ރާއްޖޭގައި ހިންގަމުންދާ ދީނީ ހަރުކަށި ފިކުރުތަކުގެ ޖަމިއްޔާ ޖަމާއަތްތައް އުވާލުމަށް ރައްޔިތުންގެ މަޖިލީހުގެ މެމްބަރުން ގޮވާލައްވައިފި އެވެ.
މެމްބަރުން މިގޮތަށް ގޮވާލެއްވީ އަންގާރަ ދުވަހުގެ ޖަލްސާއަށް ސަރުކާރުގެ ފަރާތުން ހޮޅުދޫ ދާއިރާގެ މެމްބަރު ޔޫނުސް އަލީ ހުށަހަޅުއްވާފައިވާ ޖަމިއްޔާތަކުގެ ބިލަށް ބަހުސް ކުރައްވަމުންނެވެ. އެގޮތުން މާފަންނު މެދު ދާއިރާގެ އެމްޑީޕީ މެމްބަރު އިބްރާހީމް ރަޝީދު މިބިލަށް ބަހުސް ކުރައްވަމުން ވިދާޅުވީ ރާއްޖޭގައި އެކި ސެލްތައް އޮޕަރޭޓް ކުރަމުންދާކަމަށާއި އޭގެތެރޭގައި ބައެއް މާފިއާ ގޭންގުތައް އޮޕަރޭޓް ކުރާގޮތަށް ސެލްތަކެއް އޮޕަރޭޓް ކުރަމުންދާ ކަމަށެވެ.
ބައިނަލްއަގްވާމީ މުއާހަދާތަކަށް އިހުތިރާމު ކުރުމުގެ ގޮތުން ޖަމިއްޔާތައް ހިންގޭނެ ގޮތް އެކަށައަޅަން ޖެހޭކަމަށް ވިދާޅުވެ އިބްރާހީމް ރަޝީދު ވިދާޅުވީ ކަންކުރަމުންދަނީ އެހެނެއް ނޫން ކަމަށެވެ. ޖަމިއްޔާގައި ހުންނަ މީހާ ކުށެއް ކުރުމުން ޖަމިއްޔާ އެއްކޮށް އުވާލަނީ ކަމަށާއި ޖަމިއްޔާގައި ހުންނަ މީހެއް ކުށެއް ކޮށްފިނަމަ އެ ކުށް ކުރި މީހާއަށް އަދަބު ދޭންޖެހޭ ކަމަށް އިބްރާހީމް ރަޝީދު ވިދާޅުވި އެވެ. އެގޮތަށް ވިސްނުން ބަދަލުކުރަންޖެހޭ ކަމަށް އިބްރާހީމް ރަޝީދު ވިދާޅުވި އެވެ.
މިފަހުން އާންމުކުރި ޑރ އަފްރާޝީމް އަލީގެ މަރުގެ މައްސަލައިގެ ތަހުގީގީ ރިޕޯޓްގައިވެސް ބަޔާންވެގެންވާ ސަލަފް ޖަމިއްޔާއަށް އިޝާރާތްކުރައްވާ އިބްރާހީމް ރަޝީދު ވިދާޅުވީ އެޖަމިއްޔާއިން ބައެއް ފަހަރު ފުޓްބޯޅަ ކުޅޭތަން ފެންނައިރު އަނެއް ބައި ފަހަރު ސިޔާސީ ކަންތައްތަކުގައި އުޅޭތަންވެސް ފެންނަކަމަށެވެ.
