އެމްޑީޕީގެ ރައީސްކަމަށް ކުރިމަތިލެއްވުމަށް ރައީސް ނަޝީދު ފޯމު ހުށަހަޅުއްވައިފި
19 އޮކްޓޯބަރު 2019 | ހޮނިހިރު 08:07އަލުން ބޭފުޅުން އިންތިޚާބުކުރުން އޮންނާނީ އަންނަ މަހުގެ 22 ގައި
ކުރީގެ ރައީސް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ކުރީގެ ރައީސް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސްކަމަށް ދެވަނަ ދައުރަކަށް ކުރިމަތިލެއްވުމަށް ފޯމު ހުށަހަޅުއްވައިފިއެވެ.
އެމްޑީޕީގެ ރައީސްކަމާއި ނައިބު ރައީސްކަމުގެ މަގާމު ހުސްވެފައިވާތީ މި ދެ މަގާމަށް ބޭފުޅުން ހޮވުމަށް ބާއްވާ އިންތިޚާބުގައި ވާދަކުރުމަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލީ މިމަހުގެ 14 ވަނަ ދުވަހުއެވެ. އިންތިޚާބުތަކުގައި ކުރިމަތިލުމަށް އެދޭފޯމް ފުރިހަމަކޮށް ހުރިހާ ލިޔެކިޔުންތަކާއެކު މި މަހުގެ 19 ވަނަ ދުވަހުގެ ކުރިން ޕާޓީ އަށް ފޯމް ހުށަހަޅަންޖެހެއެވެ. އަދި މެއިލް މެދުވެރިކޮށްވެސް ފޯމު ހުށައެޅޭނެ ކަމަށް އެމްޑީޕީން ބުންޏެވެ. މިދެ މަގާމަށް އަލުން ބޭފުޅުން އިންތިޚާބުކުރުން އޮންނާނީ އަންނަ މަހުގެ 22 ވަނަ ދުވަހުއެވެ.
ހޮނިހިރު ދުވަހު ރައީސް ނަޝީދު އެމްޑީޕީ އޮފީހަށް ވަޑައިގަންނަވާ ފޯމް ހުށަހަޅުއްވާފައިވާއިރު، އެމްޑީޕީ ނައިބް ރައީސް ކަމަށް ދެވަނަ ދައުރަކަށް ކުރިމަތިލައްވާ އެޕާޓީގެ ކުރީގެ ނައިބް ރައީސް އަދި ރައީސުލްޖުމްހޫރިއްޔާގެ އޮފީހުގެ މިނިސްޓަރު މުހައްމަދު ޝިފާޒު ވަނީ ފޯމް ހުށަހަޅުއްވާފައެވެ. އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވެސް ވަނީ އެމަގާމަށް ފޯމް ހުށަހަޅުއްވާފައެވެ.
ރައީސް ނަޝީދު އެމްޑީޕީގެ ރައީސް ކަމުގެ މަގާމަށް ދެވަނަ ފަހަރަށް ކުރިމަތިލެއްވުމާ ގުޅިގެން ގިނަ ބަޔަކު ގެންދަނީ އެމަނިކުފާނަށް ތާއީދުކުރަމުންނެވެ. އަދި އެމަގާމަށް އެހެން ބޭފުޅަކު ކުރިމަތިނުލައްވައެވެ.
