ކަނޑުހުޅުދޫ ޞިއްޙީ މަރުކަޒުގައި ލެބޯރެޓަރީގެ ޚިދުމަތް ފަށައިފި
12 އޮކްޓޯބަރު 2019 | ހޮނިހިރު 08:14ރައްޔިތުންނަށް ވަރަށް ބޮޑު ލުއި ފަސޭހަކަމެއް ލިބޭނެ
ގއ.ކަނޑުހުޅުދޫ
ގއ. ކަނޑުހުޅުދޫ ޞިއްޙީ މަރުކަޒުގައި ލެބޯރެޓަރީގެ ޚިދުމަތް ފަށައިފިއެވެ.
ހެލްތު މިނިސްޓްރީން ބުނީ ކަނޑުހުޅުދޫ ސިއްޙީ މަރުކަޒުގައި ލެބޯރެޓަރީގެ ޚިދުމަތް ރަސްމީކޮށް ފަށްޓަވައިދެއްވީ ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް ޢަލީ ޒާހިރެވެ.
ހެލްތު މިނިސްޓްރީން ބުނީ މި ޚިދުމަތް ފެށުމަށް ބޭނުންވާ މެޝިންތަކާއި، ތަހުލީލުކުރުމަށް ބޭނުންވާ އެހެނިހެން ވަޞީލަތްތައް މިއަހަރުގެ ސެޕްޓެމްބަރުމަހުގެ 22 ވަނަ ދުވަހު ޤާއިމުކޮށް ޚިދުމަތް ފަށާފައިވާ ކަމަށެވެ.
ކަނޑުހުޅުދޫ އަކީ ގާތްގަނޑަކަށް 500 މީހުންގެ އާބާދީއެއް އޮންނަ ރަށެކެވެ. މި ރަށު މީހުން މީގެ ކުރިން މި ޚިދުމަތް ހޯދަމުން އައީ އެރަށް ކައިރިން ލެބޯރެޓަރީގެ ޚިދުމަތް މިހާރުލިބެންހުރި ރަށްރަށްކަމުގައިވާ ގއ. ގެމަނަފުށީ ސިއްހީ މަރުކަޒާއި ގދ. ގައްދޫ ޞިއްޙީ މަރުކަޒުންނެވެ. މިއީ ގާތްގަނޑަކަށް 20 މިނެޓުގެ ދަތުރެކެވެ.
އެހެންކަމުން، މި ޚިދުމަތް އެ ރަށުގައި ތަޢާރަފު ކުރުމުގެ ސަބަބުން އެ ރަށުގެ ރައްޔިތުންނަށް ވަރަށް ބޮޑު ލުއި ފަސޭހަކަމެއް ލިބިފައިވާ ކަމަށް މިނިސްޓްރީން މަޢުލޫމާތުދެއެވެ.
ގއ. އަތޮޅުގައި ލެބޯރެޓަރީގެ ޚިދުމަތް ލިބޭ ރަށްރަށަކީ ގއ. އަތޮޅު ހޮސްޕިޓަލާއި، ގއ. ގެމަނަފުށި ސިއްޙީ މަރުކަޒާއި، ގއ. ދާއްދޫ ސިއްޙީ މަރުކަޒާއި، ގއ. ދެއްވަދޫ ސިއްޙީ މަރުކަޒާއި، ގއ. ކޮލަމާފުށި ޞިއްޙީ މަރުކަޒުގެ އިތުރުން ގއ. ކަނޑުހުޅުދޫ ސިއްޙީ މަރުކަޒެވެ.
