ޕްލޭން ތަންފީޒު ކުރުމަށް ޝަރުއީ ދާއިރާ އާއި މަޖިލީހުން އެއްބާރުލުން ދިނުމަށް ރައީސް އެދިވަޑައިގެންފި
ގިނަ ބިލްތަކެއް ވަނީ ފާސްކޮށްފައި
ސަރުކާރުގެ ފަސް އަހަރުގެ ސްޓްރެޓިކް އެކްޝަން ޕްލޭން އިފްތިތާހުކުރުމުގެ ރަސްމިއްޔާތުގައި ރައީސް ސޯލިހު ވާހަކަފުޅު ދައްކަވަނީ
މި ސަރުކާރުން ފަސް އަހަރު ތެރޭގައި ކުރާނެ ކަންތައްތައް ތަކަށް އެކުލެވައިލި ''ސްޓްރެޓެޖިކް'' ޕްލޭން ތަންފީޒު ކުރުމަށް ރައްޔިތުންގެ މަޖިލީހުންނާއި ޝަރުއީ ދާއިރާގެ އެއްބާރުލުން ދިނުމަށް ރައީސް ސޯލިހު އެދިވަޑައިގެންފިއެވެ.
ރައީސް މިހެން އެދިވަޑައިގަތީ ބުރާސްފަތި ދުވަހު ސަރުކާރުގެ ''އެސްއޭޕީ'' އިފްތިތާހު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އެސްއޭޕީ ތައްޔާރު ކޮށްފައިވަނީ، ސަރުކާރުގެ އެކި އިދާރާތަކާއި، ދައުލަތުގެ އެކި މުއައްސަސާތައް އަދި ސަރުކާރު ހިއްސާވާ ކުންފުނިތަކުގެ އިތުރުން މަދަނީ ޖަމްއިއްޔާތަކުގެ ހުށަހެޅުންތަކުގެ މައްޗަށް ބިނާކޮށެވެ.
މަޖިލީހާ ޝަރުއީ ދާއިރާގެ އެއްބާރުލުން ބޭނުންފުޅުވާ ކަމަށް ރައީސް ވިދާޅުވެފައިވާއިރު, 19 ވަނަ މަޖިލީސް އިންތިހާބުވުމަށް ފަހު ސަރުކާރުން ވަނީ މަޖިލީހަށް ގިނަ ބިލްތަކެއް ހުށައަޅާފައެވެ.
އެގޮތުން ނަވާރަ ވަނަ މަޖިލީހުގެ ފުރަތަމަ ދައުރުގެ ޖަލްސާތައް ނިންމާލިއިރު މުހިއްމު ބިލްތަކެއް ފާސްކޮށްފައިވާ އިރު، އޭގެ ތެރޭގައި ރިޔާސީ ކޮމިޝަންތަކަށް ބާރުދޭ ބިލާއި، މަސްވެރިކަމުގެ ބިލުގެ އިތުރުން އެޖެންޑާ 19 ގައި ހިމެނޭ ގިނަ ބިލްތަކެއް ވަނީ ފާސްކޮށްފައެެވެ. ދެވަނަ ދައުރުގެ ޖަލްސާތައް ފަށާފައި ވަނީ ބުރާސްފަތި ދުވަހުގައެވެ.
ވެރިކަން ކުރާ މައި ޕާޓީގެ ޢައުލަބިއްޔަތު އޮންނަ ރައްޔިތުންގެ މަޖިލީހުގެ ރައީސް މުހައްމަދު ނަޝީދު، މަޖިލީހުގެ ފުރަތަމަ ދައުރަށް ދެއްްވާފައިވަނީ ''ބީ ޕްލަސް'' އެކެވެ. ރައީސް ނަޝީދު އާއި ރައީސް ސޯލިހުއާއި ދެމެދު ނުތަނަވަސްކަމެއް އުފެދިގެން އުޅޭ ކަމަށް ދާދި ފަހުން ވަނީ އަޑުފެތުރު ކަމުގައިވީ ނަމަވެސް، ރައީސް ސޯލިހު ވަނީ އެ ވާހަކަތައް ދޮގުކުރައްވާފައެވެ.
އެމްޑީޕީ މެނިފެސްޓޯގައި ހިމެނިގެން ޝަރުއީ ދާއިރާ އިސްލާހު ކުރުމުގެ މަސައްކަތްވެސް ދަނީ ވަރަށް ބާރަށް ކުރަމުންނެވެ. އެމްޑީޕީން ދެކޭ ގޮތުގައި ''ކިލަނބުވެފައިވާ'' ޝަރުއީ ދާއިރާ އިސްލާހު ކުރެވޭނީ ފަނޑިޔާރުގެ އިސްލާހު ކޮށްގެންނެވެ. ޖުޑީޝަލް ސަރވިސް ކޮމިޝަނުން ގެންދަނީ، މީގެ ކުރިން ފަނޑިޔާރުންނާއި ބެހޭ ގޮތުން އެ ކޮމިޝަނަށް ހުށައެޅިފައިވާ ގިނަ މައްސަލަތަކެއް ބަލައި ތަހުގީގު ކުރަމުންނެވެ.
އެގޮތުން މިހާރުވެސް ގިނަ ފަނޑިޔާރުންގެ މައްސަލަތަކެއް ބަލަމުންދާއިރު، ފުރަތަމަ ފަހަރަށް މަޖިލީހުން ރުހުންދީގެން ސުޕްރީމް ކޯޓުގެ ފަނޑިޔާރަކު ވަނީ މަގާމުން ވަކިކޮށްފައެެވެ. އެމްއެމްޕީއާރްސީގެ ހިޔާނާތުގެ ފައިސާގައި ހިފި ކަމުގެ ތުހުމަތު ކުރެވިގެން ފަނޑިޔާރު އަބްދުﷲ ދީދީ މަގާމުން ވަކިކޮށްފައިވަނީ މަޖިލީހުގެ ފުރިހަމަ އަޢްލަބިއްޔަތުންނެވެ. ރައްޔިތުންގެ މަޖިލީހުން ވަނީ ސުޕްރީމް ކޯޓުގެ ހުސްވެފައިވާ ދެ މަގާމަށް ފުރަތަމަ ފަހަރަށް ދެ އަންހެން ބޭފުޅުން އައްޔަން ކުރައްވާފައެވެ.
