މާލޭގައި ހިނގި ދެ އަލުފާނުގެ ހާދިސާއަކީ ޓެރެރިޒަމާއި ގުޅުންހުރި ހާދިސާތަކެއް ނޫން: ފުލުހުން
2 އޮކްޓޯބަރު 2019 | ބުދަ 13:33އަލިފާން އެންމެ ފުރަތަމަ ރޯވީ ހ. ތިލަފުށީގޭގައިކަން ވަނީ ކަށަވަރުކުރެވިފައި
އަބަދަށްފެހި މަގުގައި ހިނގި އަލިފާނުގެ ހާދިސާގެ ތެރެއިން
ފުލުހުން މިހާތަނަށް ހިންގާފައިވާ ތަހުގީގުތަކުން މާލޭގައި މިދިޔަ މަހު ހިނގި ދެ އަލިފާނުގެ ހާދިސާއަކީ ޓެރެރިޒަމާއި ގުޅުންހުރި ހާދިސާއެއް ނޫންކަން އެނގިފައިވާކަމަށް ފުލުހުންގެ އިދާރާއިން ބުނެފި އެވެ.
ބުދަ ދުވަހުގެ މެންދުރުފަހު ފުލުހުންގެ އިދާރާއިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޗީފް ސުޕްރިންޓެންޓް އޮފް ޕޮލިސް މުހައްމަދު ބަޝީރު ވިދާޅުވީ މިހާތަނަށް ސެޕްޓެމްބަރު 20 ވަނަ ދުވަހު މާލޭގައި ހިނގައިދިޔަ އަލިފާނުގެ ހިތާމަވެރި ހާދިސާއާއި ގުޅިގެން 21 ތަނެއް ބަލައި ފާސްކޮށްފައިވާނެކަމަށެވެ. އަދި އޭގެތެރެއިން 118 އެޕާޓްމަންޓެއް އެކި ފަހަރުމަތިން ވަރަށް ޑީޓެއިލް ކޮށް ބަލައި ފާސްކޮށްފައިވާނެކަމަށް އޭނާ ވިދާޅުވި އެވެ.
މިހާތަނަށް އެސަރަހައްދުގައި ދިރިއުޅޭ ފަރާތްތަކާއި އެ ސަރަހައްދަށް ހާދިސާ ހިނގި އިރުގައި ތިބި 20 ފަރާތެއްގެ މައުލޫމާތު ސާފުކުރެވި މަންޒަރު ދުށް ފަރާތުގެ ގޮތުގައި 23 ފަރާތަކާއި ވާހަކަދައްކައި މައުލޫމާތު ސާފުކޮށްފައިވާކަމަށް ބަޝީރު ވިދާޅުވި އެވެ. އަދި އަލިފާން ރޯވި ސަބަބު ދެނެގަތުމަށްޓަކައި އެ ސަރަހައްދުގައިވާ އިމާރާތްތަކުގެ ކެމެރާތަކުން 27 ފުޓޭޖްއެއް ނެގިފާއިވާއިރު އޭގެތެރެއިން 25 ފުޓޭޖް އެއް މިވަގުތު އެނަލައިޒްކޮށް މައުލޫމާތު ނަގާފައިވާކަމަށް އޭނާ ވިދާޅުވި އެވެ.
މިހާތަނަށް ބެލި ބެލުމުން ގުދަނުގައި 12 ވައްތަރެއްގެ ކެމިކަލް ރައްކާކުރެވިފައި ހުރިކަމަށް އެނގޭކަމަށާއި އެކި ތަންތަން ސާފުކުރުމަށާއި އެއްޗެހި ދޮވުމަށް ބޭނުންކުރާ ކެމިކަލްތައް ފެނިފައިވާ ކަމަށް ފުލުހުން ވަނީ ބުނެފައެވެ. އަދި އަލިފާނުގެ ހާދިސާ ހިނގި ދެވަނަ ގުދަނުގައި ހުރީ ކެއުމަށް ބޭނުންކުރާ ތަކެތި ކަމަށް ވެސް ފުލުހުން ވަނީ ބުނެފައެވެ.
