ސައުދީ އަރަބިއްޔާ ޔަމަނާ ގުޅޭ ސަރަހައްދީ ރޮނގު ކައިރީގައި ބަދަލުކުރި ހަމަލާތަކަކަށް ފަހު، ސައުދީ އަސްކަރިއްޔާގެ ބަޔަކު ހައްޔަރުކޮށްފައިވާ ކަމަށް ޔަމަނުގެ ހޫތީ ޖަމާއަތުން ބުނެފިއެވެ.
ޔަމަނުގެ ހޫތީ ޖަމާއަަތުގެ ތަރުޖަމާނަކު ބުނީ، ހޮނިހިރު ދުވަހު ދިން ހަމަލާއެއްގައި ސައުދީ އަސްކަރިއްޔާގެ ތިން ބްރިގޭޑެއްގެ މީހުން ހައްޔަރުކޮށްފައިވާ ކަމަށެވެ. ހޫތިން ބުނާގޮތުން ނަމަ، ސައުދީ އަސްކަރިއްޔާގެ ބަޔަކު ހައްޔަރުކޮށްފައިވަނީ ތިން ދުވަސް ކުރިން ދިން ހަމަލާތަކެއްގައެވެ. މި ހަމަލާތަކުގައި ހޫތީ ޖަމާއަތުގެ ޑްރޯންތަކާއި، މިސައިލް އަދި އެއަރ ޑިފެންސް ޔުނިޓްތައް ބައިވެރިވީކަމަށް ހޫތީން ބުނެފައިވެއެވެ.
ހޫތީން ހިންގަ އަލް މަސިރަހް ޓީވީން ރިޕޯޓްކޮށްފައިވަނީ، ސައުދީ އަސްކަރިއްޔާގެ ހާހެއްހާ ސިފައިން ހައްޔަރުކޮށްފައިވާ ކަމަށެވެ. އޭގެ އިތުރުން ގިނަ އަދަދެއްގެ އަރމަރޑް އުޅަނދުފަހަރު އަތުލައިގަނެފައިވާ ކަމަށް ވެސް އެ ޗެނަލުން ރިޕޯޓްކޮށްފައިވެއެވެ.
ހޫތީން ވަނީ މި ހަމަލާއަކީ އެ ޖަމާއަތުގެ ހަނގުރާމަވެރިންގެ ބާރު އަންދާޒާކޮށްލަން، ސައުދީއަށް ލިބުނު އިންޒާރެއްކަމަށް ބުނެފައެވެ. އަދި މި ހަމަލާތަކުން ހާމަވެގެން ދަނީ އެ ޖަމާއަތުގެ ހަނގުރާމަވެރިންނަށް ސައުދީއަށް ވަދެ، ހަމަލާދިނުމުގެ ގާބިލިއްޔަތު ހުރިކަން ކަމަށްވެސް ހޫތީން ބުނެފައިވެއެވެ. ކުރިޔަށް އޮތް ތަނުގައިވެސް ސައުދީން ޔަމަނަށް ހަމަލާ ދޭނަމަ، މިހެން ހަމަލާދޭނަކަމުގެ އިންޒާރުވެސް ހޫތީން ދީފައިވެއެވެ.
ހޫތީން އިތުރަށް ބުނެފައިވަނީ، ހައްޔަރުކުރި ސައުދީ ސިފައިން ބައިތިއްބާނެ ތަނެއް ހާމަކުރެވެން ނެތް ކަމަށެވެ. މިހެން ކަން ކުރަން ނިންމީ ސައުދީ ވައިގެ ހަމަލާތަކުން ސަލާމަތްވުމަށް ކަމަށް އެ ޖަމާއަތުން ބުނެފައިވެއެވެ. ހޫތީން ވަނީ ސައުދީ އަސްކަރިއްޔާގެ އެއްވެސް މީހަކަށް އަނިޔާ ނުކުރާނެކަމުގެ ޔަގީންކަން ދީފައެވެ.
ދެ ގައުމުގެ ސަރަހައްދީ ރޮނގު ގުޅޭ ސަރައްހައްދުގައި އޮންނަ ސައުދީގެ ނަޖްރާންއާ އިންވެގެން އޮންނަ ޔަމަނުގެ ސަރަހައްދީ ރޮނގުކައިރީގައި ބަދަލުކުރި ހަމަލާތަކާ ގުޅޭގޮތުން މިހާތަނަށް ސައުދީން އެއްވެސް ބަހެއް ބުނެފައެއް ނުވެއެވެ.
ޔަމަނުގައި ހިނގަމުންދާ ދާހިލީ ހަނގުރާމައިގައި، އެގައުމުގެ ސަރުކާރަށް އެހީތެރިވެދިނުމުގެ ގޮތުން ސައުދީއާ، އެ ގައުމާ ގުޅިފައިވާ ގައުމުތަކުގެ ކޯލިޝަނުން ދަނީ ހޫތީންނަށް އަމާޒުކޮށް ވައިގެ ހަމަލާ ދެމުންނެވެ. އަދި މި ހަމަލާތަކަށް ރައްދު ދިނުމުގެ ގޮތުން ހޫތީންވެސް އަންނަނީ ސައުދީއަށް އަމާޒުކޮށް ޑްރޯންގެ ޒަރިއްޔާއިން ސައުދީއަށް ދެމުންނެވެ.
މިފަހުން ސައުދީގެ ތެޔޮ އުފައްދާ މަރުކަޒުތަކަށް ދިން ހަމަލާގެ ޒިންމާވެސް، ހޫތީ ޖަމާއަތުން ވަނީ ނަގާފައެވެ. އަދި އެ ހަމަލާއާ ގުޅިގެން ސައުދީގެ ސާފުނުކުރާ ތެޔޮ އުފައްދާ މިންވަރު ދަށްވެ، ދުނިޔޭގެ ތެޔޮ އުފައްދާ މިންވަރު ވަނީ ފަސް އިންސައްތައިން ދަށަށް ގޮސްފައެވެ.
ހޫތީ ޖަމާއަތުން މިހަމަލާގެ ޒިންމާ ނެގި ނަމަވެސް، ސައުދީއާއި އެމެރިކާ އަދި އިނގިރޭސިވިލާތާއި ފަރަންސޭސްވިލާތުގެ އިތުރުން ޖަރުމަނުން ވެސް ވަނީ، މި ހަމަލާގެ ފަހަތުގައި ވަނީ އިރާން ކަމަށް ބުނެފައެވެ.
