އެސްކްރޯ އެއްބަސްވުމާ ޙިލާފު ނުވީނަމަ ރައީސް ޔާމީންއަށް ހުކުމް ނުކުރެވުނީސް!
29 ނޮވެމްބަރު 2019 | ހުކުރު 12:05އެސްކްރޯ އެކައުންޓަށް ޖަމާކުރެެއްވީ އެހެން ފައިސާއެއްކަމަށް ރައީސް ޔާމީން އިއުތިރާފްވެވަޑައިގެންނެވި
ރައީސް ޔާމީން ހުކުމް އިއްވުމުގެ ޝަރީއަތަށް ވަޑައިގަންނަވަން ނިކުމެވަޑައިގަތް ވަގުތު
އެންޓި ކޮރަޕްޝަން ކޮމިޝަން (އޭސީސީ) އާއި ރައީސް ޔާމީންއާ ދެމެދު ވެވުނު އެއްބަސްވުމާ އެއްގޮތަށް އަމަލުކުރެއްވި ނަމަ، އެމަނިކުފާނުގެ މައްޗަށް ދައުވާ ސާބިތު ނުވީސްކަން ހާމަވެއްޖެއެވެ.
ބުރާސްފަތި ދުވަހު ކްރިމިނަލް ކޯޓުން ކުރި ހުކުމްގެ ތަފްސީލަށް ބަލާއިރު، ދައުވާގެ ބިނާވެފައި އޮތީ މި އެއްބަސްވުމާ ހިލާފުވެވަޑައިގަތުމުން ކަން ފާހަގަކުރެވެއެވެ. އަދި އޭސީސީއާ އެކު ވެވުނު އެސްކްރޯ އެއްބަސްވުމާއި އެއް ގޮތަށް، އިސްލާމިކް ބޭންކް އެކައުންޓުގައި ހުރި ފައިސާ ބީއެމްއެލްގައި ހުޅުވި އެސްކްރޯ އެކައުންޓަށް ޖަމާކުރިނަމަ އެ ފައިސާ ލޯންޑަރ ކުރުމުގެ ދައުވާ ރައީސް ޔާމީންގެ މައްޗަށް ސާބިތުވުން ނާދިރެވެ.
ކްރިމިނަލް ކޯޓުން ނެރެފައިވާ ހުލާސާ ބަޔާނަށް ބަލާއިރު، ރައީސް ޔާމީންގެ މައްޗަށް އުފުލި ދައުވާގައި ކުށެއްގެ ގޮތުގައި ބަޔާންކޮށްފައިވާ މަނީ ލޯންޑަރ ކުރުމުގެ ކުށުގެ އުންސުރުތައް ހަމަވެފައިވަނީ، އެ ފައިސާގެ ބަދަލުގައި އެހެން ފައިސާތަކެއް އެ އެކައުންޓަށް ޖަމާކުރުމުންނެވެ. އޭސީސީން އެ ފައިސާއަކީ، އެމްއެމްޕީއާރްސީގެ ހިޔާނާތުގެ ފައިސާކަމަށް ޝައްކު ކުރެވޭ ކަމަށް ބުނެ ރައީސް ޔާމީންއާ އެކު ވެވުނު އެއްބަސްވުމުގައި އޮތް ގޮތަށް އަމަލުކުރެއްވިނަމަ، މި އުންސުރުތައް ފުރިހަމަ ނުވީހެވެ.
އޭސީސީއާއެކު ވެވުނު އެއްބަސްވުމާ އެއްގޮތަށް އަމަލު ނުކުރައްވާ، ރައީސް ޔާމީން ގެންދެވީ އިސްލާމިކް ބޭންކުގައި ހުޅުވާފައިވާ ޖެނެރަލް އިންވެސްޓްމަންޓް ޕްލަސް އެކައުންޓުގައި އެ ފައިސާ ބަހައްޓައިގެން އެއިން މަންފާ ނަގަމުންނެވެ. ރައީސް ޔާމީން އެސްކްރޯ އެކައުންޓަށް ޖަމާކުރެއްވީ އެ މަނިކުފާނުގެ ޒައާމަތުގައި ޓޫރިޒަމް މިނިސްޓަރުކަން ކުރެއްވި މޫސާ ޒަމީރު އަތުން ނެންގެވި ފައިސާއެވެ.
