އަނެހެން މެރަތަން ރެކޯޑު 16 އަހަރަށްފަހު މުގުރާލައިފި
14 އޮކްޓޯބަރު 2019 | ހޯމަ 14:43މި ރެކޯޑު ކުރިން ހަދާފައިވަނީ އިންގްލޭންޑްގެ ޕައުލާ ރެކްލިފް
ބްރިގިޑް ކޮސްގެއީ
އިންގްލޭންޑްގެ ޕައުލާ ރެކްލިފް ހަދާފައިވާ އަންހެނުންގެ ދުނިޔޭގެ މެރެތަން ރެކޯޑު 16 އަހަރަށްފަހު ކެންޔާގެ ބްރިގިޑް ކޮސްގެއީ މުގުރާލައިފިއެވެ.
އާދީއްތަ ދުވަހު ޗިކާގޯ މެރަތަންގައި ވާދަކޮށް ކޮސްގެއީ ރެކޯޑު މުގުރާލީ ދެ ގަޑިއިރާއި 14 މިނެޓު ހަތަރު ސިކުންތުން ރޭސް ނިންމައިގެންނެވެ. ލަންޑަން މެރަތަންގައި 2003 ވަނަ އަހަރު މި ރެކޯޑު ރެކްލިފް ހަދާފައިވަނީ ދެ ގަޑިއިރާއި 15 މިނެޓު 25 ސިކުންތުން ރޭސް ނިންމައިގެންނެވެ.
މިއީ ފަހުގެ ތާރީހެއްގައި ފިރިހެން އަދި އަންހެން ބައިން ބެލި ނަމަވެސް މުގުރާނުލެވި އެންމެ ގިނަ ދުވަސްވީ މެރެތަން ރެކޯޑެވެ.
އުމުރުން 25 އަހަރުގެ ކޮސްގެއީ ވަނީ މި އަހަރުގެ ލަންޑަން މެރެތަން ދެ ގަޑިއިރާއި 18 މިނެޓު 20 ސިކުންތުން ކާމިޔާބުކޮށް، އެ މެރެތަން ކާމިޔާބުކުރި އެންމެ ޒުވާން ދުވުންތެރިޔާގެ ޝަރަފް ހޯދައިފަ އެވެ.
ޗިކާގޯ މެރެތަންގައި ކޮސްގެއީ އަށް ވުރެ އަވަހަށް 22 ފިރިހެން ދުވުންތެރިން ނިންމާފައިވާއިރު، ފިރިހެނުންގެ ބައިން އެއް ވަނަ ހޯދި ކެންޔާގެ ލޯރެންސް ޝެރޯނޭގެ ޓައިމިން އަކީ ދެ ގަޑި އިރާއި ފަސް މިނެޓު 45 ސިކުންތެވެ.
ދުނިޔޭގެ ފިރިހެނުންގެ ރެކޯޑް އޮތީ ދެ ގަޑިއިރާއި އެއް މިނެޓު 39 ސިކުންތުން ރޭސް ނިންމާފައިވާ ކެންޔާގެ އެލިއޫޑް ކިޕްކޯޖް އަތުގަ އެވެ.
