، ހުކުރު ދުވަހުގެ ވަގުތެއްގައި އިންޑިއާގެ ބޮޑުވަޒީރު ނަރެންދުރަ މޯދީއާ ބައްދަލުކުރައްވައި ދެ ގައުމުގެ ދެމެދުގައި ރަސްމީ މަޝްވަރާތައް ވަނީ ބާއްވަވާފަ އެވެ.
މަސްދަރު: އޭއެފްޕީ