ހުކުމުގައި ބަޔާންކޮށްފައިވާ ގޮތުގައި، އެ ފައިސާ ނަގުލުކުރަން އެއްބަސްވި އެކައުންޓަށް ނަގުލުނުކޮށް، އެހެން މީހެއްގެ އަތުން ހޯދިި ފައިސާތަކެއް ޖަމާކުރުމުން، ކުށް ކޮށްގެން ހޯދާފައިވާ ފައިސާ ކަމަށް ބެލެވޭ ފައިސާ އަތުގައި ބެހެއްޓިކަމާއި، އެއިން މަންފާނެގިކަމާއި، އޭގެ އަސްލު އޮޅުވާލިކަމަށް ނުބެލެވޭނެ ގޮތެއް ނެތް ކަމަށެވެ.
އެސް.އޯ.އެފްގެ އެކައުންޓުން ރައީސް ޔާމީންގެ އެކައުންޓަށް މި މައްސަލައިގައި ހިމެނޭ އެއް މިލިއަން ޑޮލަރު ޖަމާކޮށްފައިވަނީ، ދެ ޗެކަކުން 13 އޮކްޓޫބަރު 2015 އަދި 15 އޮކްޓޫބަރު 2015 ގައެވެ. މި މައްސަލައިގައި ހިމެނޭ ގއ.ވޮޑަމުލާގެ އެކުއިޒިޝަން ފީ ގެ ގޮތުގައި ދެއްކި އެއް މިލިއަން ޑޮލަރު އެސް.އޯ.އެފްގެ އެކައުންޓަށް ޖަމާވެފައިވަނީ، 11 އޮކްޓޫބަރު 2015 ގައެވެ.
ރައީސް ޔާމީންގެ އެކައުންޓަށް ޖަމާވި ފައިސާއަކީ، އެމްއެމްޕީއާރްސީގެ ހިޔާނާތުގެ ތެރެއިން ކުށްކޮށްގެން ހޯދާފައިވާ ފައިސާކަމަށް ބެލެވޭތީ، އެ ފައިސާ ދައުލަތާ ހަވާލުކުރަން އެދި އޭސީސީން ރައީސް ޔާމީންއަށް އަންގާފައިވަނީ 21 ފެބްރުއަރީ 2018 ގައެވެ. އަދި އެ ފައިސާ އެސްކްރޯ އެކައުންޓަށް ޖަމާކުރުމަށް ރައީސް ޔާމީންއާއި އޭސީސީއާ ދެމެދު އެއްބަސްވެވުނީ، 25 މަރޗް 2018 ގައެވެ.
އެސްކްރޯ އެއްބަސްވުމުގައި ބަޔާންކޮށްފައިވާ ފައިސާނޫން އެހެން ފައިސާއެއް އެސްކްރޯ އެކައުންޓަށް ޖަމާކުރެވުނު ސަބަބު ޝަރީއަތުގައި ބަޔާންކުރައްވަމުން ރައީސް ޔާމީން ވިދާޅުވީ، އެއީ އިސްލާމިކް ބޭންކުގައި އެސްކްރޯ އެކައުންޓް ހުޅުވަން އޭސީސީން ދެކޮޅު ހެދުމުން ކަމަށެވެ. އޭސީސީން އެދިފައިވަނީ ބީއެމްއެލްގައި އެސްކްރޯ އެކައުންޓެއް ހުޅުވާފައި އެ ފައިސާ ބެހެއްޓުމަށެވެ.
ރައީސް ޔާމީން އެ ދުވަހުގެ ޝަރީއަތުގެ މަޖިލީހުގައި ވިދާޅުވީ، ފައިސާ އެސްކްރޯ ކޮށްފައި ބެހެއްޓިދާނެކަމަށް އޭސީސީއަށް ދެންނެވީވެސް ތިމަން މަނިކުފާނު ކަމަށެވެ. އަދި އެނޫން ފައިސާއެއް ޖަމާކުރީ، އޭސީސީން ފުރަތަމަ ފޮނުވި ސިޓީގައި މޯލްޑިވްސް އިސްލާމިކް ބޭންކުގައި ހުރި ފައިސާގައި އަތް ނުލުމަށް އެދިފައި އޮތުމުން ކަމަށްވެސް ރައީސް ޔާމީން ވިދާޅުވިއެވެ.
ނަމަވެސް، ދެ ފަރާތުގެ މެދުގައި ވެވުނު އެސްކްރޯ އެއްބަސްވުމުގައި ވަނީ، އިސްލާމިކް ބޭންކުގައި ހުރި އެސްކްރޯ އެކައުންޓަށް ޖަމާކުރުމަށެވެ. އަދި މި އެއްބަސްވުމުގައި ސޮއިކުރެއްވި ކަމަށް ރައީސް ޔާމީން ވަނީ ޝަރީއަތުގެ މަޖިލީހުގައި އިއުތިރާފްވެވަޑައިގެންފައެވެ.
