އެމެރިކާގެ ކްލަބްތަކުން އޮޒިލް ހޯދަން މަސައްކަތް ކުރަނީ

އެމެރިކާގެ ކްލަބްތަކުން އާސެނަލްއަށް ކުޅެމުން އަންނަ ޖަރުމަންގެ މިޑްފިލްޑަރ މެސުތު އޮޒިލް ހޯދަން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

ދަ އެކްސްޕެސް އިން ބުނީ، އެމެރިކާގެ ޑީސީ ޔުނައިޓެޑާއި، އެލްއޭ ގެލެކްސީ އަދި ފުޓުބޯޅަ ލެޖެންޑް ޑޭވިޑް ބެކަމްގެ އިންޓަރ މިއާމީ އިން އޮޒިލް ހޯދުމަށް މަސައްކަތް ކުރަމުން އަންނަ ކަމަށެވެ.

އެގޮތުން އެ ނޫހުން ބުނީ، އާސެނަލްގައި އޮޒިލް ހުރީ ހިތްހަމަޖެހިގެން ނޫން ކަމަށާއި، އޭނާ ބޭނުންވަނީ ކުރިޔަށް އޮތް ޖެނުއަރީ ޓްރާންސްފާއަށް ފަހު އާސެނަލް ދޫކޮށް އެހެން ކްލަބަކަށް ބަދަލުވާން ކަމަށެވެ. ނަމަވެސް އާސެނަލްއާއެކު އޮޒިލް ހަދާފައިވާ އެއްބަސްވުން 2021 ވަނަ އަހަރު ހަމަވާއިރު، އޭނާ މީގެކުރިން ބުނީ އެއްބަސްވުން ހަމަވުމުގެ ކުރިން ކްލަބް ބަދަލުކުރުމުގެ ވިސްނުމެއް ނުގެންގުޅޭ ކަމަށެވެ.

ޝާލްކޭ އިން 2006 ވަނަ އަހަރުގެ ސީޒަނުގައި ކެރިޔަރު ފެށި އޮޒިލް ވަނީ ވާޑަބްރޭމަން އަދި ރެއާލް މެޑްރިޑަށް ވެސް ކުޅެފައެވެ. އޭނާ އާސެނަލް އަށް ބަދަލުވީ 2013 ވަނަ އަހަރުގެ ސީޒަނުގައެވެ.

އޮޒިލް ވަނީ އާސެނަލްއަށް މިހާތަނަށް ކުޅުނު 233 މެޗުގައި 43 ލަނޑު ކާމިޔާބު ކޮށްފައެވެ. އޭނާ ވަނީ މިހާތަނަށް އެޓީމާއެކު ތިން އެފްއޭ ކަޕް އަދި އެފްއޭ ކޮމިއުނިޓީ ޝިލްޑް އެއްފަހަރު ކާމިޔާބު ކޮށްފައެވެ.

ރެއާލް މެޑްރިޑާއެކު ލަލީގާ އާއި ކޮޕާޑެލްރޭ އަދި ސްޕެނިޝް ސުޕަ ކަޕް ކާމިޔާބު ކޮށްފައިވާ އޮޒިލް ވަނީ ރެއާލްގައި ހޭދަކުރި ހަތަރު ސީޒަނުގައި އެޓީމަށް ކުޅުނު 159 މެޗުގައި 27 ލަނޑު ކާމިޔާބު ކޮށްފައެވެ.

ޖަރުމަން ގައުމީ ޓީމަށް ކުޅުނު 92 މެޗުގައި 23 ލަނޑު ކާމިޔާބު ކޮށްފައިވާ އޮޒިލް ވަނީ އެޓީމާއެކު 2014 ވަނަ އަހަރު ވޯލްޑް ކަޕް ކާމިޔާބުކުރުމުގެ އިތުރުން 2009 ވަނަ އަހަރު 21 އަހަރުން ދަށުގެ ޔޫރޯ ވެސް ކާމިޔާބު ކޮށްފައެވެ.