ސައުދީ އަރަބިއްޔާ ހުރިހާ ޤައުމުތަކުގެ ފަތުރުވެރިންނަށް ހުޅުވާލަނީ
49 ޤައުމަކަށް ވިސާ ދޫކުރާނެ ހުކުރު ދުވަހު
ސައުދީ އަރަބިއްޔާ
ހުރިހާ ޤައުމުތަކުގެ ފަތުރުވެރިންނަށް ސައުދީ އަރަބިއްޔާ ހުޅުވާލަން އެ ޤައުމުން ނިންމައިފިއެވެ.
އެ ޤައުމުން މިގޮތަށް ނިންމީ އިޤްތިސާދީ ގޮތުން ތެލަށް ބާރޯސާވެފައިވާ މިންވަރު ކުޑަ ކުރުމުގެ ޕްލޭންގެ ދަށުންނެވެ.
ހުކުރު ދުވަހު ސައުދީ އަރަބިއްޔާ އިން 49 ޤައުމަކަށް ވިސާ ދޫކުރުމަށް ނިންމާފައިވާއިރު އެހެން ޤައުމުތަކުގެ އަންހެން ފަތުރުވެރިންނަށް ހެދުން އެޅުން ލުއި ކުރުމަށް ވެސް ވަނީ ނިންމާފައެވެ. އެގޮތުން އެ ޤައުމަށް އަންނަ އަންހެން ފަތުރުވެރިން ހަށިގަނޑު އެއްކޮށް ނިވާވާފަދަ ހެދުމެއް ލާންނުޖެހުނުކަމުގައިވީ ނަމަވެސް އިޖްތިމާއީ މިންގަނޑުތަކަށް ފެތޭފަދަ ހެދުމެއް ލުމަށް ވަނީ އަންގާފައެވެ. މީގެ އިތުރުން މަހުރަމަކާ ނުލާ ދަތުރުކުރާ އަންހެނުންނަށް އެއްވެސް "ރެސްޓްރިކްޝަންސް" އެއް ނޯންނާނެ ކަމަށެވެ.
މީގެ ކުރިން އެ ޤައުމުން ވަނީ ވިސާ ދޫކުރުމުގައި ވަރަށް ހަރުކަށި އުސޫލުތަކެއް ގެންގުޅެފައެވެ. އެ ޤައުމުގެ ޓޫރިޒަމް މިނިސްޓަރ އަހްމަދު އަލް ހަތީބް ވަނީ މި ދަނޑިވަޅަކީ އެ ޤައުމަށް ތާރީހީ ވަގުތެއް ކަމަށް ސިފަކުރައްވާފައެވެ.
މުސްލިމް ނޫން މީހުންނަށް މައްކާ އަދި މަދީނާއަށް ޒިޔަރާތްކުރެވޭއިރު ރާބުއިން މާނާކޮށްފައި އޮތް އޮތުން ދެމިއޮންނާނެ ކަމަށެވެ.
