މީގެ ދެދުވަސްކުރިން ޔަހޫދީ ހަރުކަށި ދައުލަތް އިސްރާއިލުން ފަލަސްތީނަށް ދިން ހަމަލާގައި އާންމުންގެ 8 މީހަކު މަރުވި ހާދިސާއަކީ އިންޓެލިޖެސް ފެއިލިއާއަކުން ހިނގިކަމެއް ކަމަށް އިސްރާއިލުން ބުނެފިއެވެ.

ހޮނިހިރު ދުވަހުގެރޭގެ ވަގުތެއްގައި އިސްރާއިލުން ދިން ހަމަލާގައި 8 މީހަކު މަރުވެފައިވާ އިރު، މީގެ ތެރޭގައި ތިން ކުޑަކުދިން ހިމެނެއެވެ. މި މައްސަލަ ބަލާނެކަމަށް އިސްރާއިލުން ބުނެފައިވަނިކޮށް، އެގައުމުން މިހާރު ބުނެފައިވަނީ އެ ހަމަލާ ދެވުނީ އިންޓެލިޖެންސް ފެއިލިއާކުން ކަމަށެވެ.

އިސްރާއިލުގެ ހަމަލާއާއި ގުޅިގެން އެގައުމުގެ އަސްކަރިއްޔާއިން ބުނެފައިވަނީ އެ ހަމަލާއަކީ ޕލަސްތީނުގެ އިސްލާމިކް ޖިހާދުގެ މެންބަރެއްގެ ގެއަށް ކަމަށާއި، އެގޭގައި އެހެން ބަޔަކު ދިރިއުޅެމުން ދިޔަކަމެއްގެ މައުލޫމާތު ލިބިފައި ނުވާ ކަމަށެވެ. މި ހަމަލާގައި ދެގެއެއް ވަނީ ސުންނާފަތި ވެފައެވެ.

މި ހަމަލާއާއި ގުޅިގެން ފަލަސްތީންގެ މަސްރަހު ހޫނުވެފައިވާކަމަށް ބައިނަލްއަގުވާމީ މީޑިއާއިން ވަނީ ރިޕޯޓްކޮށްފައެވެ. މި ހަމަލާގައި އިސްރާއިލުގެ ޓާގެޓަކަށްވި ރަސްމީ ޝަހީދުވިކަމަށް ހަބަރުތައް ބުނެއެވެ. އަދި އޭނާގެ ދެވަނަ އަނބި މަރްޔަމާއި، 11 ދަރިންގެ ތެރެއިން 3 ދަރިން ޝަހީދުވިއެވެ. ޝަހީދުވި ކުޑަކުދިންގެ ތެރޭގައި އުމުރުން 12 އަހަރުގެ މުޙައްނަދާއި، އުމުރުން 3 އަހަރުގެ ސާލިމްއާއި އެންމެ 3 މަހުގެ ފިރާޒެވެ.

މީގެ އިތުރުން ރަސްމީގެ ބޭބެ މުޙައްމަދުގެ އަންހެނުން ޔުސްރާއާއި، އެ ދެމަފިރިންގެ އުމުރުން 13 އަހަރުގެ ވަސީމްއާއި 7 އަހަރުގެ މުއާޒްވެސް ވަނީ މި ހަމަލާގައި ޝަހީދުވެފައެވެ.

މި ހަމަލާގައި މަރުވި މީހުންގެ ޖަނާޒާގެ ކަންކަން ބާއްވާފައިވަނީ ގައްޒާގެ އަލް މުޖާހިދީން މިސްކިތުގައެވެ. މި ޖަނާޒާގައި ފަލަސްތީނުގެ އެތައް ސަތޭކަ ރައްޔިތުންނެއް ވަނީ އިސްލާމިކް ޖިހާދުގެ ދިދަ ހިފައިގެން ބައިވެރިވެފައެވެ.