އިޔާދަކުރަނިވި ހަކަތައިން ކަރަންޓް އުފެެއްދުމުގެ ފުރަތަމަ މަރްހަލާގެ 30 އިންސައްތަ ނިމިއްޖެ: ޑރ ހުސެއިން
އަމާޒަކީ 2030 ވަނަ އަހަރު އަންނައިރު ކަރަންޓްގެ 70 ޕަސެންޓް އިއާދަކުރަނިވި ހަކަތައިން ބޭނުންކުރުން ކަމަށް
އެންވަޔަރަމަންޓް މިނިސްޓަރ ޑރ ހުސެއިން ރައްޔިތުންގެ މަޖިލީހުގައި
އިޔާދަކުރަނިވި ހަކަތައިން ކަރަންޓް އުފެއްދުމަށް ކުރަމުން އަންނަ މަސައްކަތުގެ ފުރަތަމަ މަރްހަލާގެ 30 އިންސައްތަ މަސައްކަތަށް ބޭނުންވާ ފާއިސާގެ ލިބިފައިވާކަމަށް އެންވަޔަރަމަންޓް މިނިސްޓަރ ޑރ ހުސެއިން ރަޝީދު ވިދާޅުވެއްޖެއެވެ.
އިއާދަކުރަނިވި ހަކަތައިން ކަރަންޓް އުފެއްދާ ނިޒާމްތައް ނެޓް މީޓަރިންގ އުސޫލުން ކަރަންޓްގެ ވިއުގައަށް ގުޅާލުމާއިބެހޭ ގަވާއިދު އިސްލާހުކުރުމާއި ގުޅޭގޮތުން އެންވަޔަރަމެންޓް މިނިސްޓްރީގެ އިސްބޭފުޅުންނާއި، ރައްޔިތުންގެ މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީން ބުދަ ދުވަހު ވަނީ ބައްދަލުކޮށްފައެވެ.
ކޮމިޓީގައި ވާހަކަދައްކަވަމުން މިނިސްޓަރ ވިދާޅުވީ ފުރަތަމަ މަރްހަލާގައި އެކަމަށް ބޭނުންވާ ހަކަތަ އުފެއްދުމުގެ މަސައްކަތަށް ބޭނުންވާ ފާއިސާ ތަފާތު ޕްރޮޖެކްޓްތަކުން ލިބިފައިވާ ކަމަށެވެ. އަދި ލ، ފުވައްމުލަކުގައި 30 ޕަސެންޓަށްވުރެވެސް މައްޗަށް އިއާދަކުރަނިވި ހަކަތައިން ކަރަންޓް އުފެއްދުމުގެ މަސައްކަތް ކުރަމުން އަންނަ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މި މަޝްރޫއުގެ މަސައްކަތް ކުރިއަށް ގެންދާނީ ބިޑަށް ހުޅުވާލައިގެން ނޫން ކަމަށާއި، ފާއިސާ ހޯދައިގެން ޕްރޯއެކްޓިވްކޮށް އެނާރޖީ ޖަހައިދިނުމަށްފަހު، ޔުޓިލިޓީ ކުންފުނިތަކާއި ހަވާލުކުރާނީ ކަމަށެވެ.
މިނިސްޓަރ ވިދާޅުވީ އިއުލާންކޮށްގެން އެނާރޖީ އަމިއްލަ ޚަރަދުގައި ޖެހީމައި ކަރަންޓް ގަތުމުގެ ކަންތައް ކުރަމުން އަންނަ ކަމަށާއި، އެގޮތުން މާލެ ސަރަހައްދުގައި ދެ ކޮންޓްރަކްޓަރަކާއި އެކު މިނިސްޓްރީން އެ މަސައްކަތް ކުރަމުން އަންނަ ކަމަށެވެ. އަދި އެ މޮޑެލް އިތުރަށް ފުޅާކުރަން ބޭނުންވާކަމަށްވެސް މިނިސްޓަރ ވިދާޅުވިއެވެ. އެ މޮޑެލް ފުޅާކުރުމުން މިހާރު އަމިއްލައަށް ފާއިސާ ހޯދައިގެން މި ހިންގާ ވަރަށްވުރެ އަވަހަށް ސަރުކާރުން ބޭނުންވާ ޓާރގެޓަށް ވާސިލްވެވޭނެ ކަމަށް މިނިސްޓަރ ވިދާޅުވިއެވެ.
