ފ. އަތޮޅުގެ ނަން "ސައުދީ އަތޮޅަށް" ބަދަލުކޮށްފި!؟
މެންބަރުން މުބީން ފޭސްބުކްގައި ކުރެއްވި ޕޯސްޓެއް
ފ. އަތޮޅުގައި ކުރިން މީހުން ދިރިއުޅުނު، ހިމިތި
ފ. އަތޮޅުގެ ނަން "ސައުދީ އަތޮޅަށް"، ރައްޔިތުންގެ މަޖިލީހުގެ ފ. ބިލެތްދޫ ދާއިރާގެ މެންބަރު އަހުމަދު މުބީން ބަދަލު ކުރައްވައިފި އެވެ.
ކުރިއަށް އޮތް ލޯކަލް ކައުންސިލް އިންތިޚާބުގެ ކެމްޕޭނަށް ފ. އަތޮޅަށް ވަޑައިގަތުމަށް ލޯންޗެއްގައި ހުންނަވައިގެން ނަންގަވާފައިވާ ފޮޓޯތަކަކާއެކު މުބީން އޭނާގެ ފޭސްބުކްގައި ހުކުރު ދުވަހު ލިޔުއްވާފައިވަނީ، "ލޯކަލް ކައުންސިލް އިންތިހާބުގެ ފ. އަތޮޅުގެ ކެމްޕެއިން ލޯންޗު ކުރުމަށް ސައުދީ އަތޮޅަށް ދަތުރުކުރަނީ" ކަމަށެވެ.
"ސައުދީ އަތޮޅަށް" ދަތުރުކުރައްވަނީ ކަމަށް ވިދާޅުވެ މުބީން ކުރެއްވި ޕޯސްޓުގައި ރައްޔިތުންގެ މަޖިލީހުގެ މެންބަރުންނާއި މިނިސްޓަރުންގެ އިތުރުން ސަރުކާރުގެ އެކި މަގާމުތައް ފުރުއްވާ ބޭފުޅުންގެ ފޮޓޯ އެޓޭޗް ކޮށްފައިވެ އެވެ.
އެގޮތުން، ނިލަންދޫ ދާއިރާގެ މެންބަރު އަބްދުﷲ ޚަލީލާއި، ފޮނަދޫ ދާއިރާގެ މެންބަރު އަދި ޕީޕީއެމްގެ ނައިބު ރައީސް އަބްދުއްރަހީމް އަބްދުﷲ އާއި، ގުރައިދޫ ދާއިރާގެ މެންބަރު އިބްރާހިމް ރިޒާއާއި، އެންވަޔަރަމެންޓް މިނިސްޓަރު ތޯރިގް އިބްރާހިމާއި، އެޑިއުކޭޝަން މިނިސްޓަރު ޑރ. އާއިޝަތު ޝިހާމްގެ އިތުރުން އިސްލާމިކް މިނިސްޓްރީގެ ސްޓޭޓް މިނިސްޓަރު އަލީ ވަހީދު އެ ފޮޓޯތަކުން ފެނެ އެވެ.
މުބީން ފޭސްބުކް ގައި ކުރައްވާފައިވާ ޕޯސްޓް
ފ. އަތޮޅަށް "ސައުދީ އަތޮޅުގެ" ނަމުން މެންބަރުން މުބީން މުޚާތަބު ކުރައްވާފައިވާއިރު، އެ އަތޮޅު ނުވަތަ އަތޮޅުން ބައެއް ސައުދީ އަރަބިއްޔާ އަށް ނުވަތަ އެގައުމުގެ ޝާޚީ އާއިލާގެ ބޭފުޅަކަށް ވިއްކާލަން އުޅޭ ކަމަށް ބުނާ އަޑުތައް ވަނީ ގަދަވެފަ އެވެ.
ފ. އަތޮޅުގައި 10 ބިލިއަން ޑޮލަރުގެ ބިޔަބޮޑު މަޝްރޫއެއްގެ ސައުދީ އަރަބިއްޔާ އިން ހިންގަން އުޅޭ ކަމަށް ރައީސް އަބްދުﷲ ޔާމީން ވިދާޅުވެފައިވެ އެވެ. އަދި އެ އަތޮޅަށް ސައުދީގެ ވަރަށް ބޮޑު ޝައުގުވެރިކަމަށް އެބަހުރި ކަަމަށް ވެސް ރައީސް ޔާމީން ވިދާޅުވެފައިވެ އެވެ.
ނަމަވެސް، ރާއްޖޭގައި ހުންނަ ސައުދީ އެމްބަސީ އިން ވަނީ އެފަދަ މަޝްރޫއެއް ރާއްޖޭގައި ހިންގުމަށް އެގައުމުން ނުޅޭ ކަމަށް ބުނެ ބަޔާނެއް ނެރެފަ އެވެ. އެ ބަޔާނުގައި ބުނީ ރާއްޖޭގެ ރަށެއް އަދި އަތޮޅެއް ވެސް އެގައުމުން ގަންނަން ނޫޅޭ ކަމަށާއި އަދި ރާއްޖޭގައި އެގައުމުން ބޮޑު މަޝްރޫއެއް ހިންގަން އުޅޭ ވާހަކައަކީ ދޮގެއް ކަމަށެވެ.
ފ. އަތޮޅާއި ސައުދީއާ ގުޅުވައިގެން ދައްކާ ވާހަކަތައް ބޭރުގެ މީޑިއާތަކުގެ ފަލަސުރުޚީ އަށް އަރާފައިވާއިރު، މިމަހުގެ ތެރޭގައި ސައުދީ ރަސްގެފާނު ސަލްމާން ބިން އަބްދުލްއަޒީޒް ރާއްޖެ އަށް ދަތުރުފުޅެއް ކުރެއްވުމަށް ވަނީ ހަމަޖެހިފަ އެވެ. ސަލްމާން ރަސްގެފާނުގެ ދަތުރުފުޅުގެ ތައްޔާރީތަކަށް އެގައުމުގެ މަނަވަރެއް ރާއްޖެ އައިސްފައިވާއިރު، ދިވެހި ސަރުކާރުން ވެސް ދަނީ ތައްޔާރީތައް ވަމުންނެވެ.
