ރައީސް ނަޝީދު އެމްޑީޕީގެ ރައީސް ކަމުގެ މަގާމު ދިފާއުކުރެއްވީ 23432 ވޯޓާ އެކު
ނުފެންނަ ކަމަށް 63 ވޯޓު ލިބިފައިވޭ
ރައްޔިތުންގެ މަޖިލީހުގެ ރައީސް އަދި އެމްޑިޕީގެ ރައީސް މުހައްމަދު ނަޝީދު
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސް ކަމުގެ މަޤާމަށް އަނެއްކާވެސް އެޕާޓީގެ ރައީސް މުހައްމަދު ނަޝީދު 23432 ވޯޓާއި އެކު އިންތިޚާބުވެ ވަޑައިގެންފިއެވެ.
އެމްޑީޕީގެ ރައީސްކަމުގެ މަޤާމަށް ކުރިމަތި ލައްވާފައި ވަނީ ވެސް ރައީސް ނަޝީދު އެކަންޏެވެ. އެހެންކަމުން މި ފަހަރުގެ އިންތިޚާބުގައި ނަގާފައިވަނީ ފެންނަ ނުފެންނަ ވޯޓެކެވެ.
އެމްޑީޕީގެ އެތެރޭގެ އިންތިޚާބުތަކުގެ ވަގުތީ ނަތީޖާ އިޢުލާން ކޮށްފައިވާއިރު 172 ފޮށިން ޖުމްލަ 23584 ވޯޓު ލާފައިވެއެވެ. އެގޮތުން ފެންނަކަމަށް 23369 ވޯޓު ލިިބިފައިވާއިރު ޞައްޙަ ވޯޓުގެ ގޮތުގައި އެމަނިކުފާނަށް ލިބިލެއްވީ 23432 ވޯޓެވެ. ނުފެންނަ ކަމަށް 63 ވޯޓު ލިބިފައިވެއެވެ.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަކީ ދިވެހިރާއްޖޭގައި އުފެދުނު އެންމެ ފުރަތަމަ ސިޔާސީ ޕާޓީއެވެ. އެގޮތުން ދިވެހިރާއްޖޭގެ އެންމެ ފުރަތަމަ ސިޔާސީ ޕާޓީގެގޮތުގައި އެމްޑީޕީ ރަޖިސްޓްރީކުރެވުނީ 23 ޖޫން 2005 ގައެވެ. އަދި މިއީ ދިވެހިރާއްޖޭގެ އެންމެ ބޮޑު ސިޔާސީ ޕާޓީވެސް މެއެވެ.
