އިލްމުވެރިންގެ ގުޅުމުގެ ރުހުން އޮތް ފަނޑިޔާރުންގެ ލިސްޓެއް ރައީސްއަށް ފޮނުވައިފި

ފަނޑިޔާރުންގެ މަގާމަށް އައްޔަނުކުރަން އިލްމުވެރިންގެ ގުޅުން ޖަމިއްޔާގެ ރުހުން އޮތް ފަރާތްތަކުގެ ލިސްޓެއް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ފޮނުވައިފިއެވެ.

މި ލިސްޓު ފޮނުވިކަން ބަޔާންކޮށް އިލްމުވެރިންގެ ގުޅުމުގެ ފަރާތުން ޓްވިޓަރގައި އާންމުކުރި ސިޓީގައި އެ ފަރާތްތަކުގެ ލިސްޓެއް ރައީސްއަށް ފޮނުވިކަމަށް ބަޔާންކޮށްފައިވީ ނަމަވެސް، އެ ލިސްޓު އާންމުކޮށްފައެއް ނުވެއެވެ. އަދި ރައީސްއަށް ސިޓީ ފޮނުއްވަން ޖެހުނު ސަބާބު ބަޔާންކުރަމުން އެ ޖަމިއްޔާއިން ބުނެފައިވަނީ، އެއީ ދައުލަތުގެ އެންމެ އިސްވެރިޔާގެ ހައިސިއްޔަތުން މިކަންކަން އިންތިޒާކޮށް ބެލެހެއްޓުމުގެ ޒިންމާއާމެދު ޖަވާބުދާރީވާން ޖެހެނީ އެމަނިކުފާނަށް ވުމުން ކަމުގައެވެ.

އިލްމުވެރިން އިތުރަށް ވަނީ، ދިވެހިރާއްޖެ އިސްލާހުކުރެއްވުމަށާއި ދިވެހިރާއްޖޭގެ މިސްރާބުކުރެއްވުމަށް ރައީސް ސޯލިހުއަށް ލިބިވަޑައިގެންފައި ފުރުސަތުގެ ބޭނުން ރަނގަޅަށް ހިއްޕަވާ، އެ ފުރުސަތުގެ ބޭނުން ހެޔޮގޮތުގައި ހިއްޕެވުމަށް ކުރައްވަންޖެހިވަޑައިގެންނަވާ ކަންކަމުގައި ފަސްޖެހިވެޑައިނުގެންނެވުމަށް ދަންނަވާފައެވެ.

ފަނޑިޔާރު ގޭގެ މުހިންމުކަން ބަޔާންކުރަމުން އެ ސިޓީގައި ވަނީ، އިސްލާމްދީނުގައި ފަނޑިޔާރުންނާއި ފަނޑިޔާރު ގެއަކީ ވަރަށް މުހިންމު ފަރާތެއް ކަމަށެވެ. އެގޮތުން ދީން ނެގެހެއްޓުމާއި ހިމާޔަތްކުރުމުގެ އިތުރުން، ވެރިންނާއި ރައްޔިތުންގެ ހައްގުތައް ހިމާޔަތްކުރުމުގެ ޒިންމާއާއި މަސްއޫލިއްޔަތަކީ ފަނޑިޔާރުންނާއި ފަނޑިޔާރުންގެ ޒިންމާއެއް ކަމަށް ބުނެފައިވެއެވެ.

އެ ސިޓީގައި ވަނީ ފަނޑިޔާރުންގެ ހުންނަން ޖެހޭނެ ޝަރުތުތަކާއި ފަނޑިޔާރެއްގެ ހުންނަން ޖެހޭ އިލްމާއި ބެހޭ މައުލޫމާތު ރައީސްއަށް އަރުވާފައިވެއެވެ. ހާއްސަކޮށް ސުޕްރީމް ކޯޓަށް އައްޔަންކުރެވޭ ފަނޑިޔާރުންގެ ގައިގައި ހުންނަންޖެހޭ ސިފަތަކާއި، އިސްލާމް ދީނާއި ސުންނަތުގެ އިލްމު ހުރުމުގެ މުހިންމުކަމުގެ މައްޗަށް ސިޓީގައި އަލިއަޅުވާލާފައިވެއެވެ.