ޓޮޓެންހަމް ހޮޓްސްޕަރގެ ކޯޗު ކަމުގެ މަގާމަށް ހޯޒޭ މޮރީނިއޯ ހަމަޖައްސައިފިއެވެ.
ޗެލްސީ އާއި މެންޗެސްޓަރ ޔުނައިޓެޑްއަށް ކޯޗު ކަން ކޮށްދީފައިވާ މޮރީނިއޯ ކޯޗު ކަމާއި ހަވާލުވީ ހަތަރު އަހަރުގެ މުއްދަތަކަށެވެ.
ޓޮޓެންހަމްގެ ޗެއަރމަން ޑެނިއަލް ލެވީ ބުނީ މޮރީނިއޯ އާކީ މިވަގުތު ދުނިޔޭގައި ހުރި އެންމެ ކާމިޔާބު ކޯޗު ކަމަށާއި އޭނާ އާއި އެކު ޓޮޓެންހަމް ކާމިޔާބަށް ދަތުރުކުރާނެ ކަމަށެވެ. އެގޮތުން މޮރީނިއޯ ވަނީ އޭނާގެ ކުޅަދާނަ ކަން ޔުނައިޓެޑްގަ އާއި ޗެލްސީއާއި ގައި އޭނާ ހޭދަކުރި ދުވަސްވަރު ދައްކުވައިދީފައި ކަމަށާއި، އޭގެ އިތުރުން ރެއާލް އާއި އިންޓަ މިލާނަށް އޭނަ ކޯޗު ކަން ކޮށްދިން އިރު އެ ޓީމުތައް ބަލިކުރުން ވެފައިވަނީ އުނދަގޫ ކަމެއްކަމަށް ބުނެފައެވެ.
2016 ވަނަ އަހަރު މެންޗެސްޓަރ ޔުނައިޓެޑްގެ ކޯޗުކަމާ ހަވާލުވެ، މޮރީނިއޯ ވަނީ އެ ސީޒަނުގައި ލީގު ކަޕާއި، ޔޫރޮޕާ ލީގު އެ ޓީމަށް ކާމިޔާބުކޮށްދީފައެވެ. އެ ސީޒަން މެންޗެސްޓަރ އިން ނިންމާލީ ލީގުގެ ހަ ވަނައިގައި އޮވެގެންނެވެ.
މީގެ ކުރިން ރެއާލް މެޑްރިޑް އާއި ޗެލްސީ އަދި އިންޓަމިލާނަށް ވެސް ކޯޗުކަން ކޮށްދީފައިވާ މޮރީނިއޯ ވަނީ ގިނަ ކާމިޔާބީތަކެއް ހޯދާފައެވެ. އެގޮތުން އޭނާ ވަނީ 2010 ވަނަ އަހަރު ފީފާ އިން ހޮވާ އެންމެ މޮޅު ކޯޗުގެ މަގާމު ވެސް ހޯދާފައެވެ. އަދި އޭނާ ވަނީ ޔުއެފާ އިން ހޮވާ އެންމެ މޮޅު ކޯޗުގެ މަގާމު ދެ ފަހަރު ހޯދާފައެވެ.
