އެމްޑީއެންއާ މެދު ފިޔަވަޅު އަޅަންޖެހޭ: ރައީސް ނަޝީދު
11 އޮކްޓޯބަރު 2019 | ހުކުރު 06:24ހަނގުރާމައަށް މީހުން ފޮނުވާ ފަރާތްތަކާ މެދު ފިޔަވަޅު އަޅަންޖެހޭ
ރައީސް އިބްރާހިމް މުހައްމަދު ސޯލިހް، އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
މޯލްޑިވިއަން ޑިމޮކްރަސީ ނެޓްވަރކް (އެމްޑީއެން) އާ މެދު ފިޔަވަޅު އަޅަންޖެހޭ ކަމަށް ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އެމްޑީއެންއިން ނެރެފައިވާ ރިޕޯޓަކީ އިސްލާމް ދީނާމެދު ނަފްރަތު އުފެއްދުމުގެ މާނާގައި ލިޔެފައިވާ ރިޕޯޓެއް ނޫންކަމަށް ވިދާޅުވުމާއި ގުޅިގެން ގިނަބައެއްގެ ފާޑު ކިޔުން އަމާޒުވެފައިވަނިކޮށްށެވެ. ބުދަ ދުވަހުގެރޭ އިސްކަންދަރު ސްކޫލުގައި، ޝަހީހު މުސްލިމުގެ ދިވެހި ތަރުޖަމާ އާއި ޝަރަހައިގެ 10 ވަނަ ބައި ނެރެދެއްވާ ދެއްކެވި ވާހަކަފުޅުގައި ރައީސް ނަޝީދު ވިދާޅުވީ އެމްޑީއެން އިން ނެރުނު ރިޕޯޓުގައި އިސްލާމްދީނުގެ ގަދަރާއި އިއްޒަތް ގެއްލޭގޮތަށް ބަހުގެ ހަމަތައް ގެންގުޅެފައި ހުރީ ގަސްތުގައި އިސްލާމްދީނަށް ނަފްރަތު އުފައްދައި ބަލިކަށިކޮށްލުމުގެ މާނައިގައި ކަމަށް ފެނިވަޑައިނުގަންނަވާ ކަމަށެވެ. އަދި ރިޕޯޓުގައި ގެންގުޅުނު ބަސް މަގު ގޯސްކަން ފާހަގަކުރައްވަމުން އެމަނިކުފާނު ވިދާޅުވީ އެ ބަސް މަގު އެމްޑީއެންގެ ރިޕޯޓުގައި ގެންގުޅެފައި ވަނީ ގަސްތުގައި ކަމަކަށް އެމަނިކުފާނު ގަބޫލުނުކުރައްވާކަމަށެވެ.
ބުރާސްފަތި ދުވަހު ކުރެއްވި ޓްވީޓެއްގައި ވިދާޅުވީ އެމްޑީއެން އާއި މެދުވެސް ފިޔަވަޅު އަޅަންޖެހޭކަމަށެވެ. އަދި ހަނގުރާމައަށް މީހުން ފޮނުވާ ފަރާތްތަކާއި މެދު ވެސް އަދި ގޮތް ނޭނގޭ މަރުތަކާއި ގުޅޭ މީހުންނާއި މެދުވެސް ފިޔަވަޅު އަޅަންޖެހޭ ކަމަށް އެމަނިކުފާނު ވިދާޅުވި އެވެ.
އެމްޑީއެންއާ މެދު ފިޔަވަޅު އަޅަންޖެހޭ ކަމަށް ނަޝީދު ވިދާޅުވެފައިވާއިރު، އެޖަމްއިއްޔާއާ މެދު ފިޔަވަޅު އަޅުއްވާނެ ކަމުގެ ޔަގީންކަން ރައީސް އިބްރާހިމް މުހައްމަދު ސޯލިހް ދެއްވާފައިވާ ކަމަށް ދީނީ އިލްމުވެރިން ބުނެފައިވެއެވެ. ''ޕްރީލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސްގެ'' ނަމުގައި އެމްޑީއެން ފަރާތުން އާންމުކުރި ރިޕޯޓުގައި ﷲ އަށާއި ރަސޫލާ އަށް ފުރުއްސާރަކޮށްފައިވާތީ އެ ޖަމިއްޔާގެ ހަރަކާތްތައް ވަގުތީ ގޮތުން ހުއްޓާލަމަށް ޖަމިއްޔާތަކުގެ ބެލެނިވެރިފަރާތް ކަމަށްވާ ޔޫތް މިނިސްޓްރީން، އެ ޖަމްއިއްޔާއަށް ވަނީ އަންގާފައެވެ.
ޔޫތް މިނިސްޓްރީން ބުރާސްފަތި ދުވަހު ނެރެފައިވާ ބަޔާނެއްގައި ބުނީ، އެމްޑީއެން އިން ނެރެފައިވާ ރިޕޯޓުގައި އިސްލާމްދީނަށާއި، ކީރިތި ރަސޫލާ އަށް ފުރުއްސާރަކޮށްފައިވާ ކަމަށް ތުހުމަތުގައި ފުލުހަށް ހުށައެޅިފައިވާ މައްސަލަ ތަހުގީގު ކުރަމުންދާތީވެ ޖަމިއްޔާތަކާބެހޭ ރަޖިސްޓަރ އަށް ލިބިފައިވާ އިހްތިޔާރުގެ ދަށުން ބުރާސްފަތި ދުވަހުން ފެށިގެން ޖަމިއްޔާގެ ހަރަކާތްތައް ހުއްޓާލަން އަންގާފައިވާ ކަމަށެވެ.
އެމްޑީއެންގެ ރިޕޯޓާއި ގުޅިގެން އެ ޖަމްއިއްޔާއިން ވަނީ އެ ރިޕޯޓު ނަގައި އެކަމަށް މާފަށް އެދި އެފަދަ ކަމެއް ތަކުރާރު ނުވާނެ ކަމަށް ބުނެފައެވެ. އަދި އެ ޖަމްއިއްޔާގެ މެމްބަރުންގެ ތެރޭގައި ހިމެނޭ ރައީސް އޮފީހުގެ އެންޓި ޓެރަރިޒަމް ކޮންސަލްޓެންޓް ނޫޝިން ވަހީދު ވަނީ އެމްޑީއެންގެ މެމްބަރު ކަމުން ވަކިވެފައެވެ.
ދީނަށް ފުރައްސާރަކޮށް ކޮށްފައިވާ ރިޕޯޓާއި ގުޅިގެން އިސްލާމިކް މިނިސްޓްރީން ބުނެފައިވަނީ އެ ރިޕޯޓްގެ މައްސަލަ 2016 ވަނަ އަހަރު ބަޔަކު ހުށައެޅި ކަމަށާއި، އެކަމަކު އޭރު އެ މައްސަލަ ބަލާފައިނުވާ ކަމަށެވެ.
