ޔޫރޯ 2020 އަށް ފުރަތަމަ ކޮލިފައިވި ޓީމަކަށް ބެލްޖިއަމް ވެއްޖެއެވެ.

ބެލްޖިއަމް މުބާރާތަށް ކޮލިފައިވީ ކޮލިފައިންގެ ގްރޫޕް އައިގައި ސެން މެރީނޯއާ ދެކޮޅަށް ކުޅުނު މެޗު 0-9 ގެ ތަފާތުބޮޑު ނަތީޖާއަކުން ކާމިޔާބުކޮށްގެންނެވެ.

ބެލްޖިއަމް ދަނޑުގައި ކުޅުނު މި މެޗު ފެށިގެން 28 ވަނަ މިނެޓުގައި އެޓީމުން ވަނީ ލީޑު ނަގާފައެވެ. މި ލަނޑު ރޮމެލޫ ލުކާކޫ ކާމިޔާބުކުރިއިރު، އޭގެ ދެ މިނެޓު ފަހުން ޗަޑްލީ ވަނީ ލީޑު ފުޅާކޮށްދީފައެވެ.

ބެލްޖިއަމްގެ ތިންވަނަ ލަނޑު 35 ވަނަ މިނެޓުގައި ކާމިޔާބުކުރިއިރު، މި ލަނޑަކީ ސެން މެރީނޯގެ ބްރޮލީ އަތުން ބައިކޮޅަށް ވަތް ލަނޑެކެވެ. އެޓީމުގެ ހަތަރުވަނަ ލަނޑު 42 ވަނަ މިނެޓުގައި ކާމިޔާބުކުރީ ލުކާކޫއެވެ.

ބެލްޖިއަމްގެ ފަސްވަނަ ލަނޑު 45 ވަނަ މިނެޓުގައި އަލްޑަވައިލްޑް ކާމިޔާބުކުރިއިރު، ފުރަތަމަ ހާފްގެ އިތުރު ވަގުތުގައި ހަވަނަ ލަނޑު ކާމިޔާބުކުރީ ޓިއެލެމަންސްއެވެ.

ދެވަނަ ހާފް ފެށިގެން ސެން މެރީނޯއިން ރަނގަޅަށް ޑިފެންސް ކުރަން ފެށިއެވެ. އެގޮތުން ލަނޑު ޖެހުމަށް ބެލްޖިއަމްއަށް ހުރަސްތަކާ ކުރިމަތިވިއެވެ.

ނަމަވެސް 82 ވަނަ މިނެޓުގައި ބެލްޖިއަމްއިން ހަތްވަނަ ލަނޑު ވަނީ ޖަހާފައެވެ. މި ލަނޑު ކާމިޔާބުކުރީ ބެންޓެކޭއެވެ. އަދި 8 ވަނަ ލަނޑު 86 ވަނަ މިނެޓުގައި ވާސްޗެއެރެން ކާމިޔާބުރިއިރު، 9 ވަނަ ލަނޑު ކާމިޔާބުކުރީ ކަސްޓަގްނޭއެވެ.

މި ނަތީޖާއާއެކު ބެލްޖިއަމް ވަނީ ކުޅުނު ހަތް މެޗުން 21 ޕޮއިންޓް ހަމަކޮށްފައެވެ. ދެވަނައިގައި އޮތީ ހަތް މެޗުން 18 ޕޮއިންޓް ހޯދައިގެން ރަޝިއާއެވެ. ތިންވަނައިގައި ހަތް މެޗުން 10 ޕޮއިންޓް ހޯދައިގެން ސައިޕްރަސް އޮތްއިރު، ހަތަރު ވަނައިގައި ހަތް މެޗުން ހަތް ޕޮއިންޓް ހޯދައިގެން އޮތީ ކަޒަކިސްތާނެވެ. އަދި ފުލުގައި އޮތީ ހަ މެޗުން ހަ ޕޮއިންޓް ހޯދައިގެން ސްކޮޓްލޭންޑެވެ.

މުބާރާތުން ބެލްޖިއަމް ޖާގަ ހޯދިއިރު، އެޓީމަށް ކަޒަކަސްތާން އާއި ރަޝިއާ އަދި ސައިޕްރަސްއާ ދެކޮޅަށް ކުޅޭ މެޗު ބާކީ އެބައޮތެވެ.