ކުރީގެ ރައީސް ޢަބްދުﷲ ޔާމީނުގެ މައްޗަށް ދައުލަތުން އުފުލާފައިވާ މަނީ ލޯންޑަރިންގެ ދަޢުވާ އެމަނިކުފާނުގެ މައްޗަށް ސާބިތުވެ 5 އަހަރަށް ޖަލަށްލައި ފަސް މިލިއަން ޑޮލަރުން ޖޫރިމަނާ ކުރުމަށް ކުރި ޙުކުމް އިސްތިޢުނާފްގެ މަރުޙަލާގައި ޤާނޫނީ ގޮތުން ދެވެން ހުރި ހުރިހާ އެހީތެރިކަމެއްދޭނެ ކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ރައީސް ޔާމީން ޖަލަށް ލުމަށް ޙުކުމްކުރުމާއެކު ޑރ. ޝަހީމް ފޭސްބުކްގައި ކުރި ޕޯސްޓެއްގައި ވިދާޅުވީ ރައީސް ޔާމީން މިނިވަން ކުރަންޖެހޭ ކަމަށާއި، އެމަނިކުފާނު މިނިވަން ކުރުމަށް ޤާނޫނީ ގޮތުން ކުރެވެން ހުރި ހުރިހާ މަސައްކަތާއި، އެހީތެރިކަމާއި، އަދި އެއްބާރުލުންދޭނެ ކަމަށެވެ.
ޕީޕީއެމްގެ އެންމެހާ މެމްބަރުންނާއި ލީޑަރޝިޕް ސާބިތު ކަމާއެކު ރައީސް ޔާމީނާ އެކު ދެމިތިބުމަށް ޑރ.ޝަހީމް ވަނީ ގޮވާލައްވާފައެވެ.
ރައީސް ޔާމީނުގެ މައްޗަށް ދައުލަތުން އުފުލާފައިވާ މަނީ ލޯންޑަރިންގެ ދަޢުވާ އެމަނިކުފާނުގެ މައްޗަށް ސާބިތުވެ 5 އަހަރަށް ޖަލަށްލައި ފަސް މިލިއަން ޑޮލަރުން ޖޫރިމަނާ ކުރުމަށް ޙުކުމްކުރީ ބުރާސްފަތި ދުވަހުއެވެ.
ދައުލަތަށް ދައްކަންޖެހޭ 5 މިލިއަން ޑޮލަރު 6 މަސް ދުވަހުގެ ތެރޭގައި އިންލަންޑް ރެވެނިއު އޮތޯރިޓީ (މީރާ)އަށް ދެއްކުމަށް ވެސް ރައީސް ރައީސް ޔާމީނުގެ މައްޗަށް ކޮށްފައިވާ މި މިހުކުމުގައި ބުނެފައި ވެއެވެ.
ރާއީސް ޔާމީނުގެ މައްޗަށް އިއްވި ޙުކުމުގައި ބުނެފައިވަނީ ދައުލަތުގެ ހުށަހެޅި ހެކިތަކާއި، ހެކިވެރިން ހެކިބަހުން ޔާމީނުގެ މައްޗަށް އުފުލާފައިވާ ދަޢުވާ ސާބިތުވެފައިވާކަމަށެވެ. މައްސަލަ ބަލާ ފަސް ގާޒީން ދިރާސާކޮށް ބަހުޘްކޮށް 5 ގާޒީންނަށް އިއްތިފާޤުވެވިފައިވަނީ 8 ކަމަކަށް ރިޢާޔަތްކޮށް ކުށް ސާބިތުވާކަމަށެވެ.
