ބޯހިޔާވަހިކަން: މާލެއާއި، ހުޅުމާލޭގަ އިތުރަށް ފްލެޓު އަޅާނެ ޖާގައެއް ނެތް!
ހުޅުމާލެ ފޭސް-2 އަށް 20 ސްކޫލް ބޭނުންވޭ
މަޖިލީހުގެ ގައުމީ ތަރައްގީއާ ތަރިކައިގެ ކޮމެޓީން ހޯމަ ދުވަހު ބޭއްވި ބައްދަލުވުމުގެ ތެރެއިން--
ބޯހިޔާވަހިކަމުގެ މައްސަލަ އިންތިހާއަށް ގޮސް މާލޭ ސަރަހައްދުގައި އިތުރަށް ފްލެޓް ނުވަތަ ސޯޝަލް ހައުސިންގ ޔުނިޓުތައް އެޅޭނެ އިތުރު ޖާގައެއް ނެތް ކަމަށް ޕްލޭނިންގ މިނިސްޓްރީން ބުނެފި އެވެ.
ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމެޓީން ހޯމަ ދުވަހު ބޭއްވި ބައްދަލުވުމަށް މިނިސްޓްރީ އޮފް ނެޝަނަލް ޕްލޭނިންގ އެންޑް އިންފާސްޓްރަކްޗަރ އިސްވެރިންނާއި މިނިސްޓްރީ އޮފް ހައުސިންގ އެންޑް އަރބަން ޑިވެލޮޕްމަންޓްގެ އިސްވެރިންނާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ އިސްވެރިންގެ އިތުރުން ފަހި ދިރިއުޅުން ކޯޕަރޭޝަނާއި ގްރޭޓަރ މާލެ އިންޑަސްޓްރިއަލް ޒޯންގެ އިސްވެރިން ހާޒިރުކޮށް، މިހާރު މަޖިލީހަށް ހުށަހަޅާފައިވާ ބޯހިޔާވަހިކަމާ ގުޅޭ ތިން ގަރާރާ ގުޅޭގޮތުން ވަނީ މަޢުލޫމާތު އެއްކުރައްވާފަ އެވެ.
ބޯހިޔާވަހި ކަމާގުޅޭގޮތުން މަޖިލީހަށް ހުށަހެޅިފައިވާ ތިން ޤަރާރަކީ، ދިވެހިރައްޔިތުންނަށް މާލެއާއި ރަށްރަށުން ފްލެޓު ދޫކުރުމާ ގުޅޭގޮތުން ރައްޔިތުންގެ މަޖިލީހަށް ހުށަހަޅާ ޤަރާރާއި، ގެދޮރު ނެތް ފަރާތްތަކަށާއި އަލަށް ޒަވާޖީ ހަޔާތެއް ފަށާ ދިވެހިރައްޔިތުންނަށް ގޯތި ދެވޭވަރުގެ ޖާގައޮތް ރަށްރަށުން ގޯތި ދޫކުރުމާ ގުޅޭގޮތުން ރައްޔިތުންގެ މަޖިލީހަށް ހުށަހަޅާ ޤަރާރުގެ އިތުރުން، ވެށިފަހި މާލެ ޕްރޮގުރާމުގެ ދަށުން މާލެއިން ބިން ދޫކޮށްލާ ފަރާތްތަކަށާއި ގުޅީފަޅުން ބިން ގަނެފައިވާ ފަރާތްތަކަށް ބޯހިޔާވަހިކަން ހަމަޖެއްސުމާ ގުޅޭގޮތުން ހުށަހަޅާ ޤަރާރު ހިމެނެ އެވެ.
ދިވެހިރައްޔިތުންނަށް މާލެއާއި ރަށްރަށުން ފްލެޓު ދޫކުރުމާ ގުޅޭގޮތުން ރައްޔިތުންގެ މަޖިލީހަށް ހުށަހެޅިފައިވާ ޤަރާރާ ގުޅިގެން، ޕްލޭނިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ މާލެ ހިމެނޭ ސަރަހައްދު ކަމަށްވާ، މާލެއާއި ހުޅުމާލޭގައި މިހާރު އިމާރާތްކުރަމުން އަންނަ ހައުސިންގ ޔުނިޓްތަކާއި، ރައީސް އިބްރާހީމް މުހައްމަދު ޞާލިހުގެ ސަރުކާރުން އިމާރާތް ކުރަން މިހާރު ނިންމާފައިވާ ހައުސިންގ ޔުނިޓުތަކުގެ އިތުރަށް، އިތުރު ހައުސިންގ ޔުނިޓް އެޅުމުގެ ޖާގަ މާލެއާއި، ހުޅުމާލެގައި ނެތް ކަމަށެވެ.
އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވީ، ހުޅުމާލެ ދެވަނަ ފިޔަވަހީގެ ޕްލޭނަށް ވެސް ކޮންމެވެސް ވަރަކަށް ބަދަލު ގެންނަން ޖެހިފައިވާ ކަމަށެވެ. އެއީ ސްކޫލްތައް އެއްދަންފަޅިއަށް ބަދަލުކުރަން ސަރުކާރުން ނިންމާފައިވާތީ، ދެވަނަ ފިޔަވަހީގައި ކުރިން ދިރިއުޅޭނެ ކަމަށް ޕްލޭންކޮށްފައިވާ އާބާދީއަށް ސްކޫލްތައް ވެސް އިތުރުކުރަން ޖެހޭކަމަށް ސުހައިލް ވިދާޅުވި އެވެ. އެގޮތުން ފޭސްޓޫއަށް އެކަނިވެސް 20 ސްކޫލް ބޭނުންވާ ކަމަށް ސުހައިލް ވިދާޅުވި އެވެ.
ސުހައިލް ވިދާޅުވީ އެކަންތައްތަކަށް ބަލާފަ، ހުޅުމާލެ ފޭސްޓޫގައި ދިރިއުޅޭނެ މީހުންގެ އަދަދާއި އެތަނުގައި ހުންނަންޖެހޭ ވަސީލަތްތަކާމެދު ސަރުކާރުގެ ކަމާބެހޭ އިދާރާތަކުގެ ބޭފުޅުންނާއެކު މަޝަވަރާ ކުރެވުމުންދާ ކަމަށެވެ. ހުޅުމާލެގައި ދިރިއުޅެވޭނެ ކަމަށް ކުރިން ބަލާފައިވަނީ 160،000 މީހުންނަށް ކަމަށާއި ނަމަވެސް، އެވަރުގެ އާބާދީއެއް ބާއްވައިގެން އެހެން ޚިދުމަތްތައް ދެވެންނެތް ކަމަށް ސުހައިލް ވިދާޅުވި އެވެ. ސުހައިލް ވިދާޅުވީ މިހާރުވެސް ހުޅުމާލޭގައި 10،000 ފްލެޓް އިމާރާތް ކުރުމުގެ މަސައްކަތް ކުރަމުންދާ ކަމަށާއި، ކުރިއަށް އޮތް ދެ އަހަރުގެ ތެރޭގައި އެ ފްލެޓްތައް ނިމޭނެ ކަމަށެވެ.
ޕްލޭނިންގ މިނިސްޓްރީން ބުނީ، ތިލަފަޅާއި ގުޅީފަޅުގައި ބޯހިޔާވަހި ކަމުގެ އެއްވެސް މަޝްރޫޢެއް ހިންގުމަށް ނިންމާފައިނުވާ ކަމަށެވެ. އެތަނުގައި ކުރިއަށްދާނީ، އިންޑަސްޓްރިއަލް މަސައްކަތްތަކާއި، އިޖުތިމާޢީ ގޮތުން ރައްޔިތުންނަށް ދައުލަތުން ފޯރުކޮށްދޭންޖެހޭ ބައެއްކަންކަން ޤާއިމު ކުރަން ހިންގޭ ބައެއް މަޝްރޫޢުތައް ކަމަށެވެ. އެގޮތުން ބަންދުކުރެވޭ މީހުން، ވަގުތީ ގޮތުން ބެލެހެއްޓުމަށް ޤާއިމު ކުރާ ޖަލާއި، ދައުލަތުން ބަލާ މީހުން ބައިތިއްބުމަށް، ޤާއިމުކުރާ ސެންޓަރުތައް ފަދަ މަޝްރޫއުތައް ކަމަށް ޕްލޭނިންގ މިނިސްޓްރީން ބުނެއެވެ.
ވެށިފަހި މާލެ މަޝްރޫޢުގެ ދަށުން، މާލެއިން ކުދި ބިންކޮޅު ދޫކޮށްލައިގެން، ހުޅުމާލެއިިން ބިމާއި ހުޅުލެއާއި މާލެއިން ފްލެޓް ދިން ފަރާތްތަކުގެ ތެރެއިން، ދޫކޮށްލި ބިންކޮޅު ދައުލަތަށް ހޯދުމަށް ބޮޑެތި ގޮންޖެހުންތަކާ ކުރިމަތިވެ، ބައެއް މައްސަލަތައް އަދިވެސް ކޯޓުގައި ހިނގަމުންދާ ކަމަށް އެޗްޑީސީންނާއި ހައުސިން މިނިސްޓްރީންވެސް ބުނެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެފައިވަނީ މީގެ ކުރިން ހެދިފައިވާ އެސެސްމެންޓްތަކުން ދައްކާ ގޮތުން 20،000 އާއިލާއަށް ބޯހިޔާވަހިކަން ބޭނުންވެފައިވާ ކަމަށެވެ. އެހެންކަމުން އެހުރިހާ އެންމެނަށް ބޯހިޔާވަހިކަން ފޯރުކޮށްދިނުމަކީ އެމަނިކުފާނުގެ ރިޔާސީ ވަޢުދުފުޅެކެވެ.