އިއާދަކުރަނިވި ހަކަތަ ބޭނުންކޮށްގެން ކަރަންޓް އުފެއްދުމުގެ ނިޒާމަށް ދިޔުމުގެ މަސައްކަތް ކުރިއަށް އޮތްތާގައި ވަރަށް ބާރު ސްޕީޑްގައި ކުރިއަށްދާނެ ކަމަށް މިނިސްޓަރ ވަނީ ވިދާޅުވެފައެވެ.
ރައްޔިތުންނަށް ހެޔޮ އަގުގައި ކަރަންޓް ފޯރުކޮށްދިނުމަށް އިއާދަކުރަނިވި ހަކަތަ ބޭނުންކޮށްގެން ކަރަންޓް އުފެއްދޭ އެންމެ މަތީ މިންވަރަށް ކަރަންޓް އުފެއްދުމުގެ މަސައްކަތް ކުރިއަށް ގެންދިޔުމަށް ކޮމިޓީން ވަނީ މިނިސްޓަރ އަރިހުގައި އެދިވަޑައިގެންފައެވެ.
ޖަޒީރާ މެނިފެސްޓޯގައި އޮންނަނީ ދެމެހެއްޓެނިވި ގޮތެއްގައި ކަރަންޓް އަގު ހެޔޮ ކުރުން ކަމަށާއި، މިނިސްޓްރީގެ މަސައްކަތް ބައްޓަންވާންޖެހޭނީ އެގޮތަށް ކަމަށް ކޮމިޓީގެ މެމްބަރުން ވަނީ ވިދާޅުވެފައެވެ. އަދި އެ ނޫން ނިޒާމަކަށް ކަންތައް ކުރިއަށްދާނަމަ ކޮމިޓީގެ އެއްވެސް އެއްބާރުލުމެއް މިނިސްޓްރީއަށް ނުލިބޭނެ ކަމަށް ކޮމިޓީގެ މެމްބަރުން ވަނީ ވިދާޅުވެފައެވެ. ކުންފުނިތަކުގެ ފާއިދާއަށް ވުރެ މުޅި ސިޔާސަތު އެކުލަވާލުމުގައި ވިސްނުން ބަހައްޓަންޖެހެނީ ރައްޔިތުންގެ ލާބަޔާއި މަންފާއަށް ކަމަށާއި، ޖަޒީރާ ރާއްޖޭގެ މެނިފެސްޓޯގައިވެސް އަދި އެޖެންޑާ 19 ގައިވެސް އެކަން އޮތީ އެގޮތަށް ކަމަށް ކޮމިޓީގެ މެމްބަރުން ވަނީ މިނިސްޓްރީގެ ބޭފުޅުންނާއި އެކު ބޭއްވި ބައްދަލުވުމުގައި ވިދާޅުވެފައެވެ. ކޮމިޓީގެ މެމްބަރުން ވަނީ އަކުރުން އަކުރަށް ފިލިން ފިއްޔަށް އެޖެންޑާ 19 ގައި ހިމެނޭ ކަންތައް ތަންފީޒްކޮށްދެއްވުމަށް މިނިސްޓަރ އަރިހުގައި އެދިވަޑައިގެންފައެވެ.
މިިނިސްޓަރ ވިދާޅުވީ އަމާޒަކީ 2030 ވަނަ އަހަރު އަންނައިރު ކަރަންޓްގެ 70 ޕަސެންޓް އިއާދަކުރަނިވި ހަކަތައިން ބޭނުންކުރުން ކަމަށެވެ.
