ހދ.ކުޅުދުއްފުށި ކަކާގޭގައި އަންގާރަ ދުވަހުގެ ރޭ ހިނގި އަލިފާނުގެ ހާދިސާއަކީ ބަޔަކު ގަސްތުގައި ހިންގި އަމަލެއްކަމަށް މޯލްޑިވިސް ޕޮލިސް ސާރވިސް އިން ބުނެފިއެވެ.

ކަކާގޭގައި ހުރި ސައިކަަލެއްގައި ރޯވުމުން ފުލުހުން އެ ސަރަހައްދަށް ދިޔައިރު އެގޭގެ ސީލިންގް އާއި ޕިކަޕެއްގައި ވަނީ ރޯވެފައެވެ. މި ހާދިސާގައި އެ ގެއަށް އެކި ވަރުގެ ގެއްލުންތައް ލިބިފައިވާއިރު, ސައިކަލެއްގައިވެސް ރޯވެ އެއްކޮށް އަނދާފައިވާކަމަށް މައުލޫމާތު ލިބެއެވެ. ފުލުހުން ބުނެފައިވަނީ މި ހާދިސާގައި އެއްވެސް މީހަކަށް ގެއްލުންވެފައި ނުވާކަމަށެވެ. ނަމަވެސް އަލިފާނުގެ ހާދިސާގެ ސަބަބުން އެގެއާއި އިންވެގެން ހުންނަ ގެޔަށް ކޮންމެވެސް ވަރަކަށް އަސަރުކޮށްފައިވާކަމަށް ބުނެފައެވެ.

މޯލްޑިވިސް ޕޮލިސް ސަރވިސް އިން މިކަމާއި ގުޅިގެން އަންގާރަ ދުވަހު ބުނެފައިވަނި، ތަހުގީގަށް މިހާތަނަށް ބެލި ބެލުމުން އަލިފާނުގެ ހާދިސާއަކީ ބަޔަކު ނުވަތަ މީހަކު ގަސްތުގައި ކޮށްފައިވާކަމެއްކަމަށް ބެލެވޭކަމަށާއި މި މައްސަލައިގައި ތުހުމަތުގައި އަދި މީހަކު ހައްޔަރުކޮށްފައިނުވާކަމަށެވެ.

ކުޅުދުއްފުށީ ކަކާގެ އަލިފާން ރޯވުމުގެ ރިޕޯޓު އަންގާރަ ދުވަހުގެ ފަތިހު 04:16 ހާއިރު ކުޅުދުއްފުށި ފަޔަރ ސްޓޭޝަނަށް ލިބުމާއެކު ވަނީ ހަރަކާތްތެރިވާން ފަށާފައެވެ. އަދި ސިފައިން އެ ސަރަޙައްދަށް ގޮސް ކުރި މަސައްކަތުން އަލިފާން ނިއްވާލެވިފައިވަނީ 04:40 ހާއިރުއެވެ.