އޭގެއިތުރުން އެކި ފިތުނަ ފަސާދަ ފަތުރާތަން އެބަފެނޭ. އަދި ބަލަންޖެހޭ ބޭރުގެ ފަރާތްތަކުން ފައިސާ ހޯދައިގެން ރާއްޖޭގެ ކުދިންގެ ވިސްނުމަށް ބަދަލު ގެނެސް އެކުދިން މުޅިން އެހެންގޮތަކަށް ބައްޓަންކޮށް އަފްޣާނިސްތާނު ނުވަތަ ޕާކިސްތާނު ބޯޑަރު ހިސާބުން އަންނަ ވިސްނުން އެއީ އިސްލާމް ދީނުގެ ވިސްނުންކަމުގައި ދެކިގެން ކުދިން ހަރާބު ކުރާ މަންޒަރު. އިއްޒަތްތެރި ރައީސް. މިއީ ބަލަންޖެހޭ ކަންތައްތައް. މިކަންތައްތަކަށް ބަލައިގެން ނޫނީ ގައުމެއްގެ ގޮތުގައި ކުރިޔަށް ނުދެވޭނެ.މާފަންނު މެދު ދާއިރާގެ މެމްބަރު އިބްރާހީމް ރަޝީދު
މިބިލަށް ވާހަކަދައްކަވަމުން މަކުނުދޫ ދާއިރާގެ އެމްޑީޕީ މެމްބަރު މުހައްމަދު ރާޢީ ވިދާޅުވީ ރާއްޖޭގައި ހަރުކަށި ދީނީ ފިކުރުގެ ބޭފުޅުން އުފައްދާފައިވާ ޖަމިއްޔާތައް އުޅޭކަމަށެވެ. އަދި މިފަދަ ޖަމިއްޔާތައް ހިންގާ އޮފީސް އިމާރާތްތައް ނުހުންނަކަށާއި މިސްކިތް އެއީ އޮފީސް އިމާރާތްކަމުގައި ވެގެން ނުވާނެ ކަމަށް ރާއީ ވިދާޅުވި އެވެ.
ކުލަބު ޖަމިއްޔާތައް އުފެދިގެން ދާއިރު ބިލްގައިވެސް ބަޔާން ކޮށްފައިވަނީ މެމްބަރުންގެ އަދަދު އެނގެންޖެހޭނޭ ކަމަށާއި، މާލީ ހިސާބުތައް އެނގެންޖެހޭނޭ ކަމަށް ރާއީ ވިދާޅުވި އެވެ. މަރު ކޮމިޝަނުން ނެރުނު ރިލްވާންގެ ރިޕޯޓާއި ޑރ އަފްރާޝީމް އަލީގެ ރިޕޯޓުން ފެނިގެންދަނީ ބިރުވެރި ވާހަކަތަކެއް ކަމަށް ރާއީ ވިދާޅުވި އެވެ.
އަޅުގަނޑުމެން ގަބޫލެއް ނުކުރާނެ އެ ޖަމިއްޔާގެ ނަން އިވުނީމާ އަޅުގަނޑުމެން ބިރު ގަންނަންޖެހޭނެ ޖަމިއްޔާއެއް އޮންނަންޖެހޭނެ ކަމަކަށް. އަޅިގަނޑުމެންގެ ލޭ ހުއްދަވާވާރުގެ ޖަމާޢަތްތައް އެއީ ރާއްޖޭގައި ރަޖިސްޓްރީ ވެގެން ހިނގަންޖެހޭ ޖަމާޢަތްތަކެއް ނޫން. މި ޖަމާޢަތްތައް ޖެހޭނީ އެހެންވީމާ ކޮންމެސް އެހެން ދިމާލެއްގައި އޮޕަރޭޓް ވާން. އަޅުގަނޑަށް އިނގޭތީ މިބުނަނީ މިރިޕޯޓްތައް ފެނުނީމާ އިސްލާމްދީނުގައި އޮންނަ ގޮތާއި ހިލާފަށް ވަކި ޖަމާއަތަކަށް ލޭ ހުއްދަ ނުކުރެވޭނެ. މި ކަމާ ހަވާލުވާ މިނިސްޓްރީއަކުން އެބަޖެހޭ މިފަދަ ޖަމިއްޔާތައް އުވާލަން.މަކުނުދޫ ދާއިރާގެ އެމްޑީޕީ މެމްބަރު މުހައްމަދު ރާޢީ
ހެންވޭރު ދެކުނު ދާއިރާގެ އެމްޑީޕީ މެމްބަރު ހުސައިން ޝަހީމް ބިލަށް ވާހަކަދައްކަވަމުން ވިދާޅުވީ ރާއްޖޭގައި ހަރުކަށި ޖަމާޢަތްތަކުން ޖަމާޢަތްތައް ހަދައިގެން އުޅޭ މީހުންގެ ބޭނުމަކަށް ވެފައި އޮންނަނީ މައުސޫމް މީޙުންނަށް އޮޅުވާލާ ހަނގުރާމަތަކަށް ގެންދިޔުން ކަމަށެވެ. އަދި ރާއްޖޭގައި އުފެދުނު ބާރުގަދަ ޖަމާއަތްތަކަށް ބަލާއިރު އަލްގައިދާ ފާހަގަކުރެވޭ ކަމަށް ޝަހީމް ވިދާޅުވި އެވެ. އަލްގައިދާގެ އެޖެންޓުންގެ ގޮތުގައި މީހުން މާލޭ އާއި ރާއްޖޭގައި އޮޕަރޭޓް ކޮށްފައި އެބަހުރި ކަމަށާއި އެމީހުން އަމިއްލައަށް އެއީ އެޖެންޓުން ކަމަށް ބުނެފައި އެބުރި ކަމަށް ޝަހީމް ވިދާޅުވި އެވެ.
