ޓެކްސީ ޑްރައިވަރުންގެ ހުރި ކަންބޮޑުވުންތަކާއި، އެ ހިދުމަތް ފޯރުކޮށްދިނުމުގައި ހުރި ދަތިތައް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާ އެކު މަޝްވަރާކޮށްފިއެވެ.

ޓެކްސީ ޑްރައިވަރުން ރައީސް ސޯލިހުއާ އެކު ބޭއްވެވި ބައްދަލުކުރެއްވުމުގައި، މައިގަނޑު ގޮތެއްގައި މަޝްވަރާކުރެވިފައިވަނީ 20 އަހަރަށް ވުރެ ގިނަ ދުވަސްވެފައި ހުރި ޓެކްސީތަކުން ކުރިޔާލާ އެންގުމަކާ ނުލާ ޓޯ ކުރުމަށް ފަހު ހުއްދަ ބާތިލުކުރާ މައްސަލައާއި ގުޅޭ ގޮތުންނެވެ. ރާއްޖެއެމްވީއަށް މައުލޫމާތު ލިބިފައިވާ ގޮތުގައި މިހާތަނަށް އެތައް ޓެކްސީއެއް ކުރިޔާލާ އެންގުމަކާ ނުލާ ފުލުހުން ޓޯ ކޮށްފައިވާއިރު، އެއިން އެއްވެސް ފަހަރަކު ކަންކަން އިސްލާހުކުރަން ފުރުސަތު ދީފައި ނުވެއެވެ.

ޓެކްސީތަކުގެ ހުއްދަ ބާތިލުކުރަމުން ދަނީ، "ޓެކްސީ ގަވައިދު"ގެ 12 ވަނަ މާއްދާގެ (ހ) އަދި (ބ) އަށް ރިއާޔަތް ކުރުމަށް ފަހުގައި ކަމަށް ފުލުހުންނާއި ޓްރާންސްޕޯޓް އޮތޯރިޓީން އަންގާފައިވާ ކަމަށް ބައެއް ޓެކްސީ ޑްރައިވަރުން ވަނީ މައުލޫމާތު ދީފައެވެ. ނަމަވެސް، ހަމަ އެ މާއްދާގައި އޭގެ ކުރިން ޓެކްސީ ކުރުމުގެ ހުއްދަ ނަގާފައިވާ ޓެކްސީތައް އިސްތިސްނާ ކުރެވިފައިވާކަން ފާހަގަކޮށްލަން ޖެހެއެވެ.

އެ ބައްދަލުވުމުގައި ބައިވެރިވި ފަރާތަކުން ރާއްޖެއެމްވީއަށް މައުލޫމާތު ދެމުން ބުނެފައިވަނީ، މިހެން ޓެކްސީތަކުގެ ހުއްދާ ބާތިލުކުރާ ކުރުން ރައީސް ސޯލިހު ކުށްވެރިކުރައްވާފައިވާ ކަމަށެވެ. އަދި ޓެކްސީތަކުގެ ހުއްދަ ބާތިލުކުރާ ނަމަ، އެކަށީގެންވާ ވަގުތު ދޭން ޖެހޭން ކަމަށް ރައީސް ވިދާޅުވެފައިވާ ކަމަށް މައުލޫމާތުދީފައިވެއެވެ.

މި ބައްދަލުކުރެއްވުމުގައި މަޝްވަރާކުރެެވުނު އިތުރުކަންތައްތަކުގެ ތެރޭގައި، އެސްއެމްއީ ބޭންކް މެދުވެރިކޮށް ބާ ޓެކްސީތައް އާ ކުރުމަށް ލުއި ގޮތްތަކެއް ހޯދައި ދިނުމާއި، ޓޯ ކުރުން ހުއްޓުވުމާއި ބެހޭގޮތުން ކަމާއިބެހޭ އިދާރާތަކާއި އެކު މަޝްވަރާކުރުމަށް ފަހު ހައްލެއް ހޯދައިދިނުން ހިމެނެއެވެ. ރައީސް ސޯލިހު ވަނީ ޓެކްސީ ޑްރައިވަރުންގެ ހައްގުތައް ކަށަވަރުކޮށްދެއްވާނެ ކަމުގެ ޔަގީންކަން ބައްދަލުވުމުގައި ބައިވެރިވި ފަރާތްތަކަށް އަރުވާފައެވެ.

ރައީސް އިބްރާހިމް މުހައްމަދު ސޯލިހު ވަނީ، ކަސްޓަމަރުންގެ ޝަކުވާތައް އަޑު އެހުމަށާއި، ޑްރައިވަރުންގެ ހުރި މައްސަލަތައް އިސްލާހުކުރުމަށް ނަސޭހަތްތެރިވުމަށް އެދިވަޑައިގެންފައެވެ. އަދި ހިދުމަތް ލިބިގަންނަ ފަރާތްތަކަށް ލުއި ފަސޭހަވާނެ ގޮތްތައް ބެލުމަށް ފަހު، ޓެކްސީގެ ހިދުމަތް ވީހާވެސް ފުރިހަމައަށް ފޯރުކޮށްދިނުމަށް ރައީސް ސޯލިހު ވަނީ ޑްރައިވަރުން ގާތު އެދިވަޑައިގެންފައެވެ.