ތަފްސީލްތައް އިތުރަށް ހާމަކުރައްވަމުން ފުލުހުން ބުނެފައިވަނީ މިހާތަނަށް ހޯދުނު ހޯދުންތަކުން އެންމެ ފުރަތަމަ އަލިފާން ރޯވެފައިވަނީ ހ. ތިލަފުށީގޭގައި ހުރި ގުދަނެއްގައި ކަން ކަށަވަރުކުރެވިފައިވާކަމަށެވެ. ފުލުހުން ބުނެފައިވަނީ ގުދަނުގައި ހުރި ހުރިހާ ކެމިކަލްތަކަކީ ހުއްދަ ދެވިގެން އެތެރެކޮށްފައިވާ އެއްޗެހި ކަމަށާއި އަދި އެ ފަރާތްތަކަށް ޑިފެންސް މިނިސްޓްރީން މިދިޔަ އަހަރު ގުދަންކުރުމަށް ހުއްދަ ދީފައިވާކަން ފާހަގަ ކުރެވިފައިވާކަމަށެވެ.
އަލިފާނުގެ ހާދިސާގައި މަރުވި ޝައުނާ މަރުވި ގޮތުގެ މައުލޫމާތު ހިއްސާކުރުމުން ފުލުހުން ބުނެފައިވަނީ އެންމެ ފަހުން ޝައުނާ އާއި އާއިލާއިން މުއާމަލާތްކުރެވިފައިވަނީ 7:24 ގައި ކަމަށް އާއިލާއިން މައުލޫމާތު ދީފައިވާކަމަށެވެ. އެއާއެކު ފުލުހުންނާއި ސިފައިން ގުޅިގެން ކުރި މަސައްކަތުން ޝައުނާގެ ހަށިގަނޑު ފެނިފައިވަނީ އެ ރޭ 11:20 ހާއިރު ކަމަށެވެ. މިހާތަނަށް ފުލުހުން ބެލި ބެލުމުންނާއި ކުރި ތަހުގީގުން އަލިފާން ރޯވުމުގައި އެއްވެސް މީހެއްގެ އިހުމާލެއް ނުވަތަ ގަސްތުގައި ރޯކޮށްފައިވާކަމުގެ އެއްވެސް މައުލޫމާތެއް ލިބިފައިނުވާކަމަށް ފުލުހުން ވަނީ ބުނެފައެވެ.
މީގެއިތުރުން ސެޕްޓެމްބަރު 30 ގައި ހިނގި ހާދިސާގެ މައުލޫމާތު ހިއްސާކުރަމުން ފުލުހުން ބުނެފައިވަނީ މިހާތަނަށް ލިބިފައިވާ މައުލޫމާތުތަކުން އަލިފާން ފުރަތަމަ ރޯވެފައިވަނީ ނެވި ލޯންޗުގައިކަން ކަށްވަރުވެފައިވާކަމަށެވެ. އަދި މަންޒަރު ދުށް ފަރާތްތަކުން މައުލޫމާތު ދީފައިވާގޮތުގައި ލޯންޗުގައި އެއިރު ތިބި ބައެއް ފަރާތްތަކުން ދުންފަތުގެ އިސްތިއުމާލުކޮށްފައިވާކަމަށް ބަޝީރު ވިދާޅުވި އެވެ. ނަމަވެސް އެ ހާދިސާ ހިނގީ އެ ސަބަބާހުރެކަމެއް، އެ ފަރާތްތަކުގެ ބަހެއް ނެގިފައި ނުވާތީ ދަންނަވަން ނޭނގޭ ކަމަށާއި އެ މައުލޫމާތު ހޯދުމަށް ފަހު އެކަން ކަށަވަރު ވެގެންދާނެކަމަށް ފުލުހުން ބުނެއެވެ.
ފުލުހުން ދަނީ އިތުރަށް އެ މައްސަލަ ތަހުގީގު ކުރަމުންނެވެ.
