އއ. މާޅޮހުގެ ފެނާ ނަރުދަމާގެ މަސައްކަތާއި ބަނދަރުގެ މަސައްކަތް އަންނަ އަހަރުގެ ތެރޭގައި ފެށިގެންދާނެކަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް ސޯލިހު އެހެން ވިދާޅުވީ، މާޅޮހު ކައުންސިލްގެ މެމްބަރުންނާއި އެކު ހޯމަ ދުވަހު ބޭއްވި ބައްދަލުކުރެއްވުމުގައި އެވެ. ހޯމަ ދުވަހު ރައީސް އޮފީހުގައި ބޭއްވި އެ ބައްދަލުވުމުގައި، މާޅޮހު ކައުންސިލަރުން ވަނީ މާޅޮހުގެ ތަރައްގީ އަށް މުހިންމު ކަންކަމާއި ބެހޭ ގޮތުންނާއި ރަށުގެ ރައްޔިތުންގެ ކަންބޮޑުވުން ހުރި ބައެއް މައްސަލަތަކާ ބެހޭ ގޮތުން ރައީސްއާ މަޝްވަރާކުރައްވާފައެވެ.
އެގޮތުން ރަށުގެ ބަނދަރު މަރާމާތު ކުރުމުގެ މަސައްކަތާއި، ފެނާއި ނަރުދަމާގެ މަސައްކަތް ނުފެށި އޮތުމުން އެކަމުގެ ކަންބޮޑުވުން ކައުންސިލަރުން ރައީސް އާ ހިއްސާ ކުރެއްވިއެވެ. އަދި ޒުވާނުންގެ މަރުކަޒެއް ރަށުގައި ގާއިމު ކުރުމުގެ މުހިންމުކަމާއި ޒުވާނުންނާ ގުޅުންހުރި އިތުރު މަޝްރޫއުތަކާއި އަދި ރަށުގެ އިޤުތިސާދީ ފުދުންތެރިކަން އިތުރުކުރުމަށް ހިންގަން ބޭނުންވާ މުހިންމު މަޝްރޫއުތަކާބެހޭ ގޮތުން ކައުންސިލަރުން އެމަނިކުފާނާއި މަޝްވަރާކުރެއްވި ކަމަށް ރައީސް އޮފީހުން މައުލޫމާތު ދެއެވެ.
މާޅޮހުގެ ފެނާ ނަރުދަމާގެ މަސައްކަތާއި ބަނދަރުގެ މަސައްކަތް އަންނަ އަހަރުގެ ތެރޭގައި ފެށިގެންދާނެކަން ފާހަގަކުރައްވަމުން ރައީސް ވަނީ، ކައުންސިލަރުން އެދިވަޑައިގެންނެވި ކަންކަމުގައި ކަމާގުޅޭ ސަރުކާރުގެ އިދާރާތަކާއި މަޝްވަރާކުރައްވައިގެން ހައްލު ހޯއްދަވައި ދެއްވުމަށް މަސައްކަތް ކުރައްވާނެ ކަމަށެވެ.
އާބާދީ ގައި ހަތަރު ސަތޭކައެއްހާ މީހުން އުޅޭ މަޅޮހުގެ ރައްޔިތުން އާމްދަނީ ހޯދުމަށް މައިގަނޑު ގޮތެއްގައި ކުރާ މަސައްކަތަކީ މަސްވެރިކަމާއި ދަނޑުވެރިކަމެވެ
