ރައްކާތެރިކަމުގައި ސަލާމަތުގެ ތަޅުދަނޑިއަކީ އާއްމުސިއްހަތުކަމަށާއި، ނަމަވެސް މިމުޖުތަމައު އާއްމު ސިއްހަތާ މެދު އިހުމާލުވެވިފައިވާ ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެއެވެ.

ސިއްހަތު ހަރުދަނާ ކުރުމުގެ ގޮތުން "ނެޝަނަލް ކޮންފަރެންސް އޮން ރީވިޓަލައިޒިންގ ޕަބްލިކް ހެލްތު:ވާރކިންގ ޓުގެދަރ ފޯރ އަ ހެލްދިއަރ ނޭޝަން" މަހާސިންތާ މިނިސްޓަރު އަމީން ވިދާޅުވީ ބަލީގެ ދަފުތަރުތަކުން ކަށަވަރުވާ ގޮތުގައި ރާއްޖޭގައި ވެސް އެންމެ އާންމު ބަލިތަކަކީ އެބަލިތަކުގެ ޝިކާރައަކަށްވެ އެންމެ ގިނަ ބަޔަކު ދުނިޔެ ދޫކޮށްދާ ބަލިތައް ކަމަށެވެ.

އެގޮތުން ހިތުގެ ބައްޔާއި ކެންސަރާއި ހަކުރު ބަލިފަދަ ގައިންގަޔަށް ނާރާ ބަލިތަކުގެ ފަރުވާކަށަވަރުކުރުމަށް ޒަމާނީ ވަސީލަތާއި ފަންނުވަރިކަން ހޯދުމަށް ދައުލަތުގެ ޖީބަށް ނުކަތާހާ ހޭދަކުރަމުންދާ ކަމަށް މިނިސްޓަރު އަމީން ވިދާޅުވިއެވެ. އަދި ވިދާޅުވީ މިފަދަ ބަލިތަކުގެ ގިލަންވެރިކަމުގެ ވޭނުގައި ދުވަސްހޭދަކުރާ ފަރުދުންގެ އާއިލާތަކުން މުޅި ތަނަވަސްކަން ވެސް ހޭދަކުރަމުންދާ ކަމަށެވެ.

މިނިސްޓަރު އަމީން ވިދާޅުވީ އިލްމީ ހޯދުންތަކުން ކަށަވަރުވާ ގޮތުގައި މިފަދަ ބަލިތަކަށް އާބާދީ ސޮއްސާލާމައިގަނޑު ސަބަބަކީ ދިރިއުޅުމުގެ އާދަތައް ކަމަށެވެ. ހެލިފެލިވެ އުޅުމާއި ކެއިންބުއިމުގެ އާދަތަކާއި މަސްތުވާތަކެއްޗާއި ދުންފަތުގެ ނުރައްކަލާއި މެދު ގާފިލުވުން ކަމަށް މިނިސްޓަރު ވިދާޅުވިއެވެ.

މިނިސްޓަރު އަމީން ވިދާޅުވީ އެނގިތިބެ ނުވަތަ ނޭނގިތިބެނަމަވެސް، އާއްމު ސިއްހަތާ މެދު އިހުމާލުވެވިފައިވާކަމަށާއި، މިއަދު މަސައްކަތް މިކުރަނީ ކަންކަމާމެދު އިލްމީ ނަޒަރަކުން ވިސްނާ މައްސަލަތައް ދެނެގަނެ، ދެމެހެއްޓެނިވި ހައްލު ހޯދުމަށް ކަމަށެވެ. އަދި ނަޒަރިއްޔާތުން އާއްމު ސިއްހަތާމެދު މިހާރު ވިސްނާލިއަސް މިކަމުގެ މުހިއްމުކަން ވަރަށް ފަސޭހައިން ހާމަވެ ސާފުވެގެންދާނެ ކަމަށް މިނިސްޓަރު އަމީން ވިދާޅުވިއެވެ.