އަލިފާނުގެ ހާދިސާގައި ހާލުގައި ޖެހުނު މީހުންނަށް ފެނަކައިން އެއްމިލިއަން ރުފިޔާ ހަދިޔާކޮށްފި
3 އޮކްޓޯބަރު 2019 | ބުރާސްފަތި 04:46ހާލުގައި ޖެހުނު މީހުންނަށް ފައިސާ ހަވާލުކޮށްދޭނެ
ފައިސާ ދިނުމަށް ބޭއްވި ރަސްމިއްޔާތުގެ ތެރެއިން
ހެންވޭރު އަބަދަށްފެހި ހިނގި އަލިފާނުގެ ހާދިސާގައި ހާލުގައި ޖެހުނު ފަރާތްތަކަށް ފެނަކަ ކޯޕަރޭޝަންގެ މުވައްޒިފުންގެ ފަރާތުން އެއް މިލިއަން ރުފިޔާ ހަދިޔާ ކޮށްފި އެވެ.
ބުދަ ދުވަހުގެ ރޭ ފެނަކަ ކޯޕަރޭޝަންގެ އޮފީހުގައި ބޭއްވި ރަސްމިއްޔާތެއްގައި ޑިފެންސް މިނިސްޓަރު މާރިޔާ އަހްމަދު ދީދީއަށް ފައިސާ ހަވާލު ކޮށްދެއްވީ ފެނަކަ ކޯޕްރޭޝަންގެ މެނޭޖިން ޑިރެކްޓަރު އަހްމަދު ސައީދު މުހައްމަދެވެ.
ފައިސާ ހަވާލުކޮށްދެއްވާ ވާހަކަދައްކަވަމުން ސައީދު ވިދާޅުވީ ފެނަކައިގެ މުވައްޒަފުންނަކީ އަބަދުވެސް އިންސާނިއްޔަތަށްޓަކައި މަސައްކަތް ކުރާ ބައެއް ކަމަށާއި، މިފަދަ ހިތާވެރި ހާދިސާތަކުގައި ރައްޔިތުންނަށް ވަރަށް ގާތުން އެހީތެރިކަން ފޯރުކޮށްދޭން ބޭނުންވާ ބައެއް ކަމަށެވެ.
ފެނަކައިގެ މުއައްޒަފުންގެ ފަރާތުން އެއްމިލިއަން ރުފިޔާ ހަދިޔާކުރުމާ ގުޅިގެން ޝުކުރު އަދާކުރައްވާ ޑިފެންސް މިނިސްޓަރު މާރިޔާ ވިދާޅުވީ މުއައްޒަފުންތަކެއް އަމިއްލަ އިސްނެގުމުގެ މަތިން މިފަދަ ބޮޑު ކަމެއް ކުރެއްވުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށެވެ. އަދި މިހާދިސާގައި ހާލުގައި ޖެހުނު އާއިލާތަކަށް މިފައިސާ ފޯރުކޮށްދޭނެ ކަމަށެވެ.
މިރަސްމިއްޔާތުގައި ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް ހިސާން ހަސަން ވިދާޅުވީ ފެނަކައިގެ މުއައްޒަފުންނާއެކު ރައްޔިތުންނަށް އެހީވުމަށް ކުރާ މަސައްކަތުގައި ވަރަށް ގާތުން މަސައްކަތް ކުރެވޭ ކަމަށާއި، ފެނަކައިގެ މުއައްޒަފުންނަކީ ލާމަސީލު ބައެއް ކަމަށެވެ.
މީގެ އިތުރުން ހިސާން ވިދާޅުވީ ރައީސް ސޯލިހު ސަރުކާރު އައުމާއެކު ޑިޒާސްޓަރ މެނޭޖްމަންޓް އޮތޯރިޓީގެ މަސައްކަތްތައް ވަރަށް ތަރުތީބު ކުރެވިފައިވާ ކަމަށާއި، ރައްޔިތުންނަށް އެހީވުމަށް ފަންޑު ގާއިމް ކުރެވިފައިވާ ކަމަށެވެ. އަދި ދެފުށް ފެންނަ ގޮތަށް ފައިސާގެ ކަންކަން ހަމަޖެހިގެންދާއިރު ވަކި ގަވާއިދުތަކާއި އުސޫލުތައް ކަނޑައެޅިފައިވާ ކަމަށެވެ.
ހ.ތިލަފުށީ ގޭގައި ހުރި ކެމިކަލް ގުދަނުގައި ރޯވީ، ސެޕްޓެންބަރު މަހުގެ 20 ވަނަ ދުވަހު އެވެ. މިހާދިސާގައި އެކަކު ނިޔާވެފައިވާއިރު، އެ ސަރަހައްދުގެ 26 ގެއަކަށް އެކިވަރުގެ ގެއްލުންވެ، 400 އަށްވުރެ ގިނަ މީހުން ވަނީ ހާލުގައި ޖެހިފައެވެ.
