ނައިބު ރައީސް ތިލަދުންމައްޗަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފި
އެންމެ ފުރަތަމަ ވަޑައިގަތީ ހއ. މޮޅަދޫއަށް
މި ދަތުރުފުޅަކީ ހއ. އާއި ހދ.ގެ ބައެއް ރަށްތަކަށް ނައިބު ރައީސް ކުރެއްވި ދަތުރުފުޅު
ރައީސުލްޖުމްހޫރިއްޔާގެ ނައިބު ފައިޞަލް ނަސީމް ތިލަދުންމަތީ އުތުރުބުރީގެ އިތުރުން ތިލަދުންމަތީ ދެކުނުބުރީގެ ރަށްތަކަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފިއެވެ.
ރައީސުލްޖުމްހޫރިއްޔާގެ ނައިބު ހއ. އާއި ހދ. ގެ ބައެއް ރަށްތަކަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފައިވަނީ އާދިއްތަ ދުވަހުގެ މެންދުރުގައެވެ.
ރައީސުލްޖުމްހޫރިއްޔާގެ ނައިބު ހއ އާއި ހދ އަތޮޅުގެ ބައެއް ރަށްތަކަށް ކުރެއްވި ޒިޔާރަތުގައި އެންމެ ފުރަތަމަ ވަޑައިގެންނެވީ ހއ. މޮޅަދޫއަށެވެ. މޮޅަދުއަށް ކުރެއްވި ޒިޔާރަތުގައި ރައީސުލްޖުމްހޫރިއްޔާގެ ނައިބު ވަނީ އެރަށުގެ ފުޓްސަލް ދަނޑު ހުޅުއްވައިދެއްވައި، އެރަށުގައި އަލަށް ތަރައްޤީކުރާ ކުޑަކުދިންގެ ޕާކުގެ ބިންގާ އެޅުމުގެ ރަސްމިއްޔާތުގައި ބައިވެރިވެވަޑައިގެންފައެވެ. އަދި މިދަތުރުގައި މޮޅަދުއަށް ދިމާވެފައިވާ ލަފާފުރުމުގެ ދަތިކަމަށް ޙައްލެއް ހޯދުމަށް ސަރުކާރުން އެރަށުގައި ތަރައްޤީކުރާ ބަނދަރުގެ ޢަމަލީ މަސައްކަތް، ރައީސުލްޖުމްހޫރިއްޔާގެ ނައިބު ވަނީ ފައްޓަވާދެއްވާފައެވެ.
ހއ. ދިއްދޫއަށް ރައީސުލްޖުމްހޫރިއްޔާގެ ނައިބު ކުރެއްވި ދަތުރުފުޅުގައި ހއ. އަތޮޅު ކައުންސިލާއި ދިއްދޫ ރަށު ކައުންސިލަރުންނާ ބައްދަލުކުރެއްވިއެވެ. ދިއްދުއަށް ކުރެއްވި ޒިޔާރަތުގައި ރައީސުލްޖުމްހޫރިއްޔާގެ ނައިބު ވަނީ އެރަށުގައި ދިރިއުޅޭ ޚާއްޞަ އެހީއަށް ބޭނުންވާ ފަރާތްތަކާއެކު ވަގުތުކޮޅެއް ހޭދަކުރައްވާފައެވެ.
ރައީސުލްޖުމްހޫރިއްޔާގެ ނައިބު ދިއްދޫއަށް ކުރެއްވި ދަތުރުފުޅުގައި، ހއ. އަތޮޅު ކައުންސިލުން އިންތިޒާމްކޮށްގެން ފާހަގަކުރި ތިލައުތުރު އުއްތަމަ އަރުތަވެރިންގެ އިނާމު ދެއްވުމުގެ ހަފުލާ ޝަރަފުވެރިކޮށްދެއްވިއެވެ.
ރައީސުލްޖުމްހޫރިއްޔާގެ ނައިބު، ހއ. އާއި ހދ. ގެ ބައެއް ރަށްތަކަށް ކުރެއްވި ޒިޔާރަތުގެ އެންމެ ފަހު މަންޒިލެއްގެ ގޮތުން ވަނީ ހދ. ކުޅުދުއްފުއްޓަށް ޒިޔާރަތްކުރައްވާފައެވެ. މިދަތުރުފުޅުގައި ރައީސުލްޖުމްހޫރިއްޔާގެ ނައިބު ވަނީ ކުޅުދުއްފުށީ ކައުންސިލާ ވެސް ބައްދަލުކުރައްވާފައެވެ. ކުޅުދުއްފުށްޓަށް ކުރެއްވި ޒިޔާރަތުގައި، ރައީސުލްޖުމްހޫރިއްޔާގެ ނައިބު ވަނީ ކުޅުދުއްފުށީ ރީޖަނަލް ހޮސްޕިޓަލަށް ޒިޔާރަތްކުރައްވައި، މިއަހަރުގެ ޚިތާނީ ކޭމްޕު ރަސްމީކޮށް އިފްތިތާޙުކޮށްދެއްވާފައެވެ. ޚިތާނީ ކޭމްޕު އިފްތިތާހު ކުރުމަށްފަހު، ރައީސުލްޖުމްހޫރިއްޔާގެ ނައިބު ވަނީ ކުޅުދުއްފުށީ ރީޖަނަލް ހޮސްޕިޓަލުގެ މެނޭޖްމަންޓާ ވެސް ބައްދަލުކުރައްވާފައެވެ.
