މެމްބަރުން ހަމަނުވާތީ ހިންގުމަށް ދަތިވާކަމަށްބުނެ ބްރޯޑްކޮމްގެ ސިޓީއެއް މަޖިލީހަށް!
30 އޮކްޓޯބަރު 2019 | ބުދަ 11:50ބްރޯޑްކޮމްގެ ތިން މެމްބަރަކު ވަނީ މަޖިލީހުން ވަކިކުރުމުގެ ކުރިން އިސްތިއުފާ ދެއްވާފަ
ބްރޯޑްކޮމްގެ މެމްބަރުން މަޖިލީހުގެ މިނިވަން މުއައްސަސާތަކާބެހޭ ކޮމެޓީގެ ބައްދަލުވުމެއްގައި--
މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގައި މެމްބަރުން ހަމަނުވާތީ، އެކޮމިޝަން ހިންގުމުގައި ދަތިތަކެއް އުޅޭކަމަށްބުނެ، ރައްޔިތުންގެ މަޖިލީހަށް ސިޓީއެއް ފޮނުވައިފި އެވެ.
ބްރޯޑްކޮމްގެ ސެކެރެޓަރީ ޖެނަރަލް މުހައްމަދު ނާސިހް މަޖިލީހަށް ފޮނުވާފައިވާ ސިޓީ ވަނީ ބުދަ ދުވަހު ބޭއްވި މަޖިލީހުގެ މިނިވަން މުއައްސަސާތަކާބެހޭ ކޮމެޓީއަށް އިއްވާދެއްވާފަ އެވެ.
އެސިޓީގައި ބުނެފައިވަނީ އެކޮމިޝަނުގައި މެމްބަރުން އަދަދު ހަމަ ނުވާތީ ގާނޫނީ ގޮތުން އެކޮމިޝަނަށް ހިންގުމަށް ދަތިތަކެއް ދިމާވެފައިވާ ކަމަށެވެ.
އެކޮމިޝަނުގައި ހަތް މެމްބަރުން ތިއްބަވާއިރު، މިވަގުތު ތިއްބެވީ، ތިން މެމްބަރުންނެވެ. އެއީ ޒީނާ ޒާހިރު އާއި އާމިނަތު ސަހާރަތު އިއްޒަތުގެ އިތުރުން އަމްޖަދު ވަހީދު އެވެ.
އެކޮމިޝަނާ ގުޅޭގޮތުން ގިނަ ޝަކުވާތަކެއް ހުށަހެޅި، މަޖިލީހުގެ މިނިވަން މުއައްސަސާތަކާބެހޭ ކޮމެޓީން އެމައްސަލަތައް ބަލަމުންދަނިކޮށް، ތިން މެމްބަރަކު ވަނީ އިސްތިއުފާ ދެއްވާފަ އެވެ. އެއް މެމްބަރަކު ވަނީ ކޮމެޓީގެ ރިޕޯޓާއެކު މަޖިލީހުގައި ވޯޓު ނަގައިގެން ވަކިކޮށްފަ އެވެ.
އެކޮމިޝަނުގެ ކުރީގެ ނާއިބު ރައީސް އަބްދުﷲ ސޮފްވާނާއި ކޮމިޝަންގެ މެމްބަރު ހަސަން ނަބާހު އިސްތިއުފާ ދެއްވީ މިނިވަން މުއައްސަސާތަކާބެހޭ ކޮމެޓީން އެކޮމިޝަނުގެ މެމްބަރުންގެ މައްސަލަތައް ބަލަމުން ދަނިށެވެ.
ކޮމިޝަނުގެ ކުރީގެ ރައީސް މުހައްމަދު ޝަހީބު އިސްތިއުފާ ދެއްވީ، އޭނާ އެމަގާމުން ވަކިކުރަން ކޮމެޓީން ނިންމުމާއި ގުޅިގެން މަޖިލީހުގެ ތަޅުމުގައި އެކަމަށް ވޯޓަށް އެހުމުގެ ކުރިން ނެވެ.
މަޖިލީހުގައި ވޯޓަށް އަހައިގެން ކޮމިޝަންގެ މެމްބަރު ކަމުން ވަކިކޮށްފައި ވަނީ ސޮފްވާން އިސްތިއުފާ ދެއްވުމުން، އެކޮމިޝަނުގެ ނާއިބު ރައީސްގެ މަގާމަށް ވަޑައިގެންނެވި ފާތިމަތު ޒައިނާ އެވެ.
ބްރޯޑްކޮމްގައި ހުސްވެފައިވާ މަގާމުތަކަށް މީހުން އައްޔަން ކުރުމަށްޓަކައި ރައީސުލްޖުމްހޫރިއްޔާގެ އޮފީހުން ވަނީ ތިން އިއުލާނެއް ކޮށްފަ އެވެ. އޭގެ ތެރެއިން ފުރަތަމަ އިއުލާނާއި ގުޅިގެން ދެ މެމްބަރެއް ސްލޮޓަށް 36 ފަރާތަކުން ކުރިމަތި ލާފައިވެއެވެ. އެ ފަރާތްތަކާއި އިންޓަވިއުކުރުން ނޮވެމްބަރު މަހުގެ ހަތަރަކުން ހަޔަކަށް ކުރިއަށް ގެންދިއުމަށް މަޖިލީހުގެ މިނިވަން މުއައްސަސާތަކާބެހޭ ކޮމެޓީން ވަނީ ނިންމާފަ އެވެ.
ބްރޯޑްކާސްޓިން ކޮމިޝަނަށް މެމްބަރުން އައްޔަން ކުރަމުންދާއިރު، އެކޮމިޝަނާއި މޯލްޑިވްސް މީޑިއާ ކައުންސިލް އުވާލައި، އެ ދެ މުއައްސަސާގެ ކަންކަން ހިންގުމަށް އެއް ކޮމިޝަން އެކުލަވާލުމަށްޓަކައި، މީޑިއާ ކޮމިޝަނުގެ ނަމުގައި ބިލެއްގެ މަސައްކަތް މިނިވަން މުއައްސަސާތަކާބެހޭ ކޮމެޓީން ގެންދަނީ ކުރަމުންނެވެ.
