ޓެކްނީޝަނުންނަކީ ލައިސަންސް އޮވެ މަސައްކަތްކުރާ ބަޔަކަށް ހެދުމަށް ޚާއްސަ ޕްރޮގްރާމެއް ބާއްވައިފި

ރެފްރިޖެރޭޝަން އަދި އެއަރ ކޮންޑިޝަނިންގ މަސައްކަތްކުރާ ޓެކްނީޝަނުންނަށް ޚާއްޞަ ޕްރޮގުރާމެއް ބާއްވައިފިއެވެ.

ރެފްރިޖެރޭޝަން އަދި އެއަރ ކޮންޑިޝަނިންގ ދާއިރާގައި މަސައްކަތްކުރާ ޓެކްނީޝަނުންނަކީ ލައިސަންސް އޮވެ މަސައްކަތްކުރާ ބަޔަކަށް ހެދުމުގެ ދެވަނަ ޕްރޮގްރާމް ޕޮލިޓެކްނިކުން ކުރިޔަށްގެންދިޔައީ މިނިސްޓްރީ އޮފް އެންވަޔަރަންމަންޓުގެ އެހީގައެވެ.

Advertisement

އެންވަޔަރަންމަންޓް މިނިސްޓްރީން ބުނީ ހަތަރު ދުވަހަށް ކުރިއަށްގެންދިޔަ މި ޕްރޮގްރާމަކީ ރާއްޖެއިން ބައިވެރިވެފައިވާ މުއާހަދާއެއްކަމުގައިވާ 'މޮންޓްރިއަލް ޕްރޮޓޮކޯލް އޮން ސަބްސްޓެންސް ދެޓް ޑިޕްލީޓް ދި އޯޒޯން ލޭޔަރ' ގެ ދަށުން ރާއްޖެއިން ކަނޑައަޅާފައިވާ އެޗް.ސީ.އެފް.ސީ ފޭސްއައުޓްކުރުމުގެ ޓާގެޓް ހާސިލުކުރުމަށް މަގުފަހިކުރުމުގެ ގޮތުން އެންވަޔަރަންމަންޓް މިނިސްޓްރީއާއި ޔުނައިޓެޑް ނޭޝަންސް އެންވަޔަރަންމަންޓް ޕްރޮގްރާމް (ޔުނެޕް) ގުޅިގެން ހިންގަމުންދާ ބައިނަލްއަޤުވާމީ ފެންވަރުގެ ސެޓިފިކޭޝަން ޕްރޮގްރާމެއް ކަމަށެވެ.

އެންވަޔަރަންމަންޓް މިނިސްޓްރީން ބުނީ މިޕްރޮގުރާމުގެ ދަށުން އަލަށް ދުނިޔޭގެ މާކެޓުގައި ތައާރަފު ކުރަމުންދާ ފްލޭމަބަލް ރެފްރިޖެރެންޓް އެކުލެވޭ އެއަރ ކަންޑިޝަނަރ އަދި ރެފްރިޖެރޭޓަރސް އިންސްޓޯލް، މެއިންޓެއިން، އަދި ސަރވިސް ކުރާނެ ގޮތުގެ ޓްރެއިނިން ދީފައިވާ ކަމަށެވެ. އަދި އަލަށް އުފެދޭ ފްލޭމަބަލް އަދި ޖައްވު ހޫނުވުމަށް މެދުވެރިކުރުވާ ގޭސްތަކުގެ މަޢުލޫމާތު ދީ އެފަދަ ގޭސްތައް ގެންގުޅުމުގައި ބަލަންޖެހޭ ސަލާމަތީ މިންގަނޑުތަކުގެ މައުލޫމާތު ވެސް ދީފައިވާ ކަމަށެވެ.

ރެފްރިޖެރޭޝަން އަދި އެއަރ ކަންޑިޝަނިންގ ދާއިރާއަކީ ފަންނީ އަދި ޢިލްމީ ދާއިރާއަކަށް ވުމާއެކު، އަދި މުޅި ސިނާޢަތުގެ އަމާޒު ތިމާވެށްޓާ ރައްޓެހި އީޖާދީ އިލްމުގެ މައްޗަށް ބިނާވަމުން އަންނަ ސިނާޢަތަކަށް ވުމުން، ރާއްޖޭގައިވެސް މި މަސައްކަތަކީ ހަރުދަނާ އުސޫލުތަކެއްގެ މަތިން އޭގެ އެންމެ ރަނގަޅު އުސޫލުތަކުގައި ހިފައިގެން ކުރާ މަސައްކަތަކަށް ހެދުމަކީ މުހިއްމުކަމެއް ކަމަށް މިނިސްޓްރީން މައުލޫމާތުދެއެވެ.

އެގޮތުން މިމަސައްކަތަކީ ލައިސެންސް ލިބިގެން އެކަމުގެ ފަންނީ ޢިލްމު ލިބިހުރެ ކުރާ މަސައްކަތަކަށް ހެދުމަކީ އެންވަޔަރަންމަންޓް މިނިސްޓްރީގެ އަމާޒެކެވެ. ރާއްޖެއަކީ ޔުނެޕްގެ ފަރާތުން ރެފްރިޖެރެންޓް ޑްރައިވިންގ ލައިސަންސް ޕްރޮގްރާމް ފެށި ދެވަނަ ޤައުމެވެ.

"ރެފްރިޖެރޭޝަން ޑްރައިވިންގ ލައިސަންސް" ގެ ފުރަތަމަ ޕްރޮގުރާމް މި އަހަރުގެ ޖުލައި މަހުގެ ތެރޭގައި ބާއްވާފައިވާއިރު މި ޕްރޮގްރާމުގެ ފުރަތަމަ ބުރުގައި 12 ޓެކްނީޝަނުން ޓްރެއިން ކުރެވި އިމްތިހާނުން ފާސްވެފައިވާ ޓެކްނީޝަނުންނަށް މި މަހުގެ 26 ވަނަ ދުވަހު ވަނީ "ރެފްރިޖެރެންޓް ޑްރައިވިންގ ލައިސަންސް" ދީފައެވެ. އަދި މި ޕްރޮގުރާމުގެ ދެވަނަ ބުރުގައި ޖުމްލަ 16 ޓެކްނީޝަނުން މިވަނީ ޓްރެއިންކޮށްފައެވެ.

އެހެންކަމުން ރެފްރިޖެރޭޝަން އަދި އެއަރ ކޮންޑިޝަނިންގ ދާއިރާގައި މަސައްކަތްކުރާ ޓެކްނީޝަނުންނަކީ ލައިސަންސް އޮވެ މަސައްކަތްކުރާ ބަޔަކަށް ހެދުމުގެ ޕްރޮގުރާމުގެ ދަށުން މިހާތަނަށް ޖުމްލަ 28 މީހުން ވަނީ ޓްރެއިން ކުރެވިފައެވެ.