އަންބަރީ ނަމަކަށްކިޔާ ދިވެހިރާއްޖޭގެ މަސްދޯންޏެއް އިންޑިއާގެ ކަނޑުގެ ސަރަހައްދަށް ވަދެއުޅެނިކޮށް އިންޑިޔާގެ ކޯސްޓު ގާޑުން ހިފަހައްޓައިފިއެވެ.
މައުލޫމާތު ލިބިފައިވާ ގޮތުން އެ ދޯނި އަތުލައިގަނެފައިވަނީ މަލިކާއި 3 މޭލު ބޭރުންނެވެ. އަދި މި މައްސަލަ މިހާރު އިންޑިއާގެ މެރިން ޕޮލިހުން އަންނަނީ ތަހުގީގު ކުރަމުންނެވެ.
މިއަހަރުގެ ފެބްރުއަރީ މަހު ވެސް އިންޑިއާ ކަނޑުގެ ސަރަހައްދުން ދިވެހި މަސްދޯންޏެއް ވަނީ އަތުލައިގަނެފައެވެ. ނަމަވެސް އިންޑިއާ ކަނޑުގެ ސަރަހައްދުން ހިފެހެއްޓި މަސްދޯނި ވަނީ އެއްވެސް ފިޔަވަޅެއް ނާޅާ ދޫކޮށްލައިފައެވެ. އެމްއެންޑީއެފް އިން ބުނީ އެ ފަހަރު މަސްދޯނި އިންޑިއާގެ ސިފައިން ދޫކޮށްލީ ރާއްޖެއާއި އިންޑިއާ އާއި ދެމެދު އޮންނަ އެކުވެރިކަމުގެ ގުޅުމުގެ ސަބަބުން ކަމަށެވެ.
ރާއްޖޭގެ މަސްވެރިން އަވައްޓެރި ގައުމުތަކުގެ ކަނޑުގެ ސަރަހައްދަށް ނުވަދުމަށް އެމްއެންޑީއެފްއިން އަންނަނީ އިލްތިމާސް ކުރަމުންނެވެ.
މިއީ މިގޮތަށް އިންޑިއާ ކަނޑުގެ ސަރަހައްދުން އިންޑިއާ ސިފައިން ހިފެހެއްޓި ދެވަނަ މަސްދޯނިއެވެ.
