އިލެކްޝަންސް ކޮމިޝަން (އީސީ)، ނެޝަނަލް އިންޓެގްރިޓީ ކޮމިޝަން (އެންއައިސީ)އަށް މެމްބަރަކު ޢައްޔަނުކުރުމަށް ރުހުން ހޯދުމާއި މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ ޑިރެކްޓަރުންގެ ބޯޑުން ހުސްވެފައިވާ މަޤާމަށް މެންބަރަކު ޢައްޔަންކުރުމަށް ރުހުން ހޯދުން މާދަމާގެ މަޖިލީހުގެ ޖަލްސާއަށް އެޖެންޑާކޮށްފިއެވެ.

އީސީއަށް މެންބަރަކު ޢައްޔަންކުރުމަށްޓަކައި، ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކޮށް އިންޓަވިއުކޮށްފައިވަނީ މިނިވަން މުޢައްސަސާތަކުގެ ކޮމިޓީންނެވެ. އެންއައިސީގެ މެމްބަރަކު ޢައްޔަނު ކުރުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކޮށް އިންޓަވިއު ކޮށްފައިވަނީ ވެސް މިނިވަން މުޢައްސަސާތަކުގެ ކޮމިޓީންނެވެ. މީރާގެ ޑިރެކްޓަރުންގެ ބޯޑުން ހުސްވެފައިވާ މެންބަރުކަމަށް ބޭފުޅަކު ޢައްޔަންކުރެއްވުމަށްޓަކައި، ރައީސުލްޖުމްހޫރިއްޔާ މަޖިލީހަށް ފޮނުއްވާފައިވާ ނަންފުޅުތައް ދިރާސާކޮށް އިންޓަވިއު ކޮށްފައިވަނީ އިޤްތިޞާދީ ކޮމިޓީންނެވެ.

ކޮމެޓީން އެ ބޭފުޅުންނާ އިންޓަވިއުކޮށް، ދިރާސާކުރުމަށްފަހު، ކޮމެޓީން ވަނީ ތިން ބޭފުޅެއްގެ ނަން ފާސްކޮށްފަ އެވެ. އަދި ކޮމެޓީންވެސް ވަނީ އިސްކަންދޭ ތަރުތީބުން ފުރަތަމަ ބޭފުޅަކަށް ފުއާދުގެ ނަން ފާސްކޮށްފަ އެވެ. ދެ ވަނަ ބޭފުޅަކަށް ކޮމެޓީން ނިންމާފައިވަނީ އަމްޖަދު މުސްޠަފާ އެވެ. އަދި ތިން ވަނަ ބޭފުޅަކަށް ކޮމެޓީން ފާސްކޮށްފައިވަނީ ހަނީފާ ޚާލިދު ނަމެވެ.

މީރާގެ ޑިރެކްޓަރުންގެ ބޯޑުގައި ހުސްވެފައިވާ މަޤާމަށް ބޭފުޅަކު ޢައްޔަން ކުރެއްވުމަށްޓަކައި، ރައީސް އިބްރާހީމް މުޙައްމަދު ޞާލިޙް ރައްޔިތުންގެ މަޖިލީހަށް ފޮނުއްވީ ދެ ބޭފުޅުންގެ ނަންފުޅެވެ. އެގޮތުން ކޮމެޓީން ވަނީ ދެބޭފުޅުންނާއި އިންޓަވިއުކޮށް ތަޅުމަށް ދެ ނަންވެސް ފޮނުވާފައެވެ. އެއީ ކ. ކާށިދޫ ޝަބްނަމްގެ، މަހްޒޫމް ސަލީމާއި، މއ. ވިލާރޮދި، އިސްމާއިލް ސާޖިދު މިދެބޭފުޅުންނެވެ.