މޮންޓެނެގްރޯއާ ދެކޮޅަށް އިންގްލޭންޑް ކުޅޭ މެޗުގައި ސްޓާލިން ނުފެންނާނެ!
12 ނޮވެމްބަރު 2019 | އަންގާރަ 13:37ކޮސޯވޯ މެޗުގައި ސްޓާލިންއަށް ކުޅެވޭނެ
ރަހީމް ސްޓާލިން
އަންނަ އަހަރު އޮންނަ ޔޫރޯ މުބާރާތުގެ ކޮލިފައިންގައި މޮންޓެނެގްރޯއާ ދެކޮޅަށް އިންގްލޭންޑް ކުޅޭ މެޗުގައި މެންޗެސްޓަރ ސިޓީގެ ވިންގާ ރަހީމް ސްޓާލިން ނުފެންނާނެ ކަމަށް އިންގްލޭންޑުން ބުނެފިއެވެ.
ބުރާސްފަތި ދުވަހު މޮންޓެނެގްރޯއާ ދެކޮޅަށް އިންގްލޭންޑް ކުޅޭ މެޗަށް ސްޓާލިން ނުނަގަން ނިންމީ، އެ މެޗަށް ތައްޔާރުވުމަށް އިންގްލޭންޑްގެ ޖޯޖްސް ޕާކް ޓްރެއިނިންގ ބޭސްގައި ކުރިޔަށްދިޔަ ފަރިތަކުރުންތަކުގައި ލިވަޕޫލްގެ ޖޯ ގޮމޭޒް އާއި ސްޓާލިންއާ ދެމެދު ހިނގި ހަމަނުޖެހުންތަކާ ގުޅިގެންނެވެ.
ރިޕޯޓްތައް ބުނާގޮތުން މި ހަމަނުޖެހުންތަކުގައި ގޮމޭޒްގެ ކަނާތު ލޯ ކައިރިޔަށް ވަނީ އަނިޔާވެފައެވެ.
އިންގްލޭންޑް ގައުމީ ޓީމުން ނެރުނު ބަޔާނެއްގައި ބުނީ، ހޯމަ ދުވަހު ކުރިޔަށްދިޔަ އިންގްލޭންޑްގެ ފަރިތަކުރުންތަކުގައި ސްޓާލިންގެ އަމަލުތައް ހުރިގޮތުން މޮންޓެނެގްރޯ މެޗުގެ ސްކޮޑުން އޭނާގެ ނަން އުނިކޮށްފައިވާ ކަމަށެވެ.
ސްޓާލިން އާއި ގޮމޭޒް ދެމެދުގައި ފުރަތަމަ މައްސަލަ ޖެހުނީ ހޮނިހިރު ދުވަހުގެ ރޭ ސިޓީ އަތުން 1-3 ގެ ނަތީޖާއިން ލިވަޕޫލް މޮޅުވި މެޗުގައެވެ. އެ މެޗުގައިވެސް ދެ ކުޅުންތެރިން ވަނީ އެކަކު އަނެކަކު ގަޔަށް އަތްލައި ހަމަނުޖެހުންތައް ހިންގާފައެވެ.
އިންގްލޭންޑް ގައުމީ ޓީމުގެ މި ނިންމުމާ ގިނަ ބަޔަކު އަންނަނީ ނުރުހުން ފާޅުކުރަމުންނެވެ. އެގޮތުން އިނގިރޭސި ކުރީގެ ޑިފެންޑަރ ރިއޯ ފާޑިނެންޑް ބުނީ ޓީމު ތެރޭގައި ޖެހޭ މިފަދަ މައްސަލަތައް މިއަށްވުރެ ރަނގަޅަށް ހައްލުކުރެވޭނެ ކަމަށެވެ.
މޮންޓެނެގްރޯ މެޗުގައި ސްޓާލިންއަށް ނުކުޅެވުނު ނަމަވެސް، އަންނަ އާދީއްތަ ދުވަހު ކޮސޯވޯއާ ދެކޮޅަށް އިންގްލޭންޑް ކުޅޭ މެޗަށް އޭނާ ވަނީ ނަގާފައެވެ.
