ނިމިދިޔަ ސަރުކާރަކީ، އާދެ ރައީސް އަބްދުﷲ ޔާމީން އަބްދުލް ގައްޔޫމްގެ ސަރުކާރަކީ، ރާއްޖޭގައި ޚިޔާލު ފާޅުކުރުމުގެ މިނިވަންކަން އެންމެ ބޮޑަށް ހިފެހެއްޓިގެން ދިޔަ އަހަރު ކަމާއި މެދު ޝައްކެއްވެސް ނެތެވެ. ރައީސް ޔާމީނުގެ ވެރިކަމުގެ ދައުރުގައި، ފެހި ޤާނޫނުއަސާސީން އެންމެހާ ދިވެހި ރައްޔިތުންނަށް ލިބިގެން ދިޔަ ޚިޔާލު ފާޅުކުރުމުގެ މިނިވަންކަމުގެ ހައްގު އޮތީ ކަސްތޮޅު އެޅުވި ހިފެހެއްޓިފައެވެ. ނޫސްވެރިކަމަށް އެކަނި ބަލާލިޔަސް، ފެނިގެން ދިޔައީ ބިރުވެރި މާހައުލެއް އުފައްދާ، އެ ފަރާތްތަކުގެ ދުލާއި ގަލަމުގެ މިނިވަންކަން ނިގުޅައިގަތުމަށް ކެނޑިނޭޅި މަސައްކަތް ކުރި މަންޒަރެވެ.

މި ރާއްޖެޓީވީއަށް ކުރިމަތިކުރުވި ކަންކަމަށް ބަލާއިރު، ރައީސް ޔާމީނުގެ ދައުރުގައި ބްރޯޑްކާސްޓިންގ ކޮމިޝަން މެދުވެރިކޮށް، ޖުމްލަ ތިން މިލިއަން ރުފިޔާއަށް ވުރެ ބޮޑު އަދަދަކުން ޖޫރިމަނާ ކޮށްފައިވެއެވެ. ތަކުރާރުކޮށް މިތަނުގައި މަސައްކަތްކުރި ނޫސްވެރިންނާއި މިތަނުގެ މުވައްޒަފުންނަށް އެކި ގޮތް ގޮތުން ބިރު ދައްކަމުން ދިޔައެވެ. އަދި އެ ބިރުވެރިކަމުގެ ތެރޭގައި 2018 ވަނަ އަހަރުގެ ފެބްރުއަރީ މަހުގެ ތެރޭގައި ރާއްޖެޓީވީން ވަނީ ދެ ދުވަހަށް ބްރޯޑްކާސްޓްކުރުން މެދު ކަނޑާލާފައެވެ.

މިކަމަށް ބާރުދޭ އިތުރު ކަންކަމަށް ބަލާލާއިރު، ރާއްޖޭގެ އެންމެ ދުވަސްވީ އެއް ނޫސް ކަމުގައިވާ "ހަވީރު" ނޫހަށާއި އެ ނޫހުގައި މަސައްކަތް ކުރަމުންދިޔަ ނޫސްވެރިންނަށް ކުރިމަތި ކުރުވި ހާލަތަށް ބަލާލުން ރަނގަޅުކަމަށް އަޅުގަނޑު ދެކެމެވެ. އެ ނޫސް ވުޖޫދަށް ގެނައުމުގައި މަސައްކަތް ކުރެއްވި ބައެއް ފަރާތްތަކުގެ ތެރޭގައި އުފެދުނު ޚިޔާލު ތަފާތުވުމެއްގައި ފެނިގެން ދިޔައީ، ކޯޓު އަމުރެއްގެ ދަށުން އެ ނޫސްވެރިންގެ މިނިވަންކަން ނިގުޅައިގަންނަން މަސައްކަތް ކުރި މަންޒަރެވެ.

އޭގެ އިތުރުން އަބުރުގެ ޤާނޫނެއް ފާސްކޮށް، އަބުރަށް އަރައިގަތުމަކީ ނޫސްވެރިކަން ކަފުންކުރުމަށް ރައީސް ޔާމީން އިސްވެ ހުންނަވައިގެން ރައްޔިތުންގެ މަޖިލިސް މެދުވެރިކޮށް ކުރެއްވި މަސައްކަތެކެވެ. އޭރުގެ ހާލަތު އޮތީ، ސޯޝަލް މީޑިއާގައި ފާޅުކުރާ ޚިޔާލަކުންވެސް މީހަކު ޖަލަށްދާން ޖެހޭ ހިސާބުގައެވެ. އަދި އެއްވެ އުޅުމުގެ މިނިވަންކަމަށް އެޅިގެން ދިޔަ ހުރަސްތަކާއި އެކު، މުޒާހަރާ ކުރުން އޮތީ މުޅިންހެން މަޑު ޖެހިފައެވެ.

ރައީސް އިބްރާހިމް މުޙައްމަދު ޞާލިޙު ވެރިކަމަށް ވަޑައިގެން އެންމެ ފުރަތަމަ ފެއްޓެވި އެއް މަސައްކަތަކީ އެ ޤާނޫނު އުވާލުމުގެ މަސައްކަތެވެ. އެ މަސައްކަތުގެ ތެރެއިން ފެނިގެން ދިޔައީ އެ ޤާނޫނު އުވާލެވި، ދިވެހިންނަށް ދުލާއި ގަލަމުގެ މިނިވަންކަން ލިބިގެން ދިޔަ މަންޒަރެވެ. ގާނޫނުއަސާސީއާ ތައާރުޒު ނުވާގޮތަށް އެ ބަޔަކު ބޭނުންވާ އެއްޗެކޭ ބުނުމަށް މަގު ކޮށައިދިނީ އެ ޤާނޫނު އުވާލުމާއި އެކުގައެވެ. މިކަމުގެ ސަބަބުން ހަމަ ގައިމުވެސް ދިވެހިންނަށް ދުލާއި ގަލަމުގެ މިނިވަންކަން ކަށަވަރުވެއްޖެއެވެ.

މިއަދު އެއްވެސް ބިރެއް ނެތި ސަރުކާރާއި ދެކޮޅަށްވެސް ހިތުހުރިހާ އެއްޗެއް އިދިކޮޅުގައި ތިބި މީހުންނަށް ގޮވެއެވެ. އާންމުންވެސް ހިތްހަމަ ނުޖެހޭނަމަ، ބިރަކާނުލާ އެ ޚިޔާލުތަކާއި ޝުއޫރުތައް ފާޅުކުރެވެއެވެ. މި ސަރުކާރަށް އަހަރެއް ފުރިގެންދާއިރު، ހިޔާލު ފާޅު ކުރުމުގެ މިނިވަންކަން ލިބިގެން ދިއުމަކީ މި ސަރުކާރުގެ އެންމެ ބޮޑު ކާމިޔާބީއެވެ.