އަލްގައިދާ ބަލިކަށިވެ އައިސިސް އައިފަހުން އައިސިސްގެ ދިދަ ހިފައިގެން ރާއްޖޭގައި ބޮޑެތި މުޒާހަރާތައް ކޮށްފައި އެބަހުރި ކަމަށް ޝަހީމް ވިދާޅުވި އެވެ. އޭގެފަހުން އައި ބިލާދުއްޝާމްގެ ޖަމާއަތުގެ މީހުންވެސް ރާއްޖޭގައި ހަރަކާތްތެރިވަމުން އަންނަކަމަށާއި އެޖަމާއަތްތަކުން ބައިވެރިވާ ހަނގުރާމަތަކުގެ މައުލޫމާތުތައް ގެނެސްދޭ ދިވެހި ވެބްސައިޓްތައް ހުންނަކަން ޝަހީމް ފާހަގަކުރެއްވި އެވެ. ދިވެހިރައްޔިތުންނަށް އަމާންކަމާއެކު ދިރިއުޅުމުގެ ހައްގު ކޮންމެ ޖަމާޢަތަކުންވެސް ދޭންޖެހޭނެ ކަމަށް ޝަހީމް ވިދާޅުވި އެވެ.
ވަރަށް ސާފުކޮށް ވަރަށް ސީދާ ބަހުން އެބަ އަޑުއުފުލަން ޖެހޭ ދިވެހިރާއްޖޭގައި ރަޖިސްޓްރީވެގެން ހިނގާ ސަލަފް ޖަމާއަތަކީ، ޖަމިއްޔާއަކީ މިދެންނެވިފަދަ ހަރުކަށި ޓެރަރިސްޓް އަމަލުތައް ދިވެހިރާއްޖޭގައި ފަތުރާ ރައްޔިތުންގެ ހިތްތަކަށް ބިރުވެރިކަން ވައްދާ މިޖަމާޢަތުން ރާއްޖޭގެ ކުރީގެ ދީނީ އިލްމުވެރިޔަކު، މިމަޖިލީހުގެ މެމްބަރަކު ޑރ އަފްރާޝީމް އަލީ އަވަހާރަކޮށްލުމަށް ހިތްވަރު ދިނުމަށް ބަޔާންނެރިފައިވާ ބަޔެކޭ އެއީ. މިނެރުނު ބަޔާނުގައި ހުރި އިބާރާތްތަކަށް ބަލާއިރުގައި އަޅުގަނޑު ދަންނަވާނީ މިއިއްޒަތްތެރި މަޖިލީހުގެ ރައީސަށް އަޅުގަނޑު އިލްތިމާސް ދަންނަވާނީ މި ޖަމިއްޔާ އުވާލުމަށްޓަކައި ސަރުކާރަށް ދަންނަވަން.ހެންވޭރު ދެކުނު ދާއިރާގެ އެމްޑީޕީ މެމްބަރު ހުސައިން ޝަހީމް
މިބިލަށް ބަހުސްކުރެއްވި މެމްބަރުން ވަނީ ޖަމިއްޔާތައް ހިންގުމާއި ޖަމިއްޔާތައް އުވާލުމުގައި ބިލްގައި ބަޔާންކޮށްފައިވާ ކަންކަން މިހާރަށް ވުރެ ހަރުދަނާކުރަންޖެހޭ ކަމަށް ވިދާޅުވެ ވާހަކަ ދައްކަވާފައެވެ.
މިހާރު ބިލް ހުށަހަޅާފައިވާ ގޮތުން ޖަމިއްޔާތައް ރަޖިސްޓްރީ ކުރުމުގެ ބާރު ލިބިދެނީ ރައީސުލްޖުމްހޫރިއްޔާ އައްޔަނުކުރާ ފަރާތަކަށެވެ.
