އެމްޑީޕީން އައްޑޫ ސިޓީ ހުޅުދޫގަ އާއި މީދޫގައި ވެސް ކެޕްޕެއިން ހަރަކާތްތައް ހިންގައިފި

އިލެކްޝަންސް ކޮމިޝަންސްއިން އޭޕްރީލް މަހުގެ 15 ވަނަ ދުވަހު ބޭއްވުމަށް ނިންމާފައިވާ ލޯކަލް ކައުންސިލް އިންތިހާބުގެ ކެމްޕެއިން ރާއްޖޭގެ ދެކުނުގައި އެމްޑީޕީން ފެށި ހަރަކާތަށްފަހު އައްޑޫ ސިޓީ ހުޅުދޫއާއި މީދޫގައިވެސް ކެމްޕެއިން ހަރަކާތްތައް ކުރިއަށް ގެންގޮސްފި އެވެ.

މިދިއަ ބުރާސްފަތި ދުވަހުގެ ރޭ އައްޑޫ ސިޓީ ހިތަދޫގަ އާއި ހއ. ދިއްދޫގައި އެމްޑީޕީން އެއް ވަގުތެއްގައި ބޭއްވި ދެ ޖަލްސާއަށްފަހު މުޅި ރާއްޖޭގައި އެމްޑީޕީން ވަނީ ރަސްމީކޮށް ކެމްޕެއިން ހަރަކާތްތައް ހިންގަން ފަށާފަ އެވެ.

އައްޑޫ ސިޓީގެ ގުޅިފައިވާ ރަށްތަކުގައި އެމްޑީޕީން ކެމްޕެއިން ހަރަކާތްތައް ހިންގުމަށްފަހު، ހުކުރު ދުވަހުގެ ހަވީރު އެމްޑީޕީގެ ލީޑަރޝިޕްގައި އިސްކޮށް ހަރަކާތްތެރިވާ ބޭފުޅުން ވަނީ އައްޑޫ ސިޓީގައި ވަކިން އޮންނަ ހުޅުދޫ އާއި މީދޫއަށް ވަޑައިގެން އެ ދެ ރަށުގައިވެސް ކެމްޕެއިން ހަރަކާތްތައް ހިންގާފަ އެވެ.

އެގޮތުން ހުކުރު ދުވަހުގެ ހަވީރު ހުޅުދޫގައި ވަނީ ރައްޔިތުންނާ ބައްދަލު ކޮށްފަ އެވެ. މީދުގައި އެ ހަރަކާތް ކުރިއަށް ގެންގޮސްފައިވަނީ އިޝާނަމާދަށްފަހުގަ އެވެ.

އެ ދެ ބައްދަލުވުމުގައި ވެސް އެމްޑީޕީގެ ނައިބު ރައީސް މުހައްމަދު ޝިފާޒު އާއި އެމްޑީޕީގެ ޗެއާރޕާސަން ނައިބު އަލީ ޝިޔާމް އާއި ރައްޔިތުންގެ މަޖިލީހުގެ ހުޅުމީދޫ ދާއިރާގެ ކުރީގެ މެމްބަރު އިލްޔާސް ލަބީބު އާއި އެމްޑީޕީގެ ކުރީގެ ރައީސް ޑރ. ޑީޑީގެ އިތުރުން އެމްޑީޕީގެ ކެމްޕެއިން ހަރަކާތްތަކުގައި އިސްކޮށް އުޅުއްވާ ބޭފުޅުންނާއި ލޯކަލް ކައުންސިލް އިންތިހާބުގައި ވާދަކުރާ ބައެއް މެމްބަރުންވެސް ވާހަކަ ދައްކަވާފައި ވެއެވެ.

މައިގަނޑު ގޮތެއްގައި ހުރިހާ ބޭފުޅުންވެސް ވިދާޅުވެފައިވަނީ ކުރިއަށް އޮތް ލޯކަލް ކައުންސިލް އިންތިހާބު އިދިކޮޅު އިއްތިހާދުގެ ކެންޑިޑޭޓުންނަށް ވޯޓް ދިނުމަކީ ދައުލަތުގެ ފައިސާއަށް ހިޔާނާތްވުމާއި ރަށްތައް ވިއްކާލުމާއި ކޮރަޕްޝަނާ ފަސާދައާ ދެކޮޅަށް ދެވޭ ވޯޓެއް ކަމަށާއި، އެކަންކަމުން ރާއްޖެ ސަލާމަތް ކުރުމަށް އިދިކޮޅު އިއްތިހާދުގެ ކެންޑިޑޭޓުންނަށް ވޯޓް ދޭން ޖެހޭ ކަމަށެވެ.

މީގެއިތުރުން ލާމަރުކަޒީ ނިޒާމަކީ އެމްޑީޕީގެ ހިންގަން ބޭނުންވާ ނިޒާމެއް ކަމަށާއި މިސަރުކާރަކީ ލާމަރުކަޒީ ނިޒާމާ ދެކޮޅު ސަރުކާރެއް ކަމަށްވެސް އެބޭފުޅުން ވިދާޅުވި އެވެ. އެހެންކަމުން ރައްޔިތުންނާ ގާތުން ހިދްމަތް ކުރުމަށާއި ރަށަށް ތަރައްގީ ގެނައުމަށްޓައި އިދިކޮޅު އިއްތިހާދުގެ ކެންޑިޑޭޓުންނަށް ވޯޓް ދިނުމަށް އިދިކޮޅު އިއްތިހާދުގެ ބޭފުޅުން ވަނީ ގޮވާލައްވާފަ އެވެ.