މި ސިސްޓަމް ރާއްޖެއަށް ގެނައީ އިމިގްރޭޝަންގެ އެދުމުގެ މަތިން ކަމަށް
މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މަލީހު ޖަމާލް
ޕެސެންޖަރ ލައިންތަކުގައި ރާއްޖެ އަންނަ ފަތުރުވެރިން ޕްރޮސެސް ކުރެވޭނެ ޕޯޓެބްލް ސިސްޓަމެއް އެމެރިކާއިން ހަދިޔާކޮށްފައިވާ ކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މަލީހު ޖަމާލް ވިދާޅުވެއްޖެއެވެ.
މަލީހު ވިދާޅުވީ މި ސިސްޓަމް ރާއްޖެއަށް ގެނައީ އިމިގްރޭޝަންގެ އެދުމުގެ މަތިން ކަމަށެވެ.
މަލީހު ވިދާޅުވީ މަގާމާއި ފުރަތަމަ ހަވާލުވިއިރު ވުޒާރާގައި މަސައްކަތް ކުރާ ބޭފުޅުން އެމެރިކާއިން ހަދިޔާކޮށްފައިވާ ޕައިސީސް ބޯރޑަރ ކޮންޓްރޯލް ސިސްޓަމްގެ މައްސަލަތައް ފާހަގަ ކުރި ކަމަށެވެ. އެގޮތުން ސިސްޓަމް ޑައުން ވެއްޖިއްޔާ އަލުން އޭތި އޮން ކުރެވޭނެ ކަމުގެ ޔަޤީންކަމެއް ނެތް ކަމަށް ބުނި ކަމަށެވެ.
ރައީސްގެ އިސްނެންގެވުމުގެ މަތިން ފޮރިން މިނިސްޓްރީގެ އެހީތެރިކަމާއެކު އެމެރިކާގެ ސަރުކާރުގައި އެހީގައި ވަރަށް ކުރު މުއްދަތެއްގައި ސިސްޓަމް އަޕްޑޭޓްކޮށް، ހުރިހާ ހާރޑްވެއަރ އެއް ފޯރުކޮށްދިނުމުގެ މަސައްކަތް ކުރި ކަމަށެވެ. އަދި އެމެރިކާ ސަރުކާރުން އެއަށް ބޭނުންވާ އެންމެ ފަހުގެ އަޕްޑޭޓްތައް ދީފައިވާކަން މިނިސްޓަރ ފާހަގަ ކުރެއްވިއެވެ.
އަދި ކުރީ ސަރުކާރުތަކުގައި ސިސްޓަމްތަކުން ނެރެވޭނެ އެންމެ ރަނގަޅު ނަތީޖާ ނުނެރެވޭ ކަން ފާހަކަ ކުރެއްވިއެވެ.
ހުރި ވަސީލަތްތަކުން އެ ސިސްޓަމެއްގެ ރަނގަޅު ބޭނުން ހިފަން ޖެހޭ ކަން ފާހަގަ ކުރައްވާ މިނިސްޓަރ ވިދާޅުވީ ވަރަށް ކުރު މުއްދަތެއްގެ ތެރޭގައި ބޯރޑަރ ސެކިއުރިޓީ ސިސްޓަމް އެއްކޮށް އަޕްގްރޭޑް ކޮށްފައި ކަމަށެވެ.
