ކުރިޔަށް އޮތް ޖެނުއަރީ ޓްރާންސްފާއަށް އަމާޒުކޮށް ނަޕޯލީގެ މިޑްފިލްޑަރ ފަބިއަން ރުއިޒް ހޯދުމުގެ ރޭހުގެ ކުރީގައި އުޅެނީ ރެއާލް މެޑްރިޑް ކަމަށް ރިޕޯޓްތައް ބުނެފިއެވެ.

މާސާއިން ބުނީ، ކުރިޔަށް އޮތް ޖެނުއަރީ ޓްރާންސްފާގައި ރުއިޒްގެ ސޮއި ހޯދުން އެންމެ ގާތީ ރެއާލް ކަމަށާއި، އެ ކްލަބުން އޭނާ ހޯދުމަށް ކުރަންޖެހޭ މަސައްކަތްތައް ކުރަމުން އަންނަ ކަމަށެވެ.

ނަޕޯލީއާއެކު އުމުރުން 23 އަހަރުގެ ރުއިޒް ހަދާފައިވާ އެއްބަސްވުން ހަމަވާނީ 2023 ވަނަ އަހަރެވެ. އަދި އޭނާގެ ރިލީޒް ފީއެއްގެ ގޮތުގައި ނަޕޯލީން ހަމަޖައްސާފައިވަނީ 30 މިލިއަން ޔޫރޯއެވެ.

މި އަހަރު ސްޕެއިންގެ 21 އަހަރުން ދަށުގެ ޓީމާއެކު ޔޫރޯ ކާމިޔާބުކޮށްފައިވާ ރުއިޒް ހޯދުމަށް ރެއާލްގެ އިތުރުން ބާސެލޯނާއިންވެސް އަންނަނީ މަސައްކަތް ކުރަމުންނެވެ. ނަމަވެސް އޭނާ ބަދަލުވުން އެންމެ ގާތީ ރެއާލްއަށް ކަމަށް ރިޕޯޓްތައް ބުނެއެވެ.

ރެއާލް ބެޓިސްގެ "ބީ" ޓީމުން 2014 ވަނަ އަހަރުގެ ސީޒަނުގައި ކެރިޔަރު ފެށި ރުއިޒް ވަނީ އެ ކްލަބަށް ކުޅުނު 23 މެޗުގައި ތިން ލަނޑު ކާމިޔާބުކޮށްފައެވެ. އޭނާ ވަނީ ބެޓިސްގެ ސީނިއަރ ޓީމަށް ކުޅުނު ހަތަރު ސީޒަނުގައި 60 މެޗުގައި ތިން ލަނޑު ކާމިޔާބުކުރުމުގެ އިތުރުން އެޓީމާއެކު ދެވަނަ ޑިވިޝަން މުބާރާތް ކާމިޔާބުކޮށްފައެވެ.

ލޯން އެއްބަސްވުމެއްގެ ދަށުން 2016 ވަނަ އަހަރުގެ ސީޒަނުގައި އެލްޗޭއަށް ބަދަލުވެ އެ ކްލަބަށް 18 މެޗުގައި އެއް ލަނޑު ކާމިޔާބުކޮށްފައިވާ ރުއިޒް ނަޕޯލީއަށް ބަދަލުވީ 2018 ވަނަ އަހަރުގެ ސީޒަނުގައެވެ.

ރުއިޒް ވަނީ ނަޕޯލީއަށް ކުޅުނު 45 މެޗުގައި 8 ލަނޑު ކާމިޔާބުކޮށްފައެވެ. އަދި އޭނާ ވަނީ މި އަހަރު އޮތް 21 އަހަރުން ދަށުގެ ޔޫރޯގެ ގޯލްޑެން ޕްލޭޔާގެ މަގާމު ހޯދާފައެވެ.